Moresooke Eryobha
4
Eriihë no obhurööni bhuno bhoonyi ghate yaanyu,
mbekurëëtu na ke?
Mbekurëëtu na amiighombo amabhe ghano ghakuhakaana moose yaanyu.
2 Moghwighomba kubhöna ebheghiro nyarebhe,
amare motaaghotora kobhibhöna,
gho ghayo,
moghotora ghwita.
Mokorighi eriihari mo‑bhwame bho bhande,
amare motaakubhöna egheghiro gho ghayo,
moghuköra amahë na kurööna.
Bhino mokwënda motaakobhibhöna gho kubha motabhisabhiri kwo Waryobha!
3 Hano mokorisabha motaakubhöna gho kubha mokorisabha gho nchëra ambe,
kubha mubhönë kino mokwënda kwo miighombo ghaanyu amabhe.
4 Inyu n‑abhaato bhano motaanyi no obhuhëënë n‑kinya abhataari,
bhano mokwanga Eryobha!
Moteeche kubha,
ghughöötana obhusaani na ase,
n‑kubha abhabhisa bha Ryobha?
Gho ghayo,
omooto woose uno akwënda ghughöötana obhusaani na ase,
naghwiköri omwene kubha omobhisa o Ryobha.
5 Mbe!
Motiituuri kubha yandëkuru bhoowa mo‑Mandëkö Amatööbhiyu kubha,
“Akörö ino Eryobha retoheere neghotwighomba chwee.”a
6 Amare,
aghareeya ino tokuhaabhu ne Eryobha neenyi na changuru chwee,
kinya Amandëkö Amatööbhiyu ghakobhugha,
“Bhano bhakwihacha,
Eryobha ndehaabhaanga,
amare abhanyööhu,
ndehaabhaha aghareeya.”b
7 Mbe,
mubhe moraresooka Eryobha.
Amare moryange Erishambu,
niho rekobhangʼösa.
8 Mubhe morariishukerera Eryobha,
niho ryose,
rekobhiishukerera inyu.
Inyu bhano moonyi bha masari,
motighe amasari ghaanyu na ghuköra amachömu,
inyu bhano moonyi na amiihëëbhö abhere,
ghate e Ryobha na ase,
moritambane gho chaakörö cheenyu choose.
9 Mwitumate,
na morere na kwihiinyërëra.
Amasëkö ghaanyu,
ghagharoru kubha eriirera,
na ghuchömëru koonyu,
ghugharoru kubhe ghwitumata.
10 Mwinyööhi ambërë e Mutëmi,
nawe nakobhaghongi.
Motabha moratëmana amasörö
11 Abhahiiri bhaane,
motabha moratëmana amasörö,
gho kubha,
omooto woose uno aghutëma amasörö mughëndi waache,
hamu komotenera ekiina,
naakubha ataraahiri emeghiro ghe Ryobha.
Aribha oraghitaraaha emeghiro,
nekwërëki kubha toghesookiri emeghiro,
amare nubheere omoteni o kiina o kobhiihera meghiro ghiyo.
12 Eryobha eryene,
niryo reghetooriri emeghiro,
na niryo reghotena ekiina.
Niryo eryene chiri reghotora ghotoori na ghosireekereri.
Amare iye n‑niwe,
koru omotenere ekiina omwatani waacho?
Motiihacha gho ghiri e tabhoori
13 Ibheere,
muntëghëërërë bhoheene,
inyu bhano mokobhugha,
“Reero hamu tabhoori,
ntookuucha ghuye orughëndö mo‑moghya nyarebhe,
na ntoghwikara iyo omooka moghima,
toraköra obhosorocha,
na kubhöna obhwëra.”
14 Inyu moteeche kebhuno eriimanya reenyu reekubha tabhoori!
Obhuhöru bhoonyu n‑ghento ke?
Nekobhugha hangʼu gho kubha,
inyu n‑kinya omooki uno okorighibhu kwo riibhagha isuuhu hano okumara obhora.
15 Mokwëndëru,
mubhe morabhugha,
“Aribha Omutëmi arasiigha,
ntookubha no obhuhöru na ntoghuköra kino hamu kiire.”
16 Amare inyu ibheere,
mokwihacha na kwirighi kubha moonyi no obhotoro.
Okwihacha konga kuyo,
n‑kobhe.
17 Mbe,
omooto woose uno eche ghuköra amachömu amare ataghaköra,
uyo naghuköra amasari.