Yesu niwe aghotusabhera
2
Abhaana bhaane abhasiighani,
ˆnekabhaandëkëra amangʼana ghayo,
kubha motaköra amasari.
Amare koru aribha omooto wowoose araköra amasari,
ntughöötë uno aghotusabhera o‑Taata Waryobha,
uyo niwe Yesu Kirisito,
uno anyi obhuhëënë.
2 Iwe niwe amaruusi gha ghosinchu na gho nchëra iyo,
naruusiri amasari ghiito na ghotutëmëërani ne Eryobha.
Wiiki ghataanyi amasari ghiito agheene,
amare na amasari gha bhaato bhoose bha mo‑se ino.
3 Torasooka emeghiro ghe Ryobha,
niho tookubha no obhuhëënë kubha ntomweche.
4 Wowoose uno akobhugha naanyi no obhumu ne Eryobha,
ino taaghosooka emeghiro gheeche,
m‑muröngö,
tabhweche obhuhëënë.
5 Amare uno aghosooka angʼana yaache,
hëënë nasiighiri Eryobha.
Hangʼu nibhu tokumënya kubha ntoonyi no obhumu ne Eryobha.
6 Omooto uno akobhugha naanyi no obhumu ne Eryobha,
nakwëndëru amanye kinya bhuure Yesu amanyiri.
Emeghiro ghe Yesu ighoro e bhosiighi
7 Abhasiighani bhaane,
omoghiro uno nabhaandëkiire taanyi muhë,
amare n‑omoghiro wuure o kare,
uno moore nawe korwera hano mokumiri Kirisito.
a Omoghiro uyo o kare,
n‑angʼana yiire mooghwire ighoro e bhosiighi.
8 Wiiki omoghiro uno nekobhaandëkëra m‑muhë.
Obhuhëënë bhooche mboroochiibhu mo‑tëëmö e Yesu Kirisito,
na mo‑chatëëmö cheenyu,
gho kubha ekengʼuuri ngekoheta,
no obhwero bho bhuhëënë mbumariri kurëngaari.
9 Omooto wowoose uno akobhugha kubha namanyiri mo‑bhwero,
ino amurëghiri omokumi mughëndi waache,
akeere amanyiri mo‑kengʼuuri.
10 Ibheere wowoose uno asiighiri mughëndi waache,
namanyiri mo‑bhwero.
Ghetaanyi‑ho ghyokyose moose yaache kino gheghughëri akörë amasari.
11 Uno amurëghiri mughëndi waache,
namanyiri mo‑kengʼuuri.
Wiiki naghughënda mo‑kengʼuuri,
naghuköra egheghiro ghyokyose amare ateeche amabhe na amachömu,
gho kubha ekengʼuuri ngekundekiiri amiisho ghaache.
12 Nabhaandëkiire abhaana bhaane abhasiighani,
gho kubha amasari ghaanyu ngaabhiiru
gho kohetera Yesu Kirisito.
13 Nabhaandëkiire bhataata,
gho kubha momweche Yesu Kirisito,
uno are‑ho korwera simoka.
ˆNekabhaandëkëra abhabhureni,
gho kubha morekindiri Erishambu.
Nabhaandëkiire inyu abhaana,
gho kubha momweche Taata Waryobha.
14 Nabhaandëkiire bhataata,
gho kubha momweche Taata Waryobha
uno are‑ho korwera simoka.
Nabhaandëkiire abhabhureni,
gho kubha moonyi na changuru,
na mokwëndërëra ghughööta angʼana e Ryobha,
na morekindiri Erishambu.
15 Gho ghayo,
motasiigha amangʼana amabhe kinya abhaato bhano bhataakoresooka Eryobha.
ˆNeghagharukera wiiki,
motasiigha amabhe ghano ghaanyi mo‑se.
b Aribha omooto wowoose asiighiri amabhe gha mo‑se ino,
tamosiighiri Taata Waryobha.
16 Amabhe gha mo‑se ino nigho ghano,
amiigha amabhe gha mobhere,
ne eriihari re ghwighomba ghyokyose kino okorighi,
na kwihachera obhwame.
Chatëëmö chino chetaakoru o‑Taata Waryobha,
amare nchekorwera mo‑se ino.
17 Ase haghirohamu na amiigha ghaache amabhe,
mbekoheta.
Amare wowoose uno aghuköra amënda gha Ryobha,
naakubha no obhuhöru bho miishe ghyose.
Kubha miisho na abhabhisa bha Kirisito
18 Abhaana bhaane abhasiighani,
eriibhagha re ntenero ndehikiri!
Mooghwire kubha omobhisa o Kirisitoc nakuucha,
na koru ibheere abhabhisa bhaaru bha Kirisito mbamariri kuucha.
Kiyo nikyo gheghughëri toramënya kubha,
ntoonyi mo‑riibhagha re ntenero.
19 Abhaato bhayo ꞉mbaaruure mo‑makanisa ghiito,
amare bhataare no obhumu bho hëënë na niitu,
gho kubha aribha bhangabheere bha wiito mbangasaaghiri na niitu.
Amare kohoroka koobho,
n‑kwërëkiri haheero kubha,
bhataare no obhumu na niitu kimu kimu.
20 Amare inyu,
Omutööbhiyu Yesu nabhaheere Akörö yaache,
d ibheere inyu bhoose mweche obhuhëënë.
21 Gho ghayo,
ˆnekabhaandëkëra anyaarubha ino,
teenyi gho kubha moteeche obhuhëënë,
amare n‑gho kubha mobhweche.
Wiiki mweche kubha obhuröngö bhobhoose bhuure bhotaakoru mo‑bhuhëënë.
22 Omooto omobhiihi n‑niwe?
Omooto omobhiihi w‑wowoose uno akwanga kubha Yesu n‑Kirisito.
e Wowoose uno akomwanga Taata Waryobha na Yesu Omoona waache niwe omobhisa o Kirisito.
23 Omooto uno akomwanga Omoona,
tamweche Taata Waryobha.
Amare uno akomokumi Omoona ambërë e bhaato,
iwe naanyi no obhumu na Taata Waryobha.
24 Ibheere,
mwëndërërë ghoghatoora mo‑metema gheenyu amangʼana ghano mweghuru korwera hano mokumiri Kirisito.
Moraköra hangʼu,
niho na niinyu mokwëndërëra kubha no obhumu no Omoona,
na Taata Waryobha.
25 Rino aturaghiri Omoona o Ryobha niryo rino,
kubha no obhuhöru bho miishe ghyose.
26 ˆNekabhaandëkëra ghano,
kobhashaangʼi ighoro e bhaato bhaare bhaghusaki kobharumeeri.
27 Inyu motakongʼiinu,
gho kubha Kirisito nabhaheere Akörö Ahörëëru,
ino eghwikara moose yaanyu.
Iyo niyo ekobheeghi ghoose,
ameeghi ghaache n‑gha mahëënë,
ghataanyi gha bhuröngö.
Gho ghayo,
teekwëndëru kubha omooto abheeghi.
f Kinya bhuure Akörö ebheeghiri,
ibheere mwëndërërë kubha no obhumu na Kirisito.
28 Ibheere abhaana bhaane abhasiighani,
mwëndërërë kubha no obhumu na Kirisito,
kubha araacha korighibhu wiiki,
tubhe no obhosubhesubhe ambërë yaache,
totiibhisa gho chaasoni.
29 Mweche kubha Kirisito n‑o bhuhëënë,
gho ghayo,
mumënyë kubha wowoose uno aghuköra gha bhuhëënë,
niwe omoona o Ryobha.