Atöngërö ighoro e bhaame
5
Mbe,
inyu abhaame,
muntëghëërërë bhoheene!
Morere kwo riiraka ikoro na kwihiinyërëra,
gho ghiri e nyaako inkoro ino ekuucha kobhabhöna.
2 Obhwame bhoonyu mbobhushiri,
na amaghööti ghaanyu ngareebhuru ne ebhebhongi.
3 Chasahaabhu na chambiiri cheenyu,
nchirötiire,
no okwiröötëra kuyo ngokobhaghambera inyu kebhuno mokuhökëri kobhe obhwame bhoonyu.
Gho ghayo,
Eryobha ndekobharööna kinya bhuno omororo ohasireekereri egheghiro.
Ibheere inyu mwitooriire amamba gho chaasiko che ntenero.
4 Mumööhi!
Inyu motabharehiri bhano ꞉bhaare bharabhahökëri mo‑meghondo gheenyu,
bhano bhabhaghësiire mbakwirereeri ne eriirera reebho ndehikiri mo‑matu gha Mutëmi Waryobha o bhakëëya bha Mwishaaro.
5 Mwikeere na ghuchömëru mo‑bhwame bhoonyu mo‑se ino,
na kwinenehi kinya chatyenyi mo‑rosiko ro ghosinchu.
6 Mokobhatenera ekiina na kobhiita bhano bhaanyi mo‑bhuhëënë nabho bhataare no obhotoro bho kobhaanga inyu.
Moghumereri mbagha kuucha kwo Mutëmi Yesu
7 Mbe,
abhahiiri bhaane,
mubhe moraghumereri mbagha rehike eriibhagha rino Omutëmi akuucha.
Mumööhi omoremi kebhuno ahaaghanya emimërö gheeche gheruusi omunöghö omuchömu,
iwe nahaaghanya gho ghoghumereri ambura a yimbërë na a yenyuma.
8 Hangʼu na niinyu bhoose moghumereri,
na kwihëënëhi mo‑chaakörö cheenyu,
gho kubha kuucha kwo Mutëmi ghoghatingʼi.
9 Abhahiiri bhaane,
motirereereri inyu bheene kwo bheene motaacha ghoteneru ekiina.
Mumööhi!
Omoteni o kiina haghuhe anyi kuucha.
10 Abhahiiri bhaane,
morighi abharööti bhano ꞉bhaasiikiire kwo riina re Mutëmi Waryobha,
bhabhe eghetuubhaani ghe ghoghumereri anyaako yaanyu.
11 Bhaare bhaghumeriiri ntokobhabhara kubha mbiitabhiiru.
Mooghwire kinya Ayubhu aghumeriiri,
na antenero mweche kebhuno Omutëmi amuköriire amachömu.
a Ghayo ghoose n‑gho kubha Omutëmi niichwire ebheghongi na aghareeya yaaru.
12 Ghokera ghayo ghoose,
abhahiiri bhaane,
motaraheri kwo rishaaro,
na ase na gho gheghiro ghyokyose kiire.
Mobhughe mahëënë aribha m‑mahëënë,
na mobhughe tiyaanyi aribha n‑tiyaanyi,
motaacha ghoteneru ekiina.
Musabhe Eryobha kwo bhokumi
13 Moonyi no omooto uno akunyaaka ghate yaanyu?
Nakwëndëru asabhe Eryobha.
Hamu naanyi‑ho wowoose uno achömiiru?
Nakwëndëru embe emyembo ghe ghoghoghi.
14 Moonyi no omubhabharu ghate yaanyu?
Uyo nakwëndëru abhabherekere abhagharuka bha riikanisa,
bhaache awaache komuhaka amaghuta na komusabhera kwo riina re Mutëmi Yesu.
15 Nabho bharamusabhera kwo bhokumi,
nakuhöra.
Omutëmi nakomobhooki,
na erabha aköriri amasari,
nakwabhëru.
16 Mbe,
mubhe moratuukuunerana amasari ghaanyu na ghusabherana kwo Waryobha,
kubha mubhönë kuhöribhu amabhabharu ghaanyu.
Amasabhi gha mooto omuhëënë ngaanyi no obhotoro bho ghuköra amangʼana amarito.
17 Omurööti Eriya,
naare omooto kinya itu,
iwe ꞉niiköngʼiri ghusabha kubha ambura etatëëka mo‑se e Isiraeri,
na ambura titëëkiri kwo meeka etato ne emyëri asaasabhe.b
18 Niho wiiki,
akarisabha Eryobha kubha ambura itëëkë,
yoose eghatëëka mbagha ase ekaruusi omunöghö waache.c