Oghotyenyi o ghumbërë
13
Nekamara nekarighi oghotyenyi ghumu,
ghorarwera mo‑nyancha.
Ngoore ne emitu mohungate na chahëmbë ikomi,
na kira ruhëmbë ndoore no orohuuru.
Wiiki kira omutu noore wandëkuru eriina re ghotoka Eryobha.
2 Oghotyenyi ghuyo ngoore ghotuubhiine na angwe,
amare amaghoro ghaache ngaare ghanga gha dubhu,
no omonu waache noore onga o ka.
Oghuchöka ghuyo ghookaha oghotyenyi changuru cheeche,
ne eghetumbe keeche ghe ghitëmi no obhotoro bhwaru.
3 Omutu umu o ghotyenyi ghuyo noore ne erighaati ibhe chwee rino rengaghëriri reku.
Amare erighaati riyo ndeere rihöriri!
Abhaato bhoose mo‑se bhakaroghoora chwee ighoro oghotyenyi ghuyo,
na ghoghutambana.
4 Wiiki bhaghasëngëra oghuchöka ghuyo,
gho kubha ngoheere oghotyenyi obhotoro bhooche bho ghukangata.
Oghotyenyi ghuyo ghoose bhaghaghusëngëra bharabhugha,
“Ghetaanyi‑ho ekende kinya oghotyenyi ghuno!
Wiiki,
ghetaanyi‑ho kino gheghotora kurööna nagho!”
5 Mbe,
oghotyenyi ghuyo ghokahaabhu obhotoro bho ghosiikëra amangʼana gha kwihacha na gha ghotoka Eryobha.
Wiiki ghokahaabhu obhotoro bho ghukangata emyëri miröngö ene ne ebhere.
6 Oghotyenyi ghuyo ghoghasëëma ghotoka Eryobha,
ne eriina reeche na ahaghiro hano reghwikara,
niko kobhugha,
bhyose bhino bhimanyiri Mwishaaro.
7 Ghoghiisherereru kurööna na abhatööbhiyu na kobhahicha.
Ghokahaabhu obhotoro bho ghukangata abhaato bha matöngö ghoose,
na bha abhahiiri bhoose na bha bhighambo bhyose na chaase choose.
8 Abhaato bhoose ase ingima mbaghoghusëngëra oghotyenyi ghuyo,
nanyinga abhaato bhano amariina ghaabho ghaandëkuru mo‑Ghitabhu ke Bhuhörua korwera hano ase ino ere ekeere ghutëëmu.
Eghitabhu kino n‑ke Moona o Ngʼöndu uno ꞉asinchuru.
9 Uno anyi na amatu,
atëghëërërë.
10 Omooto uno ꞉ëndiiru ghughöötu mwihë,
naghughöötu mwihë.
Omooto uno ꞉ëndiiru ghwitu ne ekinyamiino,
naghwitu ne ekinyamiino.
Ibheere abhatööbhiyu mbakwëndëru bhaghumereri na ghokumi.
Oghotyenyi gho kabhere
11 Nekamara,
nekarighi oghotyenyi oghonde ghoratiira koru mwiröbhë.
Oghotyenyi ghuyo ngoore na chahëmbë ibhere insuuhu kinya che gheghuruki,
amare eriiraka reeche ndeere kinya re ghuchöka.
12 Ghokahökëri obhotoro bhoose bho ghotyenyi ghuure o ghumbërë,
gho ghiri yaache.
Oghotyenyi ghuyo gho kabhere ghokahaamereri abhaato bhoose bha se bhaghusëngërë oghotyenyi ghuure o ghumbërë ghuno ghoore ne erighaati rino rengaghëriri reku,
amare ndeere rihöriri.
13 Oghotyenyi ghuyo gho kabhere ngoore ghuköriri ebhyërëkërëri bhe koroghoori,
koru ghoghaghëri omororo ghwika koru Mwishaaro mbagha mo‑se ino abhaato bharamööhërëri.
14 Kwo bhyërëkërëri bhino rihaabhuru ghuköra gho ghiri e ghotyenyi ghuure o ghumbërë,
ghokabhangʼiina bhano bhataare bharakumi mo‑se.
Ghokabhabhoorera abhaato bhabhaache asanaamu e ghosooka oghotyenyi ghuure o ghumbërë ghuno ghunyahaaruru ne ekinyamiino,
amare ghökëëndërëra kubha ghuhöru.
15 Mbe,
oghotyenyi ghuyo gho kabhere ghokahaabhu obhotoro bho kohuuteri omwika o bhuhöru mo‑sanaamu kubha etore ghosiikëra na ghughëri bhiitu abhaato bhano ꞉bhaangiri koyisëngëra.
16 Oghotyenyi ghuyo gho kabhere ghokahaamereri abhaato bhoose,
bha myeya emekoro ne emesuuhu,
abhaame na abhahabhe,
na bhano bhaanyi no obhohuuru na abhasësë,
bhatooru ekingʼöchö mo‑kubhökö gho kwiro hamu mo‑bhosho.
17 Omooto wowoose taaghotora ghoghora hamu ghoghori egheghiro ghyokyose kiire aribha otatoriiru ekingʼöchö.
Ekingʼöchö kiyo n‑eriina re ghotyenyi ghuure o ghumbërë,
hamu n‑omubharo o bhingʼöchö bhe riina reeche.b
18 Angʼana ino nekwëndëru amangʼiini.
Uno anyi no obhongo,
abhare omubharo o ghotyenyi ghuyo,
gho kubha n‑omubharo o riina re mooto nyarebhe.
Omubharo waache n‑amaghana asaasabhe na miröngö esaasabhe ni ishaasabhe (666).