Omusöngörëëri omokoro no oghotyenyi oghubhararatu
17
Akamara,
umu o bhamarayika mohungate bhano ꞉bhaare ne ebhetibha bhiire bhe bhororo bho Ryobha akaacha ghokoone,
akamboorera akabhugha,
“Nuuche,
neghokwërëki anchagho e musöngörëëri omokoro,
uno ikeere ighoro e manche maaru.
2 Abhatëmi bha se mbataariri nawe,
na abhaato bha se nabho mbarëëwuru no bhutaari bhooche,
kinya omooto uno anywire amaro.”
3 Mbe,
Akörö Ahörëëru ekanyiikera.
Marayika akandahuuna mbagha mwibhara.
Hano nehikiri iyo,
nekarighi omukari ikeere mo‑ghotyenyi ghuno ghoonyi na arange ambararatu.
Oghotyenyi ghuyo ngoore ne emitu mohungate na chahëmbë ikomi.
Ngoore ghwichwire amariina maaru gha ghotoka Eryobha.
4 Omukari uyo naare abheekiri changibho inchömu che range e sambaraawe na ambararatu.
Wiiki naare ichöchiri gho sahaabhu,
na amabhohe gha riighori ikoro na ruuru.
Mo‑kubhökö kooche,
naare aghöötëriire eghisënchö ghe sahaabhu kino keere ghiichwire amangʼana amasineenu ne ebheghiro ebheghonchu bhe bhutaari bhooche bhuyo.
5 Mo‑ghesho keeche ꞉haare haandëkuru eriina rino egheteemoro keeche keere kiibhisiri.
Eriina eryene niryo rino,
omoghya omokoro o bhabheeri,
nyina o bhasöngörëëri
no o mangʼana amasineenu gha se.
6 Nekarighi omukari uyo arëëwuru gho kunyo amasaahë gha bhatööbhiyu bhano bhiituru gho kubha mbaare abhiibhateri bha Yesu.
Hano nemorooche,
nekaroghoora chwee.
7 Amare marayika wuure akamboori akabhugha,
“Ghwake okaroghoora?
Horeera nekobhoorere egheteemoro ghe kebhisere ke mukari uyo no oghotyenyi ghuno ghoore ghomughëghiri ghuno ghoore n‑emitu mohungate na chahëmbë ikomi.
8 Oghotyenyi ghuno orooche,
ekimbërë ngoore ghuhöru amare ibheere ngokuure.
Ibheere haghuhe ghoonyi koru mwirooma re mashambu,
a amare Eryobha ndeghoghosireekereri.
Abhaato bhoose bha se bhano amariina ghaabho ghataandëkuru mo‑Ghitabhu ke Bhuhöru korwera ghutëëmu gho se,
mbakoroghoora korighi oghotyenyi ghuyo gho kubha ngoore‑ho,
ghokamara ghoghaku,
amare ghoghagharuka wiiki.”
9 Marayika uyo akëëndërëra kobhugha,
“Angʼana ino nekwëndëru amangʼiini.
꞉Noorooche emitu mohungate,
ghiyo n‑eghetuubhaani ke heghoro mohungate hino omukari wuure are ikariire.
Wiiki emitu mohungate ghiyo ꞉ngiimeereriire abhatëmi mohungate.
10 Mo‑bhatëmi bhayo,
bhataano mbamariri ghoku,
mbasaaghiri bhabhere,
umu naghukangata.
Omutëmi owonde uno akurööbhëra tamaraacha.
Hano akuucha,
Eryobha ndekomwisherereri akangate kwo riibhagha ighuhe hangʼu.
11 Oghotyenyi ghuno ghoore ghuhöru ghokamara ghoghaku,
n‑omutëmi o kanaane.
Omutëmi o kanaane uyo n‑umu o bhatëmi bhaare mohungate,
koru woose Eryobha ndekomosireekereri.
12 “Chahëmbë chiire ikomi chino orooche nchiimeereriire abhatëmi ikomi,
bhano bhakeere ghukangata.
Bhayo bhoose mbakuhaabhu obhotoro bho ghukangata haghirohamu no oghotyenyi ghuyo,
amare kwo riibhagha re sa imu hangʼu.
13 Abhatëmi ikomi bhayo mbaakubha ne eryënda rimu,
mbaakuha oghotyenyi ghuyo obhotoro bhoobho na changuru cheebho choose.
14 Mbaghughöötana nagho ghuköra eriihë no Omoona o Ngʼöndu.
Amare Omoona o Ngʼöndu haghirohamu na abhaato bhaache mbakobhahicha,
gho kubha iwe n‑Omutëmi o bhatëmi no Omukangati o bhakangati.
Abhaato bhaache m‑bhaare ꞉bhaabherekiiru na kwahoru ne Eryobha,
abhaato bhayo m‑bha hëënë.”
15 Marayika akëëndërëra komboorera arabhugha,
“Amanche ghano omusöngörëëri wuure ikeere ighoro yaache ngiimeereriire amakinda gha bhahiiri bhoose,
na ase yoose ne ebhighambo bhyose.
16 Chahëmbë chiire ikomi no oghotyenyi ghuyo mbekomurëgha omusöngörëëri wuure.
Mbakwimoki obhwame bhooche bhoose na komotigha kingʼaabhi.
Mbaakurë chaanyama cheeche,
na bhino bheghusaagha,
mbekurëkëru mo‑mororo.
17 Eryobha eryene ndebhaköriri bhabhe ne eryënda rimu re kuha oghotyenyi ghuyo obhotoro bhoobho bho ghukangata.
Hangʼu nibhu bhaghuköra mbagha bhohikeerane obhorwachi bho Ryobha.
18 Omukari wuure orooche ne eghetuubhaani ke moghya wuure omokoro uno onyi no obhotoro ighoro e bhatëmi bhoose bha se.”