Atöngërö ighoro e bhwahukani
2
Abhahiiri bhaane,
gho kubha momokumiri Omutëmi wiito Yesu Kirisito,
Omutëmi o bhokumi obhokoro,
motabha moriyaahukani mo‑bhaato.
2 Tobhughe aribha omooto angasöhiri hano mookubha mwikomiine korisëngëra Eryobha,
abheekiri amaghööti amachömu,
na abheekiri abhëtë e sahaabhu mo‑kyara,
ne eriibhagha riyo riyo asöhë omuhabhe,
uno abheekiri amaghööti amaghonchu.
3 Niho inyu mwërëki asooko kwo wuure abheekiri bhoheene,
na momobhoorere mobhughe,
“Ikara hano mo‑mweya omuchömu.”
Amare omuhabhe uyo,
momobhoorere mobhughe,
“Iye imeerere haare,”
hamu momobhoorere kubha,
“Ikara haase hano haghuhe na amaghoro ghaane.”
4 Gho ghuköra hangʼu,
motaakorighi mokeere mwiyahukiini mo‑bhaato,
na kobhatenera ekiina,
kwo miihëëbhö ghaanyu amabhe?
5 Abhahiiri bhaane abhasiighani,
muntëghëërërë bhoheene!
Eryobha ndebhahwire abhaato abhahabhe mo‑se ino kubha bhatore kubha abhaame mo‑bhokumi na ghosongʼaana obhutëmi bhuno rebharaghiire bhaare bharesiighiri.
6 Amare,
inyu mobhataraahiri chwee abhahabhe!
Kana,
abhaame bhayo taanyi ibho bhahabhibhönëërëri inyu,
na kobhahira ambërë e bhateni bha kiina?
7 Bhuure bhuure taanyi ibho bhakoretoka eriina ichömu re Yesu Kirisito rino mokobherekereru?
8 Mo‑Mandëkö Amatööbhiyu,
ne emeghiro ghe bhutëmi bho Ryobha ngekobhugha,
“Omosiighe omwatani waacho,
kinya bhuno wisiighiri iye omwene.”
a Aribha moghuköra hangʼu,
m‑bhoheene.
9 Amare,
morabhaahukani abhaato,
niho moghuköra amasari,
na moghoteneru ekiina ne emeghiro gho kubha moghitaasiri.
10 Omooto arasooka emeghiro ghyose,
amare ataasi omoghiro umu,
nakubharu kubha nataasiri ghyose.
11 Neekubha hangʼu gho kubha,
wuure atooriri omoghiro uno okobhugha,
“Otataara,”
b niwe atooriri na uno okobhugha,
“Otiita.”
c Gho ghayo,
nangabha otaaghutaara,
amare wiitiri,
nokubharu kubha nutaasiri emeghiro.
12 Mbe,
mosiikërë na ghuköra,
mubhe morahiita kubha Eryobha ndekobhatenera ekiina kwo meghiro,
ghino ghekurëëtëra abhaato ghotighooroku koru mo‑mabhe.
13 Eryobha retaakubha na changori hano rekomotenera ekiina omooto uno ataanyi na changori.
Amare changori che Ryobha ncheghokinda ghoteneru ekiina!
Mokumi na kwërëki amaköri amachömu
14 Abhahiiri bhaane,
haanyi no obhwëra ke kwo mooto uno aghwighamba kubha naanyi no obhokumi amare ataanyi na amaköri amachömu?
Kwo bhuhëënë obhokumi bhooche bhotaaghotora komotoori.
15 Aribha omokumi mughëndi waanyu o ghesubhe hamu o ghikari taghöötë angibho koru ebhiinyakurë,
16 na umu ghate yaanyu amobhoorere abhughe,
“Nooghi no omurëmbë,
waate omororo na ghwighota,”
amare tamotooriri gho komobheeki hamu komwighoti,
m‑bhwëra ke akubha amuköriire?
17 Hangʼu hangʼu,
morabha no obhokumi,
amare motaanyi na amaköri amachömu,
obhokumi bhoonyu,
mbokuure.
18 Ibheere omooto owonde naghotora kobhugha,
“Iye,
noonyi no obhokumi na neeni neenyi na amaköri amachömu.”
Amare eni nekomobhoorera nebhughe,
“Nonyëërëki obhokumi bhoocho,
ino otaanyi na amaköri amachömu.
Eni neghokwërëki obhokumi bhoone gho nchëra e maköri ghaane amachömu.”
19 Kana iye nookumiri kubha ndeenyi‑ho Eryobha rimu?
Hangʼu keenyi!
Nuköriri bhoheene!
Koru emisambu ghyose,
ngeghokumi na ghosingisa kwo bhotiini!
20 Iye m‑mughëëghë onyi!
Kana okeere örëndëru kwërëkibhu kubha,
obhokumi bhuno bhotaanyi na amaköri amachömu,
bhotaanyi no obhwëra?
21 Eryobha ꞉ndeemubhariri sookoro wiito Abhurahamu,
kubha muhëënë ambërë yaache,
ighoro e maköri amachömu ghano ꞉aköriri.
꞉Naaruusiri omoona waache Isaka abhe amaruusi gha ghwitu ighoro e haghiro ha koruuseri amaruusi!d
22 Nokorighi obhokumi bho Abhurahamu,
mboore bhoraghe haghirohamu na amaköri ghaache,
no obhokumi bhooche mbohikeriinu kwo maköri ghaache.
23 Gho ghayo,
ghakahikeerana Amandëkö ghaare ꞉ghaabhughiri,
“Abhurahamu ꞉naarekumiri Eryobha,
ryose kwo ngʼana iyo,
rekamubhara kubha omuhëënë ambërë yaache.”
e Abhurahamu,
akabherekeru omusaani o Ryobha.
24 Mbe,
mokorighi kubha Eryobha ndehaamubhara omooto kubha muhëënë ambërë yaache,
gho ghuköra amaköri amachömu,
amare taanyi gho nchëra e ghokumi okwene.
25 Koru Rahaabhu omusöngörëëri wuure,
woose akabharu kubha muhëënë ambërë e Ryobha,
kwo maköri amachömu ghano ꞉aköriri.
꞉Naabhaghënëhiri abhaseghaayi bhaare,
na kobhatoori bhaghi gho kohetera anchëra ayende.f
26 Gho ghayo,
aribha omooto abheere no obhokumi amare taanyi na amaköri machömu,
obhokumi bhooche bhuyo,
mbokuure,
kinya omobhere uno otaanyi na akörö,
nookubha okuure.