Abhaato bha Ryobha ˆbhaghatooru omohuuri
7
Hano ghayo ghahetiri,
nekarighi eriirighi erende.
Nekarighi bhamarayika bhane,
kira marayika imeeriire eribhaara rimu re chambaara inye che se.
Nabho mbaare bharahööchërëra obhukama koru chambaara inye che se,
kubha bhotahuuta kuucha ase ayoomu,
hamu ghuye mo‑nyancha,
hamu ghosughuta omote wowoose.
2 Bhamarayika bhayo mbaare bhahaabhuru obhotoro bho ghusari ase ayoomu na anyancha.
Nekamara,
nekarighi marayika owonde aratiira ighoro koru roghoro aghëghiri omohuuri o Ryobha rino reenyi ihöru.
Aghatiiri eriiraka akabhabhoorera bhamarayika bhayo bhane
3 akabhugha,
“Mughanye!
Motasari ase ayoomu,
na anyancha hande emete,
mbagha totoore omohuuri mo‑masho gha bhatamishi bhoose bha Ryobha riito.”
4 Nekamara nekabhooreru omubharo o bhaato bhano ꞉bhaare bhatoriiru omohuuri o Ryobha mo‑masho.
Omubharo waabho noore ekirara kimu ne ebheku miröngö ene na bhane (144,000) koru mo‑matöngö ghoose ikomi na abhere gha Abhiisiraeri,
5 kira itöngö,
abhaato ebheku ikomi na bhibhere (12,000).
Amatöngö ghayo nigho ghano,
Yuuta,
na Rubheeni,
na Ghaati.
6 Asheeri,
na Nabhutaari,
na Manase.
7 Simiyooni,
na Raawi,
na Isakaari.
8 Sabhurooni,
na Yusubhu,
na Bhenchamiini.
Erikinda ikoro re bhaato bha matöngö aghande
9 Hano ghayo ghahetiri,
nekarighi eriirighi erende.
Nekarighi erikinda ikoro re bhaato rino retaare reratoru kubharu.
Abhaato bhayo mbaare bha chaase choose,
na bha matöngö ghoose,
na abhahiiri bhoose na bha bhighambo bhyose.
Bhiimeeriire ambërë e ghetumbe ghe ghitëmi,
na ambërë e Moona o Ngʼöndu.
Bhabheekiri chandachana cheero na mbaare bhaghöötëriire amato gha mitëndë.
10 Bhaakabha bharatiiri amaraka bharabhugha,
“Obhotoori mbookoru kwo Waryobha wiito,
uno ikeere mo‑ghetumbe ghe ghitëmi,
na kwo Moona o Ngʼöndu.”
11 Bhamarayika bhoose mbaare bhiimeeriire bhiinaariiri eghetumbe ghe ghitëmi,
na abhagharuka bhaare miröngö ebhere na bhane ne ebhetyenyi bhiire bhine.
Bhoose bhaaghagho kebhuuma ambërë e ghetumbe kiyo,
bhakarisëngëra Eryobha,
12 bharabhugha,
“Hawubhaabha!
Eryobha riito ndeenyi no obhokumi obhokoro,
na ndeenyi na amangʼiini,
wiiki ndeenyi no obhotoro na changuru choose,
toreghongi,
toriitabheri,
toresooke,
emiishe ne emiishe.
Hawubhaabha!”
13 Akamara,
umu o bhagharuka bhaare akamboori,
“Weeche abhaato bhayo bhabheekiri chandachana echeero m‑bhawe?
Weeche hayi bharweriire?”
14 Nekamugharokeri nekabhugha,
“Oo omutëmi waane,
iye niiye weeche.”
Akamboorera akabhugha,
“Abhaato bhayo mbakindiri anyaako yiire ankoro.
꞉Mbaahuriri chandachana cheebho kwo masaahë gha Moona o Ngʼöndu,
cheekabha cheero chayi.
15 Nikyo bhaanyi ambërë e ghetumbe ghe ghitëmi ke Ryobha.
Mbakomuhökëri obhotiko no omwishe Mwisëngërö reeche.
Naryo Eryobha rino riikeere mo‑ghetumbe keeche ghe ghitëmi,
ndeekubha haghirohamu nabho na kobhachonga.
16 Nabho bhataakubha na anchëra koru anyööta wiiki,
hamu bhataaghutëmu no omu muhaari,
hamu ghwekibhu no obhotuuku bhobhoose.
17 Neekubha hangʼu gho kubha,
Omoona o Ngʼöndu uyo anyi haghuhe ne eghetumbe ghe ghitëmi naakubha omoriishi waabho.
Nakobhakangata bhoose ghuye haghuhe ne ebherika bhe manche gha bhuhöru.
Naryo Eryobha ndekobhatareki changishori cheebho.”