Omoona o Ngʼöndu ˆakanaanura emehuuri ghe nyaghame
6
Nekamara nekarighi Omoona o Ngʼöndu aranaanura omohuuri wuure o nyaghame o mumbërë mo‑mehuuri ghiire mohungate.
Achekumara eghetyenyi kimu ghate e bhiire bhine,
ghekaruusi eriiraka kinya re runanehi,
kerabhugha,
“Nuuche!”
2 Niho nekarighi abharaasi ayeero hayo.
Mbe,
uyo are ayetiiriri naare aghöötëriire obhuta,
wiiki naare ahaabhuru orohuuru ro ghitëmi.
Akaru Mwishaaro anyi omokindi o riihë,
wiiki kubha ëndërërë ghokinda.
3 Akamara Omoona o Ngʼöndu akanaanura omohuuri o nyaghame o kabhere,
nekooghu eghetyenyi kiire ghe kabhere kerabhugha,
“Nuuche!”
4 Hakarwera abharaasi ayende imbararatu piri.
Mbe,
uno are ayetiiriri,
akahaabhu ekinyamiino ghekoro no obhotoro bho kurëëta eriihë mo‑se,
kubha abhaato bhiitane.
5 Akamara Omoona o Ngʼöndu akanaanura omohuuri o nyaghame o ghatato,
nekooghu eghetyenyi kiire ghe ghatato kerabhugha,
“Nuuche!”
Nekarëkëra amiisho,
nekarighi abharaasi yiirabhuru tuyi.
Mbe,
uno are ayetiiriri,
naare na akiro mo‑kubhökö kooche.
6 Nekooghu egheghiro kinya eriiraka,
rerarwera ghateghate e bhetyenyi bhiire bhine,
rerabhugha,
“Amareho gha mwishe moghima ngaghoghora akiro imu e bhotu bho ngano,
hamu chakiiro ishato che bhotu bho shayiri.
Amare otasari amaghuta hamu adivaayi.”
7 Mbe,
Omoona o Ngʼöndu akanaanura omohuuri o nyaghame o kane,
nekooghu eghetyenyi kiire ghe kane kerabhugha,
“Nuuche!”
8 Niho nekarëkëra amiisho nekarighi abharaasi e range ambusuku.
Mbe,
uno are ayetiiriri naare arabherekeru Oroko,
wiiki Nyaari ꞉haare haramoru anyuma yaache.
Nabho bhakahaabhu obhotoro bho ghwita imu kwi inye e bhaato mo‑se,
kwo riihë,
na gho gheecha,
na kwo mabhabharu na gho chatyenyi chahaari chi ibhara.
9 Mbe,
Omoona o Ngʼöndu akanaanura omohuuri o nyaghame o ghataano,
nekarighi chaakörö che bhaato cheenyi mwirungu re haghiro ha koruuseri amaruusi.
Bhayo n‑chaakörö chiire che bhaato bhano ꞉bhaanunguru emitu gho kuraghani angʼana e Ryobha na koruusi obhwibhateri ighoro e Yesu.
10 Niho chaakörö chiyo,
cheghaköra eriireghe cherabhugha,
“Oo Omutëmi,
Omutööbhiyu no Omuhëënë,
ngwake ˆoghakëëchëra!
Nyingake oghotenera ekiina abhaato bha se na korehani asiire e ghotwita?”
11 Niho bhoose bhano ꞉bhiituru,
bhakahaabhu chandachana echeero.
Bhakabhooreru kubha bhaghanye kwo riibhagha ighuhe,
mbagha abhahiiri bhaabho,
abhatamishi abhaghëndi bhaabho,
bhiitu kinya ibho ꞉bhiituru,
kubha omubharo waabho ohikeerane.
12 Nekamara nekarighi Omoona o Ngʼöndu aranaanura omohuuri o nyaghame o ghasaasabhe.
Hano ananwire,
ghekarwera ekerighito ghekoro chwee ghe se.
Eryobha reghiigharura arange,
reekabha riirabhuru tuyi ke makara,
no omwëri okabha mubhararatu piri ke masaahë.
13 Chanchöta cheeghagho kinya bhuure amakorobhese ghano ghataköngʼiri ghahaaröcha eriibhagha omote ohasingisu no obhukama bhuhaari.
14 Eriighoro reghakunyu kinya erishëërö rehaakunyu.
Ebheghoro bhyose ne ebheghinga bhe mo‑nyancha bhyose bhekaruusibhu koru ahaghiro haabho.
15 Niho abhatëmi bha se,
na abhakoro,
na abhantomonkoro bha riihë,
na abhaame,
na abhaato bhano bhaanyi ne emyeya,
haghirohamu na abhaato bhoose abhande,
ibhe n‑abhasësë hamu bhano bhataanyi abhasësë,
bhoose bhakiibhisa mo‑chakoobho na mo‑matare gha mo‑bheghoro.
16 Bhakabhebhoorera ebheghoro bhiyo na amatare,
“Motoghwere!
Motobhise kubha wuure ikeere mo‑ghetumbe ghe ghitëmi ataacha ghotwibhönëërëri.
Motobhise,
totaacha korighi obhororo bho Omoona o Ngʼöndu.
17 Ibheere,
orosiko ruure orokoro ro bhororo bhuhaari,
koru kwo Waryobha no Omoona o Ngʼöndu rokahika!
Kwo bhuhëënë taanyi‑ho wowoose uno aghotora koroghumereri.”