Omoona o Ngʼöndu ˆakanaanura omohuuri o nyaghame o mohungate
8
Akamara,
Omoona o Ngʼöndu akanaanura omohuuri wuure o nyaghame o mohungate,
iyo Mwishaaro haakabha hakiriri kiri eriibhagha kinya re riiteneka re sa imu.
2 Nekamara nekarighi bhamarayika bhaare mohungate bhahiimeerera ambërë e Ryobha,
na kira umu akahaabhu antaara.
3 Marayika owonde akaacha,
akiimeerera ambërë e haghiro ha koruuseri amaruusi.
Naare aghöötëriire eghetibha ghe sahaabhu ghe ghoghunderi akorose.
Akahaabhu akorose yaaru kubha asangerani na amasabhi gha bhatööbhiyu,
ayeruusi ighoro e haghiro ha koruuseri amaruusi gha sahaabhu,
hano haanyi ambërë e ghetumbe ghe ghitëmi.
4 Niho eryoki re korose haghirohamu na amasabhi gha bhatööbhiyu bheghatiira ighoro ambërë e Ryobha koru mo‑kubhökö kwo marayika uyo.
5 Akamara,
marayika uyo akiimoki eghetibha keeche,
aghiichori amakara gha mororo koru ahaghiro ha koruuseri amaruusi,
aghagharëkëra mo‑se.
Nekarighi orunanehi rorabhari,
na nekooghu eriiraka,
na haakabha ne ekerighito ghe se.
Bhamarayika bhane ghate e mohungate ˆbhaghatëma chantaara cheebho
6 Bhakamara bhamarayika bhayo mohungate bhano ꞉bhaare na chantaara mohungate,
bhaghisëëmi ghutëma chantaara cheebho.
7 Marayika o mumbërë aghatëma antaara yaache.
Hayo ambura e rihoorere no omororo bhisangeriini na amasaahë bhekarëkëru mo‑se.
Omororo uyo ogheeki imu ghwi ishato e se,
oghasireekereri emete,
na amanyaaki amabhese.
8 Marayika o kabhere woose aghatëma antaara yaache.
Hayo egheghiro kinya egheghoro ghekoro chwee kino gheghwaka omororo,
ghekarëkëru mo‑nyancha.
Eriiteneka rimu ghwi ishato re nyancha reghiigharura reekabha amasaahë.
9 Mo‑riiteneka riyo re nyancha,
ebheghiro bhyose bhino ꞉bhiitëëmuru bheeghaku‑mu,
eriiteneka rimu ghwi ishato re chameeri cheghasarëka inkongʼorimu.
10 Marayika o ghatato woose aghatëma antaara yaache.
Hayo anchöta inkoro chwee eghagho koru Mwishaaro.
Neere eraaka kinya oromore,
yoose eghagho ahaghiro ha riiteneka rimu ghwi ishato re bhitaaro ni ighoro e bherika bhe manche.
11 Anchöta iyo neere erabherekeru Obhororo.
Eghagharura eriiteneka rimu ghwi ishato re manche ghaakabha maroro kayi.
Mbe,
abhaato bhaaru bhaaghaku,
gho kubha amanche m‑maroro ꞉ghaare.
12 Marayika o kane woose aghatëma antaara yaache.
Eriiteneka rimu ghwi ishato re ryobha,
na re mwëri na re chanchöta bheghatëmu,
haakabha ne ekengʼuuri.
Eriiteneka rimu ghwi ishato re mwishe reghatigha kurëngaari ne eriiteneka rimu ghwi ishato re bhotiko rekabhori obhwero.
13 Nekamara nekarighi amatoonyi inkoro eriibhururuka ghateghate e riighoro.
Neere eraköra eriireghe erabhugha,
“Horeera mokorighi!
Horeera mokorighi!
Horeera mokorighi inyu bhano moghwikara mo‑se,
hano cheghutëmu chantaara chiire ishato chino chisaaghiri.
Bhamarayika bhayo ibheere mbamariri ghwisëëmi ghochitëma!”