Ghokinda amasari gha mo‑se
5
Omooto wowoose uno aghokumi kubha Yesu n‑Kirisito,
niwe omoona o Ryobha.
Wowoose uno akomosiigha omwibhori,
nakobhasiigha na abhaana bha mwibhori uyo.
2 Ntweche kubha ntobhasiighiri abhaana bha Ryobha,
hano tokoresiigha Eryobha,
na ghosooka emeghiro gheeche.
3 Koresiigha Eryobha niko ghosooka emeghiro gheeche.
Wiiki ghughööta emeghiro gheeche ghotaanyi ghuköngʼu,
4 gho kubha uno anyi o moona o Ryobha,
naghoghakinda gha mo‑se ino.
Ntoghoghakinda gho nchëra e bhokumi bhwito.
5 Kana!
N‑niwe uno aghotora ghoghakinda gha mo‑se ino?
W‑wuure aghokumi kubha Yesu n‑Omoona o Ryobha.
Obhuhëënë ighoro e Yesu Kirisito
6 Mbe,
Yesu Kirisito niwe ichiri kwo manche gha bhubhatiiso na kwo masaahë gha roko rooche.
Taanyi kwo manche agheene,
amare na kwo masaahë ghaache ghano ꞉ghiitëkiri mo‑musarabha.
7 Wiiki Akörö Ahörëëru neghoghaghambera ghayo kubha n‑nga hëënë,
gho kubha Akörö Ahörëëru niyo obhuhëënë.
8 Ngaanyi‑ho amangʼana atato ghano ghakuhëënëhi amangʼana gha Yesu [Mwishaaro,
Taata,
na Angʼana,
na Akörö Ahörëëru,
bhayo bhatato m‑bhamu.
9 Wiiki mbeenyi‑ho bhitato bhino bhekuhëënëhi mo‑se],
Akörö,
na amanche na amasaahë.
Bhiyo bhitato mbehoghwana kwo ngʼana imu.
Toriishereri amangʼana gha bhaato,
amangʼana gha Ryobha m‑makoro ghokera gha bhaato.
Amangʼana gha Ryobha nigho ghano,
kubha namuhëënëhiri Omoona waache.
10 Wowoose uno akomokumi Omoona o Ryobha,
nakumiri kubha obhuhëënë bhuyo m‑bho mahëënë.
Amare uno ataakorekumi Eryobha,
nakobhugha kubha Eryobha n‑iröngö,
gho kubha tabhwisheriiri obhuhëënë bhuno Eryobha ꞉reeruusiri ighoro e Moona waache.
11 Obhuhëënë bhuyo nibho bhuno,
Eryobha ndetoheere obhuhöru bho miishe ghyose.
Obhuhöru bhuyo ntokobhubhöna gho nchëra e ghokumi Omoona waache.
12 Wowoose uno anyi no obhumu no Omoona o Ryobha,
naanyi no obhuhöru bhuyo.
Amare uno ataanyi no obhumu no Omoona o Ryobha,
tabhughöötë obhuhöru bhuyo.
Eriimanya re bhaana bha Ryobha na bhano bhataaghokumi
13 ˆNekabhaandëkëra amangʼana ghayo,
inyu bhano moghokumi Omoona o Ryobha,
kubha mumënyë moonyi no obhuhöru bho miishe ghyose.
14 Itu ntoonyi no obhosubhesubhe ambërë e Ryobha,
gho kubha ntweche kubha ndeghotooghu aribha torarisabha ghyokyose kiire kurëngʼaana na amënda ghaache.
15 Itu ntweche ndeghutëghëërëra amasabhi ghiito,
nikyo toonyi no obhuhëënë kubha ndeghotuha ghano tokorisabha.
16 Ngaanyi‑ho amasari ghano ghataakomutaani omooto ne Eryobha emiishe ghyose.
Omooto wowoose aramorighi mughëndi waache araköra amasari ghanga ghayo,
amusabhere kwo Ryobha.
Eryobha ryose ndekomuha obhuhöru.
Neekubha hangʼu kwo bhaare bhaghuköra amasari ghayo.
Amare ngaanyi‑ho amasari ghano ghaghutaani omooto ne Eryobha emiishe ghyose.
Eni nteekobhugha amusabhere kwo Ryobha gho ghiri e masari ghayo.
17 Ghuköra angʼana yoyoose ino etaakurëngʼaanera ambërë e Ryobha,
n‑ghuköra amasari.
Ngaanyi‑ho amasari ghano ghataaghutaani omooto ne Eryobha emiishe ghyose.
18 Ntweche kubha omoona wowoose o Ryobha,
taakwëndërëra ghuköra amasari,
gho kubha Omoona o Ryobha nakomochonga,
Erishambu retaaghotora komoturi.a
19 Ntweche kubha itu n‑abhaana bha Ryobha toonyi,
na abhaato bha se bhano bhataaghokumi Eryobha mbaghukangatu ne Erishambu.
20 Wiiki ntweche kubha Omoona o Ryobha namariri kuucha,
natoheere obhongʼiini,
kubha torimënyë Eryobha re hëënë.
Ntoonyi no obhumu ne Eryobha re hëënë,
gho nchëra e kubha no obhumu no Omoona waache Yesu Kirisito.
Rino niryo Eryobha re hëënë,
no obhuhöru bho emiishe ghyose.
21 Abhaana bhaane abhasiighani,
mubhe miisho motasëngëra chasanaamu.b