Omoghya o Bhabheeri ˆoghagho
18
Hano ghayo ghahetiri,
nekarëkëra amiisho nekarighi marayika owonde ariika koru Mwishaaro.
Naare no obhotoro bhokoro,
no obhokumi bhooche obhokoro bhokarëngaari ase yoose.
2 Aghatiiri eriiraka ikoro chwee,
arabhugha,
“ˆOghagho!
Omoghya omokoro o Bhabheeri ˆoghagho!
Ibheere nubheere obhwikari bho misambu
ghe manga ghoose,
na ahaghiro haabho ha kwibhisa.
Nubheere ahaghiro ha kwibhisa,
ebhinyönyi bhe manga ghoose,
ebheghonchu ne ebhesineenu.
3 Nooghwire gho kubha abhaato bha matöngö ghoose
mbanywire adivaayi yaache,
mbarëëwuru na amiigha gha bhutaari bhooche,
na abhatëmi bha se mbaare bhataariri nawe.
Abhasorocha bha mo‑se
꞉mbaamihiri gho ghiri e bhwaru bho bhwame bhooche
bhuno bhotaanyi ne ekirëngërë.”
4 Niho nekooghu eriiraka erende koru Mwishaaro,
rerabhugha,
“Moru ghokooche,
inyu abhaato bhaane,
kubha motaghöötana nawe ghuköra amasari ghaache,
na motabhöna anchagho haghirohamu nawe.
5 Amasari ghaache ngabheere maaru,
koru ngahikiri Mwishaaro.
Eryobha ndiisëëmiri komuha anchagho
kwo maköri ghaache amabhe.
6 Kinya abhaköriire abhande,
inyu bhoose momukörërë hangʼu hangʼu.
Wiiki momukörërë amabhe
mara kabhere e ghano abhaköriire abhande.
Mwimoki eghisënchö keeche,
momotoorere obhororo
mara kabhere e bhuno ꞉abhatooriire inyu.
7 Momutëmë anchagho na momunyaaki
gho kirëngërë kino aköriri
akiibhönëra aghongo no obhwame.
Gho kubha iwe nahiihacha mo‑körö yaache arabhugha,
‘Niikeere kinya marikiya,
na nteenyi omosino,
koru nteekubhöna amacheeche naabha!’
8 Gho ghayo,
nakubhöna chanaabhi choose kwo rosiko rumu,
chanaabhi che roko,
na che riirera na che gheecha.
Naghwekibhu no omororo kimu,
gho kubha Omutëmi Waryobha
uno akomotenera ekiina niwe o bhotoro.”
9 Abhatëmi bha se bhano ꞉bhaataariri nawe na ghusanga obhwame bhooche,
mbakorera na kwihiinyërëra bharaacha korighi eryoki re ghosireekerera kwo moghya uyo.
10 Mbakwimeerera kurë no omoghya uyo gho ghotiina anyaako yaache.
Mbakorera bharabhugha,
“Horeera nokorighi,
horeera nokorighi omoghya omokoro,
Bhabheeri,
omoghya uno onyi na changuru!
Noteniiru ekiina kwo bhwango chwee!”
11 Abhaköri bha bhosorocha bha se mbakomorerera na kwihiinyërëra,
gho kubha bhataanyi‑ho abhaato bha ghoghora ebheghiro bheebho.
12 Taanyi‑ho omooto wiiki o ghoghora ebheghiro bheebho bhe sahaabhu,
na chambiiri,
na ruuru koru amabhohe gha riighori.
Taanyi‑ho omooto o ghoghora eghitani ghichömu,
na changibho inchömu che sambaraawe,
na che hariri na chambararatu.
Wiiki taanyi‑ho omooto o ghoghora ebheghiro bhe mete ghe bheneeso,
koru ebheghiro bhino bhiköruru na amiino gha chanchoghu,
na bhe chambaawe che riighori,
koru bhe shabha,
ne ekyoma hamu marumaru.
