Marayika uno anyi ne eghitabhu eghesuuhu
10
Hano ghayo ghahetiri,
nekarighi eriirighi erende.
꞉Neerooche marayika owonde uno anyi no obhotoro ariika koru Mwishaaro.
Marayika uyo naare akundekiiru na amashaaro,
ni ighoro e mutu waache ꞉haare ne eriite re bhaasi.
Obhosho bhooche mboore bhorarëngaari kinya eryobha,
na amaghoro ghaache ngaare kinya chambiro chino cheghwaka omororo.
2 Naare ne eghitabhu eghesuuhu mo‑kubhökö kino keere kehunywiru.
Akiimeereri oghoghoro kooche gho kwiro mo‑nyancha na gho kumosi mo‑se ayoomu.
3 Akabherekera kwo riiraka ikoro kinya re ka ino eghwitima.
Hano marayika abherekiire,
ekerumo ghekamugharokeri gho koruma mara mohungate.
4 Hano ebherumo mohungate bhiyo bhigharokiiri,
nëkëënda kwandëka ghano ꞉ghaasiikiiru ne ebherumo,
amare nekooghu eriiraka koru Mwishaaro reramboorera rerabhugha,
“Amangʼana ghayo gha bherumo,
otaghaandëka!
N‑ekebhisere!”
5 Akamara marayika uyo are imeeriiri oghoghoro kumu mo‑nyancha no okonde mo‑se ayoomu,
aghaghöröröki okubhökö kooche gho kwiro kwërëkëra Mwishaaro.
6 Akaraheri kwo riina re Ryobha rino reenyi ihöru emiishe ne emiishe,
rino ꞉riitëëmiri erishaaro,
na ase,
na anyancha na ebhetyenyi bhyose bhino bheenyi‑mu.
Marayika akabhugha,
“Eriibhagha re ghughanya reghiisha.
7 Hano marayika o mohungate akuucha ghutëma antaara yaache,
Eryobha ndekohikeerani obhorwachi bhooche bho kebhisere.
Ngakohikeerana kinya abharaghaniiri abhatamishi bhaache abharööti.”
8 Niho eriiraka riire koru Mwishaaro rekamberekera wiiki,
rekabhugha,
“Nooghi kwo marayika uno imeeriiri oghoghoro gho kwiro mo‑nyancha no okonde mo‑se ayoomu.
Wimoki koru mo‑kubhökö kooche eghitabhu kiire eghesuuhu kino kehunywiru.”
9 Mbe,
neeghaye kwo marayika uyo,
nekamobhoorera ahë eghitabhu kiyo eghesuuhu,
nawe aghangarokeri akabhugha,
“Ghakino hano!
Kiimoki ori.
Mo‑monu waacho ngeghuchömëërëra kinya obhooke,
amare mo‑nda ngeekubha keroro kayi.”
10 Nekiimoki eghitabhu kiyo eghesuuhu koru mo‑kubhökö kwo marayika uyo,
neekare.
Mo‑monu waane,
nkeere ghichömëërëru kinya obhooke,
amare hano kehikiri mo‑nda ghekarora kayi.
11 Nekabhooreru kubha,
“Nokwëndëru koruusi obhurööti wiiki ighoro e bhaato bhaaru,
na chaase chaaru,
ne ebhighambo bhyaru na abhatëmi bhaaru.”