Marayika o ghataano ˆaghatëma antaara yaache
9
Akamara,
marayika o ghataano woose aghatëma antaara yaache.
Hayo nekarighi anchöta ino ere yiikiri koru Mwishaaro,
na ghugho mo‑se.
Ekahaabhu orohunguro ro mwirooma re mashambu.a
2 Eghiighora eriiribha riyo.
Rekarwera‑mu eryoki ryaru kinya re riinata ikoro.
Koru eryobha ne eriighoro bheekabha bhetaakorighibhu gho ghiri e ryoki re mwiribha riyo.
3 Hakamara mo‑ryoki riyo hakarwera‑mu changighe,
cheghasancha mo‑se.
Chekahaabhu obhotoro bho koroma kinya eghitaamooni.
4 Changighe chiyo ꞉nchiihatëkuru chetasari amanyaaki hamu amato,
hamu emete.
Amare chebhanyaaki abhaato bhano bhataare no omohuuri o Ryobha mo‑bhosho bhoobho.b
5 Changighe ꞉nchihaabhuru obhotoro bho kobhanyaaki abhaato kwo myëri etaano,
amare chetabhiita.
Obhororo bhoobho mboore kinya obhosongo bho koromu ne eghitaamooni.
6 Chaasiko chiyo abhaato mbakobhugha ngʼoni ghoku,
amare bhataaghoku.
Mbaghwighomba ghoku,
amare oroko ndokobhangʼösa.
7 Changighe chino ncheere kinya chabharaasi chino cheere chisëëmuru ghuye mwihë.
Mo‑mitu gheebho nchebheekiri ebheghiro kinya chahuuru che sahaabhu,
na mo‑bhosho bhoobho ncheere chetuubhiine no obhosho bho bhaato.
8 Ncheere na chanchweri indë kinya che bhakari.
Ncheere na amiino kinya gha ka.
9 Ncheere chebheekiri mo‑bhekubha changubha kinya che bhyoma.
Hano cheere cherituumuka,
amabhabha ghaabho ngaarumiri kinya eriiraka re chamontoka chaaru che chabharaasi chino chekoyaara ghuye mwihë.
10 Emekera gheebho ngeere gheraroma kinya bhuure eghitaamooni,
na ngeere no obhosongo bho kobhanyahaara abhaato kwo myëri etaano.
11 Ncheere no omutëmi uno are marayika omokoro o rirooma re mashambu.
Marayika uyo gho Kebhuraaniya nakobherekeru Abhatooni na gho Keyunaani nakobherekeru Abhoriyooni,
egheteemoro keeche “n‑Omosireekereri.”
12 Mbe,
anaabhi a yimbërë ekaheta,
amare mumënyë kubha chekeere chanaabhi ibhere chino chekuucha.
Marayika o ghasaasabhe ˆaghatëma antaara yaache
13 Akamara,
marayika o ghasaasabhe aghatëma antaara yaache.
Nekooghu eriiraka koru mo‑chambaara chiire inye che haghiro ha koruuseri amaruusi hano ꞉haaköruru gho sahaabhu hano haanyi ambërë e Ryobha.
14 Eriiraka riyo rekamobhoorera marayika uyo o ghasaasabhe uno are aghöötëriire antaara,
rerabhugha,
“Nobhiighorere bhamarayika bhayo bhane bhano bhabhöhuru rubhareka ro rooche orokoro ro Ebhuraati.”
15 Bhamarayika bhayo bhane bhaghiighoreru,
kubha bhiite imu ghwi ishato e bhaato bhoose bha mo‑se.
Mbaare bhasëëmuru gho sa iyo iyo,
e rosiko ruyo ruyo,
ro mwëri uyo uyo ro mooka uyo uyo.
16 ꞉Haare na abhakëëya bhaaru bhano ꞉bhaare bhatiiriri chabharaasi.
Nekooghu kubha omubharo waabho noore chamiriyooni amaghana abhere (200,000,000).
17 Mo‑marighi ghaane,
꞉neerooche chabharaasi chiyo na bhano ꞉bhaare bhachetiiriri.
Mbaare bhabheekiri changubha mo‑bhekubha,
changubha chiyo ncheere che range ambararatu,
no obhuruuru na manchana.
Nekarighi emitu ghe chabharaasi ngeere kinya emitu ghe chaaka.
Mo‑menu gheebho,
hakarwera emirëngaari ghe mororo,
ne eryoki na amabhohe gha kebhiriiti ghano ghaghwaka.
18 Bhaghiita eribhaara rimu ghwi ishato re bhaato gho chanaabhi ishato.
Chanaabhi chiyo ishato nicho emirëngaari ghe mororo,
ne eryoki na amabhohe gha kebheriiti ghano ghaghwaka koru mo‑menu gheebho.
19 Obhotoro bho chabharaasi chiyo mboore mo‑menu,
na mo‑mekera gheebho,
gho kubha emekera gheebho ngeere kinya chanchöka chino cheenyi ne emitu ghe kunyahaara abhaato.
20 Abhaato bhano bhataakuure gho chanaabhi chino ꞉cheebhabhwine abhaghëndi bhaabho,
bhataatuukuuniire amabhe ghaabho.
꞉Mbëëndëriire ghusëngëra emisambu na chasanaamu chino ꞉bhaaköriri abheene gho sahaabhu,
na chambiiri,
na ashabha,
na amabhohe,
ne emete.
Chasanaamu chiyo chetaare cherarighi,
koru kooghu,
koru ghughënda.
21 Bhatatuukuuniire ghwitana koobho,
no obhoturutumbi bhoobho,
no obhutaari bhoobho no obhwibhi bhoobho.