13 Taanyi‑ho omooto o ghoghora omutarasiini,
ne ebherongero,
na akorose,
na manemane hamu ebheneeso,
koru adivaayi,
na amaghuta gha kereero,
no obhotu obhwero,
na angano.
Wiiki taanyi‑ho omooto o ghoghora changʼömbë,
na changʼöndu,
na chabharaasi,
na chamontoka chino chekorutu na chabharaasi,
na abhasësë,
na koru eriimanya re bhaato.
14 Mbe,
abhaköri bha bhosorocha mbakobhugha,
“Ebheghiro bhino ore osiighiri mbesirekeriire.
Ebheghiro bhyose bhe riighori ikoro,
bhimangi na bhe kubharibhari mbebhoriri,
bhetaanyi‑ho koru bhetaakubhönëka naabha.”
15 Abhasorocha bhano bhaamihiire mo‑moghya uyo,
mbakwimeerera kurë gho ghotiina anyaako iyo,
ino bhiitumatiri na korera.
16 Mbaakubha bharabhugha,
“Horeera nokorighi,
horeera nokorighi iye omoghya omokoro.
Noore orabheeka changibho inchömu chwee che ghitani,
na che sambaraawe,
na chambararatu.
Noore oriichöcha gho sahaabhu,
na amabhohe gha riighori na ruuru.
17 Amare obhwame bhuyo bhoose
mbosirekeriiru kwo bhwango chwee.”
Abhiimeereri bhoose bha chameeri,
na abhaköri bha rughëndö bhoose,
na abhahöki bha meremo bhoose bha mo‑meeri,
mbakwimeerera kurë.
18 Hano bhakorighi eryoki re ghosireekerera kwo moghya uyo,
mbakorera kwo riiraka bharabhugha,
“Toonyi‑ho omoghya owonde kinya omoghya omokoro uno!”
19 Mbakwihomerera orotu mo‑mitu gheebho,
kwërëki kubha mbaanyi na amacheeche.
Mbakorera bharabhugha,
“Horeera nokorighi,
horeera nokorighi omoghya omokoro.
Omoghya uyo niwe otuköriri itu bhano toonyi na chameeri twamihe gho ghiri e bhwame bhooche.
Amare ibheere omoghya woose oghasireekerera kwo riibhagha isuuhu hangʼu.”
20 Muchömëru inyu bhano mumanyiri Mwishaaro.
Muchömëru abhatööbhiyu,
na abhatomu na abharööti,
gho kubha Eryobha ndeteniire ekiina omoghya uyo gho ghaare obhaköriire inyu.
21 Akamara,
akarwera marayika umu uno anyi na changuru,
aghaghëgha eriibhohe kinya orobhohe,
akarirëkëra mo‑nyancha,
akabhugha,
“Gho changuru chaaru kinya chino,
omoghya omokoro o Bhabheeri nokurëkëru
na kobhora inkongʼorimu.
22 Mo‑moghya muyo motaakooghu wiiki
amaraka gha bhaato bhano bhakwemba,
na ghutëma amatingo,
ne ebherereesi hamu chantaara.
Taakubha‑ho omukaari wowoose,
koru tokooghu omooto arase mo‑robhohe!
23 Hayo hataakubha no omurëngaari o romore wiiki,
koru chanyangi che ghokwira hamu ghokwiru
chetaakubha‑mu wiiki.
Omoghya o Bhabheeri noghuköru hangʼu,
gho kubha abhasorocha bhaache
mbaare abhaato abhakoro bha se,
na gho kubha amatöngö ghoose ngangʼiinuru
gho kohetera obhoturutumbi bho moghya uyo.
24 Mo‑moghya muyo,
ngaare‑mu
amasaahë gha bharööti na gha bhatööbhiyu,
haghirohamu na amasaahë gha bhaato bhoose
bhano bhiituru mo‑se ino.”