Okumënya ameeghi gha bhuröngö na gha mahëënë
4
Abhasiighani bhaane,
motamokumi omooto woose uno akobhugha naanyi na Akörö e Ryobha.
Amare mumööhi bhoheene aribha omooto uyo naghukangatu na Akörö e Ryobha hamu tiyaanyi.
Nekwëndëru mumööhi gho kubha abharööti bhaaru bha bhuröngö mbarweriire mo‑se.
2 Anchëra e kumënya kubha omooto uno naghukangatu na Akörö e Ryobha niyo ino,
wowoose uno aghokumi kubha Yesu Kirisito ꞉niichiri mo‑se akabha no omobhere kinya omooto,
uyo niwe aghukangatu na Akörö e Ryobha.
3 Amare uno ataakomokumi Yesu,
taaghukangatu na Akörö e Ryobha.
Omooto uyo naghukangatu na akörö e mobhisa o Kirisito.
Na niinyu,
mooghwire kubha akörö iyo nekuucha,
ni ibheere nimariri kuucha mo‑se ino.
4 Amare abhaana bhaane abhasiighani,
inyu n‑abhaato bha Ryobha moonyi na mobhakindiri abhaato bhayo bha bhuröngö.
Motoriri kobhakinda gho kubha,
Akörö e Ryobha neenyi moose yaanyu.
Iyo neenyi no obhotoro ghokera akörö e Rishambu,
ino eghukangata abhaato bhano bhataakorekumi Eryobha.
5 Abharööti bhayo bha bhuröngö m‑bha mo‑se ino.
Gho ghayo,
mbaghosiikëra mangʼana gha mo‑se.
Abhaato bha mo‑se bhano bhataakoresooka Eryobha,
mbahaabhatëghëërëra.
6 Amare itu n‑abhaato bha Ryobha toonyi.
Wowoose uno aryeche Eryobha,
naghotutëghëërëra,
amare uno ataanyi o Ryobha,
taaghotutëghëërëra.
Hangʼu niho tokumënya obhwahukani bho bhaato bhano bhaghukangatu na Akörö e hëënë,
na bhano bhaghukangatu na akörö e bhuröngö.
Obhosiighi bho Ryobha
7 Abhasiighani bhaane,
tosiighane,
gho kubha obhosiighi mbookoru kwo Waryobha.
Omooto wowoose uno asiighiri mughëndi waache,
n‑omoona o Ryobha,
wiiki niwe aryeche Eryobha.
8 Amare wowoose uno atasiighiri mughëndi waache,
taryeche Eryobha,
gho kubha Eryobha n‑obhosiighi.
9 Eryobha eryene ndetwërëkiri obhosiighi bhooche ghokwito gho nchëra e komotoma Omoona waache omwene chiri kuucha mo‑se ino,
kubha gho kohetera ghokooche tubhönë obhuhöru bho miishe ghyose.
10 Bhuno nibho obhosiighi,
taanyi kubha niitu ꞉tooresiighiri Eryobha,
amare iryo niryo ꞉reetosiighiri itu.
Nikyo ꞉reemotomiri Omoona waache,
abhe amaruusi gha ghosinchu kubha aruusi amasari ghiito na ghotutëmëërani ne Eryobha.
11 Abhasiighani bhaane,
aribha Eryobha ndetosiighiri itu hangʼu,
nekwëndëru na niitu tosiighane.
12 Taanyi‑ho wowoose uno arerooche Eryobha naabha.
Amare torasiighana,
nekwërëki kubha Eryobha ndeenyi no obhumu na niitu,
obhosiighi bhooche mbohikeriine ghokwito.
13 Itu ntoonyi no obhumu ne Eryobha,
ne Eryobha ryose ndeenyi no obhumu na niitu.
Ntweche hangʼu gho kubha ndetoheere Akörö yaache.
14 Itu ntorooche na ntokobhabhoorera obhuhëënë kubha,
Taata Waryobha ꞉naamotomiri Omoona waache mo‑se ino,
kubha abhe Omotoori o bhaato bhoose.
15 Omooto wowoose uno aghokumi na aghwishereri kubha Yesu n‑Omoona o Ryobha,
Eryobha ndeenyi no obhumu nawe,
woose naanyi no obhumu ne Eryobha.
16 Ibheere,
itu ntweche na ghokumi kubha Eryobha ndetosiighiri.
Eryobha n‑obhosiighi.
Wowoose uno anyi no obhosiighi,
niwe anyi no obhumu ne Eryobha,
Eryobha ryose ndeenyi no obhumu nawe.
17 Gho nchëra iyo,
obhosiighi bhooche mbohikeriine ghokwito,
kubha tubhe no obhosubhesubhe orosiko ro ghoteneru ekiina.
Ntookubha nabho gho kubha,
eriimanya riito re mo‑se ino,
ndetuubhiine ne eriimanya re Yesu.
18 Omooto uno anyi no obhosiighi taanyi na ahaho.
Amare obhosiighi bho hëënë mbohaaruusi ahaho yoose,
gho kubha ghoteneru ekiina niko ghokobhaköra abhaato bhahahe.
Omooto uno anyi na ahaho,
obhosiighi bho Ryobha bhotahikeriine moose yaache.
19 Ibheere itu ntosiighiri bhaghëndi bhiito ne Eryobha ntoresiighiri,
gho kubha Eryobha niryo ꞉riishamiri ghotosiigha.
20 Aribha omooto wowoose aghosiikëra kubha nasiighiri Eryobha ino amurëghiri mughëndi waache,
m‑mobhiihi.
Ntweche m‑mobhiihi gho kubha,
omooto uno atasiighiri mughëndi waache uno akomorighi kwo miisho,
taaghotora koresiigha Eryobha rino ataakorerighi.
21 Mbe,
Eryobha ndetoheere omoghiro kubha wowoose uno asiighiri Eryobha,
nakwëndëru komosiigha mughëndi waache.a