Kumanya kinya abhaana bha Ryobha
3
Mbe,
morighi kebhuno Taata Waryobha atosiighiri chwee,
kubha itu tobherekeru abhaana bhaache!
Mahëënë hangʼu toonyi.
Abhaato bhano bhataakoresooka Eryobha bhateeche kubha itu n‑abhaana bha Ryobha toonyi,
gho kubha bhataryeche iryo.
2 Abhasiighani bhaane,
ibheere itu n‑abhaana bha Ryobha,
amare timënyuru haheero bhuno tookubha.
Koru hangʼu ntweche kubha eriibhagha rino Kirisito aghugharuka wiiki,
ntoghotuubhaana nawe,
gho kubha ntokomorighi kinya anyi.
3 Omooto wowoose uno aghwitëngʼëra kubha naghotuubhaana na Kirisito,
iyeri abhe mutööbhiyu,
kinya bhuno Kirisito omwene anyi mutööbhiyu.
4 Wowoose uno akwëndërëra ghuköra amasari,
naghusari emeghiro ghe Ryobha,
gho kubha ghuköra amasari,
niko ghusari emeghiro.
5 Mweche kubha Kirisito ꞉niichiri koruusi amasari ghiito.
Wiiki iwe taaghuköra amasari ghoghoose.
6 Ibheere uno akwëndërëra kubha no obhumu na Kirisito,
taakwëndërëra ghuköra amasari.
Uno akwëndërëra ghuköra amasari,
teeche kubha Kirisito n‑niwe.
7 Ibheere abhaana bhaane abhasiighani,
motiishereri kubha omooto wowoose abharumeeri.
Wowoose uno aghuköra gha bhuhëënë naanyi no obhuhëënë ambërë e Ryobha,
kinya bhuno Kirisito anyi no obhuhëënë.
8 Amare omooto wowoose uno akwëndërëra ghuköra amasari,
n‑omooto o Rishambu.
Ntweche ghayo gho kubha Erishambu ndyëndëriire ghuköra amasari korwera kare.
Nikyo Omoona o Ryobha ꞉ichiri mo‑se,
kubha aghisari emeremo ghe Rishambu.
9 Wowoose uno abheere omoona o Ryobha,
taakwëndërëra ghuköra amasari,
gho kubha naanyi na tëëmö e Ryobha moose yaache.
Taaghotora kwëndërëra ghuköra amasari gho kubha iwe n‑omoona o Ryobha.
10 Amare omooto uno ataaghuköra gha hëënë,
hamu uno atamosiighiri mughëndi waache,
uyo taanyi omoona o Ryobha.
Hangʼu niho tokumënya obhwahukani bho bhaana bha Ryobha,
na abhaana bha Rishambu.
Ghosiighana
11 Korwera eriibhagha rino ꞉muusëëmiri ghokumi,
mooghwire amangʼana kubha nekwëndëru tosiighane itu bheene kwo bheene.
12 Totabha kinya Kaayini,
iwe n‑omoona o Rishambu are,
akamwita omonyi waache.
a Ngwake amwitiri?
Namwitiri gho kubha amaköri gha Kaayini ngaare mabhe,
amare gha monyi waache ngaare gha bhuhëënë.
13 Ibheere,
bhaghëndi bhaane,
motahagha erabha abhaato bhano bhataakoresooka Eryobha bharabharëgha.
14 Itu ntweche kubha ntoruure mo‑changuru che roko,
na ghusöha mo‑bhuhöru bho miishe ghyose.
Ntweche hangʼu gho kubha ntobhasiighiri abhaghëndi bhiito.
Omooto wowoose uno ataghöötë obhosiighi naanyi mo‑roko.b
15 Wowoose uno amurëghiri mughëndi waache,
n‑omwiti.
Mweche kubha taanyi‑ho omwiti uno anyi no obhuhöru bho miishe ghyose moose yaache.
16 Mbe,
Kirisito hano abhoruusiri obhuhöru bhooche gho ghiri yiito,
natwërëkiri obhosiighi bho bhuhëënë n‑ghento ke.
Wiiki na niitu hangʼu hangʼu,
ntokwëndëru toruusi obhuhöru bhwito gho ghiri e bhaghëndi bhiito.
17 Omooto wowoose uno anyi no obhwame bho mo‑se ino,
aramara amorighi mughëndi waache uno anyi na amënda,
amare ange komorigheri changori komotoori,
nibhu aghotora kobhugha kubha naanyi no obhosiighi bho Ryobha moose yaache?
18 Abhaana bhaane abhasiighani,
totabhasiigha bhaghëndi bhiito kwo mangʼana agheene,
amare tosiighane kwo bhuhëënë gho nchëra e ghukörërana amachömu.
19 Torasiighana hangʼu,
ntoghotora kubha no obhuhëënë kubha,
ntoghutambana obhuhëënë.
Wiiki emetema ghiito ghetaakubha na ahaho ambërë e Ryobha.
20 Ntookubha no omurëmbë koru torateneru ekiina mo‑metema ghiito,
gho kubha ntweche kubha Eryobha iryo n‑ikoro ghokera emetema ghiito,
wiiki iryo ndyeche ghoose.
21 Abhasiighani bhaane,
aribha totaaghoteneru ekiina mo‑metema ghiito,
ntoghotora kubha no obhosubhesubhe bho kwimeerera ambërë e Ryobha.
22 Wiiki ghyokyose kino tokorisabha ndeghotuha,
gho kubha ntoghoghesooka emeghiro gheeche na ghuköra ghano ghakorichömëri.
23 Omoghiro waache niwe uno,
kubha tomokumi Omoona waache,
Yesu Kirisito,
na ghosiighana,
kinya bhuno ꞉aturagheriiri.
24 Omooto wowoose uno aghosooka emeghiro ghe Ryobha,
naanyi no obhumu naryo.
Eryobha ryose ndeenyi haghirohamu nawe.
Ntweche kubha Eryobha ndeenyi haghirohamu na niitu,
gho kubha ntoonyi na Akörö Ahörëëru ino retoheere.