Ebhetibha mohungate bhe bhororo bho Ryobha
16
Nekamara,
nekooghu eriiraka ikoro koru Mwisëngërö riyo,
rerabhabhoorera bhamarayika bhaare mohungate rerabhugha,
“Mughëndë mohome mo‑se obhororo bho Ryobha bhuno bhoonyi mo‑bhetibha bhiire mohungate.”
2 Mbe,
marayika o mumbërë aghaye,
akahoma eghetibha keeche ke bhororo bho Ryobha mo‑se.
Hayo hayo,
abhaato bhoose bhano bhaanyi ne ekingʼöchö ghe ghotyenyi ghuure,
bhano ꞉bhaasëngiire asanaamu yaache bhaghaghöötu na amabhimba amabhe gha kunyahaara chwee.
3 Niho marayika o kabhere woose akahoma eghetibha keeche mo‑nyancha.
Amanche ghaghiigharura ghaakabha amasaahë kinya gha rihundughu,
ebhetyenyi bhyose ebhihöru bhe mo‑nyancha bheeghaku.
4 Niho marayika o ghatato woose akahoma eghetibha keeche mo‑charooche ne mo‑bherika bhe manche,
amanche ghayo ghaghiigharura ghaakabha amasaahë.
5 Nekamara nekooghu marayika omwimeerereri o manche arabhugha,
“Oo Waryobha Omutööbhiyu,
uno ore‑ho na uno onyi‑ho ibheere,
iye niiye omuhëënë,
na ghotena ekiina keecho
kuno n‑kwo bhuhëënë.
6 Abhaato abhabhe ꞉mbiitiri
amasaahë gha bhatööbhiyu bhaacho
na abharööti bhaacho,
na niiye nobhaheere amasaahë,
bhaghanyo.
Mbarëngʼaaniire anchagho iyo!”
7 Niho nekooghu eriiraka koru ahaghiro ha koruuseri amaruusi rerabhugha,
“Oo,
Omutëmi Waryobha o Bhotoro Bhoose,
oghotena ekiina keecho n‑kwo mahëënë
na kwo bhuhëënë.”
8 Niho marayika o kane akahoma eghetibha keeche mo‑ryobha.
Niho eryobha rekahaabhu obhotoro bho ghweki abhaato kwo bhotuuku bhooche.
9 Abhaato bhagheekibhu kobhe chwee.
Bhakaretoka Eryobha gho kubha ndeere no obhotoro ighoro e chanaabhi chino,
amare bhatatuukuuniri koru bhatareghongiri.
10 Niho marayika o ghataano akahoma eghetibha keeche mo‑ghetumbe ghe ghitëmi ghe ghotyenyi ghuyo.
Hayo hayo ekengʼuuri gheghakundekeri obhutëmi bhooche na abhaato bhakiiromaroma chandeme cheebho kwo bhororo.
11 Bhakaretoka Eryobha re Mwishaaro gho ghiri e bhororo bhuhaari na kwo mabhimba amabhe ghano ghabhabhwine.
Koru bhatatuukuuniire amaköri ghaabho amabhe.
12 Niho marayika o ghasaasabhe woose akahoma eghetibha keeche mo‑rooche orokoro ro Ebhuraati.
Amanche ghaache ghakooma.
Gho ghayo,
eghaköru anchëra gho ghiri e bhatëmi bhano bhaakoru roghoro.
13 Niho nekarighi emisambu etato ghino ꞉gheetuubhiine ne ebhyora.
Umu okaru mo‑monu o oghuchöka,
no wonde okaru mo‑monu o ghotyenyi ghuure,
no wonde okaru mo‑monu o murööti wuure o bhuröngö.a
14 Emisambu ghiyo ngeere no obhotoro bho ghuköra ebhyërëkërëri,
ne emeremo gheebho n‑ghuye kobhakoma abhatëmi bhoose bha mo‑se bhakörë eriihë mo‑rosiko orokoro ro Ryobha re Bhotoro Bhoose.
15 Omutëmi Yesu nakobhugha,
“Mööhi!
Nekuucha kinya bhuure omwibhi ahaacha ataraghiini.
Ngʼoni uno aghutënga na kobheeka changibho cheeche kubha ataacha ghughënda kingʼaabhi na ghosookibhu.”
16 Mbe,
emisambu ghiyo gheghakoma abhatëmi bhoose na abhakëëya bhaabho ahaghiro hano hakobherekeru Harimaghetooni gho Kebhuraaniya.
17 Niho marayika o mohungate akahoma eghetibha keeche mwighoro.
Nekooghu eriiraka ikoro koru mo‑ghetumbe ghe ghitëmi ke Mwisëngërö re Ryobha,
rerabhugha,
“Ghoose ˆghaghasira!”
18 Nekarighi orunanehi rorabhari,
na nekooghu eriiraka,
na haakabha ne ekerighito ghe se.
Ekerighito kiyo n‑ghekoro keere ghokera bhyose bhino ꞉bhiishamiri korwera hano Eryobha ꞉riitëëmiri omooto.
19 Niho omoghya omokoro o Bhabheeri oghataana ebheteneka bhitato ne emeghya emekoro ghe matöngö gheghasarëka ghyose.
Naryo Eryobha reteebhuru omoghya wuure omokoro o Bhabheeri.
Rekawuhaamereri onyo koru mo‑ghisënchö ke divaayi e ghukarara kwo bhororo bhooche.
20 Ekerighito kiire gheghaghëri ebheghinga bhe mo‑nyancha bhyose bhekabhora,
ne ebheghoro bhyose bhetaaroochiibhu wiiki.
21 Ambura e rihoorere eghatëëka.
Amabhohe gha mbura iyo ngaare makoro kinya chakiiro miröngö etaano kira rimu,
ghaghaghwera abhaato koru Mwishaaro.
Abhaato bhakaretoka Eryobha gho ghiri e naabhi iyo e mbura e rihoorere,
gho kubha anaabhi iyo neere imbe chwee.