Mochonge ororeme
3
Abhahiiri bhaane,
motabha abheeghi bhaaru,
kinya bhuure mweche kubha itu abheeghi,
Eryobha ndeghototenera ekiina ghokera abhande.
2 Kwo bhuhëënë,
itu bhoose ntohaataasi gho chanchëra haghare haghare.
Aribha omooto wowoose ataaghutaasi gho ghosiikëra kooche,
iwe n‑omooto uno anchakiine,
iwe naghotora kowuhööchërëra omobhere waache woose.
3 Mumööhi,
omooto nahaatoora ekyoma ghesuuhu kino ghekunyuru mo‑monu o bharaasi,
kubha emosooke,
gho ghayo,
nahaatora koyirahuuna ghuye hano akwënda.
4 Wiiki mumööhi ameeri,
nangabha enyi inkoro chwee,
na nehaatughutu no obhukama bhuhaari,
amare nehaakangatu no obhosikaani bhosuuhu chwee,
ghuye ahaghiro hoose hano omwimeereri akwënda eghi.
5 Hangʼu hangʼu,
ororeme roose n‑ekyemo ghesuuhu mo‑mobhere,
amare ndoonyi no obhwihachi bhokoro chwee.
Umööhi na kebhuno omororo omosuuhu oghotora ghweki na ghosireekereri eriiteregho ikoro!
6 Ororeme roose n‑kinya omororo,
iro ndwichwire obhobhe bhoose,
na ndoonyi mo‑bhyemo bhiito bhe mobhere.
Ndoghusanchi amabhe mo‑mobhere,
ndoghosireekereri eriimanya riito kinya omororo uno okorwera mo‑riiribha re mororo.
7 Abhaato mbaghotora ghotugha chatyenyi che manga ghoose,
ebhinyönyi,
ne ebhetyenyi bhino bhekwingʼuurera chanda na bhyose bhino bheenyi mo‑nyancha.
8 Amare taanyi‑ho omooto uno aghotora ghotugha ororeme,
n‑ndobhe,
rotaaghukangatu na ndwichwire obhosongo bhuhaari chwee bho ghwita.
9 Kwo roreme ntokomoghongi Taata Omutëmi wiito,
na kwo roreme ruyo ruyo ntokwihiima abhaato bhano bhabhomburu ne Eryobha gho ghisösö keeche.
10 Mo‑monu uyo uyo nimu ghakorwera amangʼana gha rubhango na amiihiimo.
Abhahiiri bhaane,
ghayo ghataakwëndëru ghabhe hangʼu.
11 Wiiki ghetaanyi‑ho ekerika kino ghekoruusi amanche amachömëërëru,
na amanche gha moonyo!
12 Abhahiiri bhaane,
omote uno okobherekeru omotiini noghotora ghusönga amakorobhese gha mote o miseyituuni?
Hamu omote o musabhiibhu usöngë amakorobhese gha mote o motiini?
Ekerika ke manche gha moonyo,
ghetaaghotora koruusi amanche amachömëërëru.
Weeghe na kubha na amangʼiini gha Ryobha
13 N‑niwe ghate yaanyu,
uno anyi na amangʼiini no obhumënyi?
Mbe,
nëërëki obhumënyi bhooche na amangʼiini ghaache gho ghuköra amaköri amachömu,
kwo bhunyööhu bhuno bhookoru mo‑mangʼiini.
14 Amare aribha moonyi ne eriihari rino risangeriine obhororo no obhunyawumu mo‑chaakörö cheenyu,
motiihacha kubha moonyi na amangʼiini,
ino morasiikëra obhuröngö mo‑bhuhëënë.
15 Amangʼiini ghanga ghayo,
ghataakoru kwo Waryobha,
amare n‑amangʼiini amabhe ghano ghakorwera mo‑se,
na mo‑chaasughara che bhaato na mo‑Rishambu.
16 Hohoose hano haakubha ne eriihari no obhunyawumu,
hayo niho haanyi na anyööri na amabhe gha manga ghoose.
17 Amare,
amangʼiini ghano ghaakoru kwo Waryobha,
m‑machömu wiiki n‑gha murëmbë,
no obhuhörëëru,
igho ngaghutëghëërëra amangʼana gha abhaato.
Igho ngiichwire changori na amaköri amachömu,
na ghataanyi no obhwahukani koru obhobhiihi.
18 Abhaato bha murëmbë,
bhareemi chaatëtërë che murëmbë,
mbaghughësa obhuhëënë.