Omoona o Ngʼöndu na abhaato bhaache
14
Nekamara nekarëkëra amiisho,
nekarighi Omoona o Ngʼöndu imeeriire ighoro e gheghoro ghe Sayuunia haghirohamu na abhaato ekirara kimu ne ebheku miröngö ene na bhane (144,000).
Abhaato bhayo,
mbaare bhaandëkuru mo‑bhesho bheebho eriina re Moona o Ngʼöndu na ri Ishe.
2 Nekooghu eriiraka koru Mwishaaro kinya eriiraka re manche maaru mo‑makörörömë,
na kinya ekerighito ghekoro ke runanehi.
Wiiki eriiraka rino nyoghwire ndeere kinya re bhatëmi bha matingo bhaaru,
bhano bhatëmiri chantaara cheebho haghirohamu.
3 Abhaato ekirara kimu ne ebheku miröngö ene na bhane bhayo (144,000),
mbaare bhiimeeriire ambërë e ghetumbe ghe ghitëmi,
na ambërë e bhetyenyi bhiire bhine bhe bhuhöru,
na abhagharuka bhaare miröngö ebhere na bhane.
Abhaato bhayo mbaare bhareemba omwembo omuhë,
na taanyi‑ho owonde uno atoriri kwegha omwembo uyo,
nanyinga abhaato bhano bhatooriibhu koru mo‑se abheene.
4 Abhaato bhayo mbahaamutambana Omoona o Ngʼöndu hohoose hano aghuye.
Bhatighonchiri no obhoghonchu na abhakari,
gho kubha mbaare bhataamara bhataara na abhakari.
꞉Mbaatingwiru koru ghate e bhaato abhande,
bhaakabha a bhambërë koruusibhu amaruusi kwo Ryobha na kwo Omoona o Ngʼöndu.
5 Ibho bhataamara bhasiikëra obhuröngö koru hasuuhu,
hamu kubha ne eriisari ryoryose.
Bhamarayika bhatato ˆbhakaraghani angʼana e Ryobha
6 Nekamara,
nekarighi marayika owonde arituumuka ghateghate e riighoro.
Marayika uyo naare na Angʼana Anchömu e miishe ghyose e kuraghaneri abhaato bhano bhiikeere mo‑se,
kwo bhaato bha chaase choose,
na amatöngö ghoose,
ne ebhighambo bhyose na abhahiiri bhoose mo‑se ingima.
7 Mbe,
marayika uyo aghatiiri eriiraka,
akabhugha,
“Morisëngërë Eryobha na koreghongi,
gho kubha eriibhagha re ghotenera ekiina abhaato ˆrekahika.
Momusëngërë uno ꞉atëëmiri rishaaro,
na ase,
na anyancha,
ne ebherika bhe manche.”
8 Mbe,
marayika owonde akarööbhëra,
arabhugha,
“ˆOghagho!
Omoghya omokoro o Bhabheeri ˆoghagho!
Omoghya uno nuköriri abhaato bha matöngö ghoose bhanyo adivaayi yaache,
bhakarëëwu na amiigha gha bhutaari bhooche.”
9 Mbe,
hakarwera marayika owonde o ghatato,
akarööbhëra bhaare bhabhere bhano bhakangatiri.
Woose aghasiikëra kwo riiraka ikoro akabhugha,
“Aribha omooto arasëngëra oghotyenyi ghuyo na asanaamu yaache,
na ghotooreru ekingʼöchö mo‑bhosho hamu mo‑kubhökö,
10 omooto uyo woose naakunyo adivaayi e bhororo bho Ryobha.
Adivaayi iyo n‑indoro kinya amaro ghano ghatasangeriini na amanche.
Eryobha eryene ndekomwitoorerera omooto uyo mo‑ghisënchö ke bhororo bhooche,
anyo.
Eryobha ryose ndekomunyaaki mo‑mororo muhaari chwee ambërë e bhamarayika abhatööbhiyu na ambërë e Moona o Ngʼöndu.
11 Eryoki re mororo uyo uno okobhanyaaki,
ndeghotiira ighoro emiishe ghyose.
Abhaato bhayo bhataakubhöna obhuchömu obhotiko no omwishe,
gho kubha ꞉mbaasëngiire oghotyenyi ghuure na asanaamu yaache na ghotooreru eriina reeche.”
12 Ibheere abhatööbhiyu mbakwëndëru bhaghumereri.
Bhayo nibho bhaghöötiri emeghiro ghe Ryobha na komokumi Yesu.
13 Nekooghu eriiraka koru Mwishaaro,
rerabhugha,
“Andëka hangʼu,
korwera ibheere,
ngʼoni abhaato bhoose bhano bhakuure ino bharamokumi Omutëmi Yesu.”
Ekamara Akörö e Ryobha ekabhugha,
“Hee,
m‑mahëënë!
Bhatore koweera kurëngʼaana ne emeremo gheebho emiköngʼu,
gho kubha mbakubhöna atuho kwo maköri ghaabho amachömu.”
Omunöghö o se
14 Mbe,
nekarëkëra amiisho wiiki,
nekarighi erishaaro ryero.
Ighoro e rishaaro riyo naare ikeere omooto kinya Omoona o Mooto.
Omooto uyo naare abheekiri orohuuru ro ghitëmi ro sahaabhu a‑mutu.
Mo‑kubhökö kooche naare aghöötëriire eriighësö ryeghi.
15 Akamara marayika owonde akaru Mwisëngërö re Ryobha,
aghatiiri eriiraka akamobhoorera wuure are ikeere ighoro e rishaaro akabhugha,
“Toora eriighësö reecho ughësë,
gho kubha omunöghö o se yaacho numariri kohikeerana na bheghaköngʼa bhino bhekwëndëru bhighësu mo‑se.”
16 Niho uno are ikeere ighoro e rishaaro akarëkëra eriighësö reeche mo‑se,
aghaghësa omunöghö uyo o se ingima.
17 Akamara marayika owonde akaru Mwisëngërö re Ryobha iyo Mwishaaro.
Woose naare aghöötëriire eriighësö eryeghi.
18 Niho akarwera marayika owonde.
Marayika uyo akaru ahaghiro ha koruuseri amaruusi,
iwe naare ariimeererera omororo.
Aghatiiri eriiraka,
akamobhoorera marayika uno anyi ne eriighësö eryeghi akabhugha,
“Toora eriighësö reecho eryeghi,
onunge ebhisama bhe misabhiibhu ghe se,
gho kubha amakorobhese nganöghiri.”
19 Niho marayika uyo akarëkëra eriighësö reeche,
aghaghësa chasabhiibhu che se,
aghachetoora mo‑gheghiro ghekoro ghe ghochemitera.
Egheghiro kiyo ngekwërëki obhororo bho Ryobha.
20 Chasabhiibhu chekamitu mo‑gheghiro kiyo keere anche e moghya omokoro.
Chekaruusi amasaahë,
na amasaahë ghayo ghaakabha orooche rure.
Obhurë bhooche mboore chakiromeeta amaghana atato na rookabha no obhwina bho miita imu ne eriiteneka.