Abhiibhateri bhabhere bha Ryobha
11
Nekamara,
nekahaabhu amoori e kurëngëra enga kinya ahimbo.
Nekabhooreru kubha,
“Nooghi urëngë Erisëngërö re Ryobha na ahaghiro ha koruuseri amaruusi.
Wiiki ubhare abhaato bhoose bhano bhaghusëngëra‑mu.
2 Amare otarëngi eriigho re Risëngërö riyo,
gho kubha mbahaabhuru abhaato bha matöngö.
Ibho mbaghutacha omoghya omutööbhiyu o Yerusareemu kwo riibhagha re myëri miröngö ene ne ebhere.
3 Eni nekobhatoma abhiibhateri bhaane bhabhere,
nekobhaha obhotoro bho koruusi obhurööti chaasiko egheku kimu na amaghana ebhere na miröngö esaasabhe (1,260),
mbaakubha bhabheekiri changibho che maghönëra kwërëki amacheeche.”
Chaasiko chiyo n‑kinya eriibhagha re myëri miröngö ene ne ebhere.
4 Abhiibhateri bhayo bhabhere n‑emete ebhere ghe miseyituuni ne ebheghiro bhibhere bhe ghotoorera ebhemore bhino bhehaabha ambërë e Mutëmi Waryobha uno aghukangata ase.a
5 Omooto wowoose arëënda kobhanyahaara,
naghwitu no omororo uno okoru mo‑menu gheebho na kobhiita abhabhisa bhaabho.
Hangʼu nibhu aghoku omooto wowoose uno akwënda kobhanyahaara.
6 Abhiibhateri bhayo bhabhere mbaanyi no obhotoro bho kuhööchërëra eriighoro,
kubha ambura etatëëka eriibhagha rino bhaakubha bhararuusi obhurööti bhoobho.
Wiiki eriibhagha ryoryose rino bhakwënda,
mbaghotora ghugharura amanche kubha amasaahë na kurëëta chanaabhi che manga ghoghoose hano mo‑se.
7 Hano bhakumara kuraghani angʼana e Ryobha,
atyenyi inkoro yiire ino etiiriri koru mwirooma re mashambu,
b nekurööna nabho.
Nekobhahicha na kobhiita.
8 Amahundughu gha abhiibhateri bhayo ngaghusaagha mo‑nchëra e moghya omokoro.
Niwe omoghya uno Omutëmi waabho amamburu mo‑musarabha.
Omoghya uyo noonyi na atëëmö kinya e moghya o Sotoma na ase e Miisiri.
9 Abhahiiri bhoose,
na abhaato bha matöngö ghoose,
na bha bhighambo bhyose,
na bha chaase choose,
mbaghoghamööhërëri amahundughu gha bhiibhateri bhayo bhabhere gho chaasiko ishato ne eriiteneka.
Taanyi‑ho omooto uno aghwisherereru kobharyeka.
10 Oroko ro bharööti bhayo bhabhere,
ndoghuköra abhaato bhano bhataakorekumi Eryobha mo‑se bhachömëru na ghuköra obhughëni na kuhaanana chaatuho.
Mbaghuköra hangʼu,
gho kubha abharööti bhayo ꞉mbaabhirighwiri chwee.
11 Hano chaasiko chiyo ishato ne eriiteneka chehetiri,
Eryobha rekabhahuuteri omwika o bhuhöru,
bhaakabha abhahöru,
bhakiimeerera.
Bhoose bhano ꞉bhaabharooche,
bhaghatiina chwee.
12 Bhakamara,
abhiibhateri bhayo bhabhere bhakooghu eriiraka ikoro koru Mwishaaro rerabhugha,
“Muuche ino ighoro!”
Bhoose bhaghituumuka ghuye Mwishaaro bhiinaariiru ne erishaaro,
ino abhabhisa bhaabho bharabhamööhërëri.
13 Mo‑riibhagha riyo riyo,
ase ekarighitera chwee,
eriiteneka rimu ghwi ikomi re moghya reghasarëka.
Ekerighito kiyo,
gheghaghëri abhaato ebheku mohungate (7,000) bhaaghaku,
na abhande bhoose bhano bhasaaghiri bhaghatiina chwee,
bhakareghongi Eryobha re Mwishaaro.
14 Mbe,
anaabhi e kabhere ˆekaheta,
amare mumënyë kubha anaabhi e ghatato ˆeghatingʼi kuucha.
Marayika o mohungate ˆaghatëma antaara yaache
15 Akamara,
marayika o mohungate aghatëma antaara yaache.
Nekamara nekooghu eriiraka ikoro iyo Mwishaaro rerabhugha,
“Obhukangati bho se mbughööturu
no Omutëmi Waryobha wiito,
na Kirisito waache uno amwahwire ghotoori abhaato.
Iryo ndeghukangata emiishe ne emiishe.”
16 Niho abhagharuka miröngö ebhere na bhane bhano ꞉bhaare bhiikeere mo‑bhetumbe ambërë e Ryobha,
bhaaghagho kebhuuma,
bhakarisëngëra Eryobha,
bharabhugha,
17 “ˆOghachömi Omutëmi Waryobha o Bhotoro Bhoose.
꞉Noore‑ho korwera simoka,
na koru ibheere niho onyi.
Nuhökiiri obhotoro bhoocho bhokoro,
ni ibheere noghukangata ase ingima.
18 Abhaato bhano bhataaghoghokumi ꞉mbaakurëghiri,
amare eriibhagha re korehani asiire ˆrekahika.
Ibheere n‑eriibhagha re ghoteneru ekiina
abhaato bhano bhakuure.
Niryo eriibhagha re kobhatuha
abhatamishi bhaacho abharööti,
na abhatööbhiyu bhaacho bhoose bhano bhaghosookiri,
bha myeya emekoro ne emesuuhu.
Rino niryo eriibhagha re ghusari
abhaato bhoose bhano bhaghusari ase.”
19 Niho eghisëku ghe ghusöhëra Mwisëngërö re Ryobha iyo Mwishaaro gheghiighoru.
Erisandëkö re Riiraghano re Ryobha rekarighibhu mo‑nyumba iyo.
Nekarighi orunanehi rorabhari,
na nekooghu eriiraka,
na haakabha ne ekerighito ghe se.
Ambura inkoro e rihoorere eghatëëka chwee.