Anyaarubha a yimbërë e
Yohana
Yesu n‑Angʼana e bhuhöru
1
Ntokobhaandëkëra angʼana ighoro e uno anyi Angʼana e bhuhöru,
uno are‑ho korwera simoka.
a Itu ꞉ntoomooghwire na komorighi kwo miisho ghiito abheene,
꞉ntoomorooche na komoturi na amabhökö ghiito.
2 Ibheere obhuhöru bhuyo mbohikeriine,
itu tokabhorighi.
Ibheere ntokobhabhoorera obhuhëënë na kobharaghaneri angʼana ighoro e uyo anyi obhuhöru bho miishe ghyose.
Iwe naare o‑Taata Waryobha,
akëërëkibhu ghokwito.b
3 Ntokobharaghaneri angʼana ighoro e Yesu,
uno ꞉toomorooche na komooghu,
kubha mubhe no bhumu na niitu mo‑bhokumi.
Obhumu bhuno tughöötë n‑haghirohamu na Taata Waryobha,
no Omoona waache Yesu Kirisito.
4 Ntokobhaandëkëra ghano mo‑nyaarubha ino,
kubha oghuchömëru kwito bhoose kohikeerane.
Kumanya mo‑bhwero
5 Angʼana ino ꞉tooghwire o‑Yesu,
niyo tokobharaghaneri,
kubha Eryobha no obhwero,
retaanyi ne ekengʼuuri ghyokyose moose yaache.
6 Aribha tookobhugha kubha ntoonyi no obhumu ne Eryobha,
ino törëëndërëra ghwikara mo‑kengʼuuri,
ntoghosiikëra obhuröngö.
Wiiki totaaghuköra ghano ghaanyi gha hëënë.
7 Aribha toghwikara mo‑bhwero,
kinya bhuure Eryobha reghwikara,
niho tookubha no obhumu itu bheene kwo bheene.
Wiiki masaahë gha Moona waache Yesu ngaghotweri amasari ghiito ghoose.
8 Aribha tookobhugha kubha itu totaanyi na amasari,
ntokwingʼiina itu bheene,
toteeche obhuhëënë.
9 Torabhugha kubha ntuköriri amasari,
Eryobha ndeghotwabhëra na ghotweri amabhe ghoose,
gho kubha iryo n‑de hëënë wiiki n‑de bhuhëënë.
10 Torabhugha totaköriri amasari,
ntokoriköra Eryobha kubha n‑ibhiihi,
wiiki angʼana yaache teenyi moose yiito.