Omwembo o Musa no o Moona o Ngʼöndu
15
Mbe,
nekarighi ekyërëkërëri ekende Mwishaaro.
Nkeere ghekoro na ghe koroghoori.
꞉Neerooche bhamarayika mohungate bhararëëta chanaabhi mohungate che kumareereri.
Chanaabhi ghiyo ncheere che kumareereri obhororo bho Ryobha.
2 Wiiki nekarighi egheghiro kino keere kinya anyancha e kiröri ino isangeriini no omororo.
Wiiki rubhareka hayo,
mbaare bhiimeeriire abhaato bhano ꞉bhaare bhakindiri oghotyenyi ghuure,
na asanaamu yaache,
haghirohamu no omubharo o riina reeche.
Abhaato bhayo mbaare bhaghöötëriire amatingo ghano ꞉bhaare bhahaabhuru ne Eryobha kubha bhamusëngërërë.
3 Mbaare bhareemba omwembo o Musa omusësë o Ryobha,
no o Moona o Ngʼöndu,
bharabhugha,
“Omutëmi Waryobha o Bhotoro Bhoose,
amaköri ghaacho m‑makoro na gha koroghoori.
Iye niiye Omutëmi o matöngö ghoose,
na chanchëra cheecho n‑che hëënë,
na che bhuhëënë.
4 Oo Omutëmi,
abhaato bhoose bhaghusëngërë
na koreghongi eriina reecho,
gho kubha iye omwene chiri niiye omutööbhiyu.
Abhaato bha matöngö ghoose mbakuucha
na ghoghusëngëra,
gho kubha amaköri ghaacho gha hëënë
ngakorighibhu haheero.”
Ebhetibha mohungate bhe ghukarara kwo Ryobha
5 Hano ghayo ghahetiri,
nekarëkëra amiisho nekarighi Erisëngërö righwiru Mwishaaro,
niryo eriibhuru re bhwibhateri bho kubha‑ho kwo Waryobha.
6 Bhamarayika mohungate bhaare bhaanyi na chanaabhi mohungate bhaakaru muyo.
Mbaare bhabheekiri changibho che ghitani cheero na che kurëngaari,
bhibhöhiri chaaköbha ingare chino chiköruru na sahaabhu mo‑bhekubha bheebho.
7 Umu o bhetyenyi bhiire bhine akabhaha bhamarayika bhayo mohungate kira umu eghetibha ghe sahaabhu kino ghiichwire obhororo bho Ryobha rino reenyi ihöru emiishe ne emiishe.
8 Mwisëngërö haghiichora eryoki rino reruure mo‑bhokumi obhokoro bho Ryobha no obhotoro bhooche.
Taare‑ho omooto uno atoriri ghusöha Mwisëngërö re Ryobha wiiki mbagha hano chanaabhi chiyo mohungate che bhamarayika bhayo hano ghahikeerane.