Eryobha ˆreghaghongibhu
19
Hano ghayo ghahetiri,
nekooghu kinya amaraka gha rikinda ikoro re bhaato iyo Mwishaaro.
Bhaghatiiri amaraka gharabhugha,
“Aghongibhu Waryobha!
Obhotoori,
no obhokumi obhokoro
no obhotoro m‑bhe Waryobha wiito,
2 gho kubha ghotena ekiina kooche
n‑kwo mahëënë no obhuhëënë.
Nateniire ekiina omusöngörëëri omokoro
uno asariri ase kwo bhutaari bhooche.
Eryobha ndemorehiini asiire
gho ghiri e masaahë gha bhatamishi bhaache.”
3 Ghaghagharokeri mara e kabhere ghakabhugha,
“Reghongibhu Eryobha!
Eryoki riyo koru mo‑moghya uyo
ndeeghuye ighoro emiishe ghyose.”
4 Abhagharuka bhaare miröngö ebhere na bhane haghirohamu ne ebhetyenyi bhiire bhine bheghagho kebhuuma,
bhakarisëngëra Eryobha rino riikeere mo‑ghetumbe ghe ghitëmi bharabhugha,
“Hawubhaabha!
Reghongibhu Eryobha!”
5 Mbe,
nekooghu eriiraka erende koru mo‑ghetumbe ghe ghitëmi rerabhugha,
“Momoghongi Waryobha wiito,
inyu abhatamishi bhaache bhoose.
Momoghongi inyu bhano mokomusëngëra,
bhano moonyi ne emyeya emekoro ne emesuuhu!”
6 Nekamara,
nekooghu amaraka kinya gha rikinda ikoro.
Amaraka ghayo ghakaherera kinya bhuure amanche maaru ghahaaherera hano ghahaabha gharaghëri.
Wiiki ngaare kinya eriiraka ikoro re runanehi.
Gharabhugha,
“Aghongibhu Waryobha!
Gho kubha Omutëmi Waryobha wiito o Bhotoro Bhoose aghasëëma ghukangata.
7 Na niitu,
tuchömëru,
tuchaghane na komoghongi.
Gho kubha anyangi e riirugha re Moona o Ngʼöndu ˆrekahika,
no omokwiru namariri ghwisëëmi.
8 Omokwiru nahaabhuru angibho e ghitani inchömu
ino ere yeero wiiki erabharibhari chwee.”
Angibho iyo anchömu egheteemoro keeche n‑amaköri amachömu gha bhatööbhiyu.
9 Marayika uyo akamboorera akabhugha,
“Andëka,
ngʼoni bhano bharaghiinu mo‑nyangi e riirugha e Omoona o Ngʼöndu.”
Wiiki akamboorera akabhugha,
“Ghano nighambiri n‑amangʼana gha mahëënë gha Ryobha.”
10 Niho neghagho kebhuuma ambërë e marayika uyo,
kubha nemusëngërë.
Amare akamboorera akabhugha,
“Tigha!
Eni woose n‑omutamishi mughëndi waacho neenyi.
Nturëngʼiine na abhahiiri bhaacho abharööti,
na abhande bhoose bhano bhakoruusi obhwibhateri ighoro e Yesu.
Mbe,
usëngërë Eryobha eryene chiri!
Gho kubha,
obhuhëënë bhuno Yesu ërëkiri,
nibho bhoghughëri abhaato bhararuusi obhurööti.”
Omotiiri o bharaasi ayeero
11 Hano ghayo ghahetiri,
nekarighi eriirighi erende.
Nekarighi erishaaro riighokiri.
Nekarighi abharaasi ayeero no omooto ikeere ighoro yaache.
Omooto uyo nabherekiiru,
“O Muhëënë” no “O Mahëënë.”
Iwe nahaatena ekiina na kurööna eriihë kwo bhuhëënë.
12 Amiisho ghaache ngaare kinya orumëmi ro mororo,
iwe naare abheekiri chahuuru chaaru che ghitëmi mo‑mutu waache.
Naare andëkuru eriina rino retamënyuru no omooto owonde,
nanyinga iwe omwene chiri.
13 Naare abheekiri andachana ino etibhuru mo‑masaahë.
Eriina reeche nabherekiiru,
“Angʼana e Ryobha.”
14 Abhakëëya bha Mwishaaro mbaare bharamoru anyuma.
Mbaare bhabheekiri changibho cheero che ghitani inchömu,
na mbaare bhatiiriri chabharaasi cheero.
15 Ekinyamiino ekyeghi nkehaaru mo‑monu waache kubha,
ahiche abhaato bha matöngö.
Naghoghakangata no obhotoro bhokoro.
Iwe niwe ahaatacha chasabhiibhu mo‑gheghiro ghe ghochemitera,
kino ghekwërëki obhororo bho Ryobha re Bhotoro Bhoose.
16 Omooto uyo naare ne eriina rino reere ryandëkiri mo‑ndachana yaache eribhaara re mwitango kubha,
omukangati o bhakangati no omutëmi o bhatëmi.
17 Nekamara nekarighi marayika umu imeeriire ighoro e ryobha.
Marayika uyo aghatiiri eriiraka,
akabhebherekera ebhinyönyi bhyose bhino bheere bheriibhururuka ighoro,
akabhugha,
“Muuche,
mwikomane mo‑nyangi inkoro e Ryobha.
18 Muuche mori chaanyama che bhatëmi,
na che bhantomonkoro bha riihë,
na che bhaato bha changuru.
Mori chaanyama che chabharaasi na che bhayaari bha chabharaasi chiyo.
Mori chaanyama che bhaato bhoose,
abhasësë na bhano bhaanyi huuru,
na bhano bhaanyi ne emyeya emekoro ne emesuuhu.”
19 Mbe,
nekarighi oghotyenyi ghuure o ghumbërë na abhatëmi bha se na abhakëëya bhaabho bhiikomiine haghirohamu.
Ibho ꞉mbëëndiri kurööna na uno are ikeere ighoro e bharaasi ayeero haghirohamu na abhakëëya bhaache.
20 Amare oghotyenyi ghuyo,
haghirohamu no omurööti o bhuröngö uno aköriri ebhyërëkërëri ambërë yaache,
꞉mbiimokiibhu ke bhano bhaghööturu mwihë.
Gho ghuköra ebhyërëkërëri bheeche bhiyo,
omurööti uyo o bhuröngö nangʼiiniri abhaato bhano bhatoriiru ekingʼöchö no oghotyenyi ghuyo na ghusëngëra asanaamu yaache.
Bhoose bhabhere ꞉mbaarëkiiru bhaanyi abhahöru mo‑nyancha e mororo muhaari chwee.
21 Omooto uyo are ikeere ighoro e bharaasi ayeero,
akahökëri ekinyamiino kino ꞉keeruure mo‑monu waache ghwita bhano bhasaaghiri.
Ne ebhinyönyi bhiyo bhyose bheekare chaanyama cheebho,
bheghiighöta chwee.