Omukari no oghuchöka
12
Hakamara,
iyo mwighoro hakarwera ekyërëkërëri ghe koroghoori chwee.
꞉Haare no omukari uno abheekuru eryobha,
no omwëri noore haase e maghoro ghaache.
Wiiki,
mo‑mutu waache naare abheekiri orohuuru ro ghitëmi roonyi na chanchöta ikomi ni ibhere.
2 Omukari uyo n‑inda are,
anda neere eramure koru akabha ararera kwo bhosongo bho kwibhora.
3 Hakamara,
iyo mwighoro hakarwera ekyërëkërëri ekende ghe koroghoori.
Mööhi!
Ghokarwera‑ho oghuchöka oghokoro ghubhararatu.
Ngoore ne emitu mohungate na chahëmbë ikomi,
na kira omutu noore obheekiri orohuuru.
4 Omokera o ghuchöka ghuyo,
okangʼuura imu ghwi ishato e chanchöta choose na ghoghachirëkëra mo‑se.
Oghuchöka ghuyo ghokiimeerera ambërë e mukari uno are arëënda kwibhora,
kubha araacha kwibhora,
remure omoona uyo.
5 Akamara omukari uyo akiibhora omoona o ghesiite.
Omoona uyo nakuucha ghukangata amatöngö ghoose gha se kwo himbo e kyoma.
Amare hano oghuchöka ghuyo ghoore ghokeere komure,
omoona uyo aghasaru,
akahiru kwo Waryobha na mo‑ghetumbe keeche ghe ghitëmi.
6 Omukari uyo akangʼösëra mwibhara,
ahaghiro hano Eryobha reere remusëëmiire kubha remotughe hayo gho chaasiko egheku kimu na amaghana ebhere na miröngö esaasabhe (1,260).
7 Niho hakarwera eriihë Mwishaaro.
Marayika omokoro,
uno akobherekeru Mikayeri,
haghirohamu na bhamarayika bhaache,
bhakarööna no oghuchöka ghuyo na bhamarayika bha ghuchöka.
8 Amare oghuchöka na bhamarayika bhaache bhakahichu na kuhëëbhu koru Mwishaaro.
9 Oghuchöka ghokarëkëru mo‑se.
Ghuno nigho oghuchöka ghuure gho kare ghuno ghokobherekeru Ibhiriisi hamu Erishambu.
Ngokongʼiina abhaato bhoose mo‑se.
Mahëënë ngurëkiiru mo‑se haghirohamu na bhamarayika bhaache.
10 Mbe,
nekooghu eriiraka ikoro koru Mwishaaro rerabhugha,
“Ibheere,
Eryobha riito ˆreghatoori abhaato bhaache.
Ndihökiiri obhotoro bhooche
ghusëëmi obhutëmi bhooche!
Kirisito woose nëërëkiri obhotoro bhooche,
gho kubha omusëmi o bhakumi bhaghëndi bhiito
narëkiiru haase,
uno akobhasëma ambërë e Ryobha
obhotiko no omwishe.
11 Ibheere abhakumi bhaghëndi bhiito
mbamohichiri kwo masaahë gha Moona o Ngʼöndu,
na kwo ngʼana e bhwibhateri bhoobho,
mbamohichiri.
Bhatatereeriri eriimanya reebho,
mbaare bhiisëëmiri ghoku
gho ghiri e komokumi Omoona o Ngʼöndu.
12 Gho ghayo,
muchömëru,
inyu bhoose bhano mumanyiri
iyo ighoro Mwishaaro!
Amare horeera mokorighi inyu bhoose
bhano mumanyiri mo‑se na mo‑nyancha,
gho kubha Erishambu ndirëkiiru haase ghate yaanyu.
Ndikariire chwee,
gho kubha ndyeche
chaasiko cheeche n‑insuuhu.”
13 Hano oghuchöka ghorooche ghokarëkëru mo‑se,
ghoghasëëma komobhyema omukari uno are ibhwire omoona o ghesubhe.
14 Amare Eryobha rekamuha omukari uyo amabhabha abhere ghanga gha matoonyi inkoro,
kubha ituumuke ghuye iyo mwibhara ahaghiro hano Eryobha reere remusëëmiire,
abhe kurë no oghuchöka ghuyo.
Iyo Eryobha ndekomotugha gho chaasiko egheku kimu na amaghana ebhere na miröngö esaasabhe (1,260).
15 Mbe,
oghuchöka ghuyo ghoghatu amanche maaru kinya orooche koru mo‑monu waache,
kubha omukari uyo ahiru na amanche ghayo.
16 Amare ase ekamusakeri omukari uyo.
Ase eghaateka kinya omonu,
ekamera amanche ghoose ghano ꞉ghaare koru mo‑monu o ghuchöka ghuyo.
17 Oghuchöka ghuyo ghokamukararera chwee omukari uyo,
ghooghaye kurööna na abhaana bhaache abhande bhano bhasaaghiri mo‑se.
Abhaana bhayo nibho bhano bhaghosooka emeghiro ghe Ryobha na koruusi obhwibhateri ighoro Yesu.
18 Mbe,
oghuchöka ghuyo ghokiimeerera rubhareka ro nyancha.