Anyaarubha e
Yakobho
Amakëërani
1
Anyaarubha ino neruure ghokoone eni Yakobho,
omutamishi o Ryobha no o Mutëmi Yesu Kirisito.
Nekobhakëëri inyu amatöngö ikomi na abhere,
ghano ghasanchiri mo‑chaase.
Muchömëru hano moghusakibhu
2 Abhahiiri bhaane,
muchömëru hano mookubha morabhöna amasaki haghare haghare,
3 gho kubha,
mweche ghusakibhu kwo bhokumi bhoonyu ngokobhaha obhoghumereri.
4 Mubhe no obhuhëënë kubha moghoghumereri mbagha mo‑ntenero,
kubha mubhe abhahëënë mo‑metema gheenyu,
motaacha ghosuuheru ne egheghiro ghyokyose.
5 Amare uno aghosuuheru na amangʼiini,
nakwëndëru arisabhe Eryobha naryo ndekomuha,
gho kubha ndehaabhaha abhaato bhoose,
kwo bhosiighi,
koru iryo retaanyi na anyaanyi.
6 Hano akubha ararisabha Eryobha,
nakwëndëru asabhe kwo bhokumi na atabha na ahaho,
gho kubha aribha omooto anyi na ahaho natubhiine kinya omokunda o nyancha uno okohiru no obhukama ino na ino.
7 Omooto o tëëmö iyo,
atiihëëbha kubha nakubhöna egheghiro ghyokyose koru kwo Mutëmi.
8 Omooto uyo n‑o miihëëbhö abhere nahaataratara mo‑chanchëra cheeche choose.
9 Omokumi omuhabhe uno ataanyi no obhwëra nakwëndëru achömëru gho kubha Eryobha ndemoghongiri.
10 Amare omwame woose,
nakwëndëru achömëru hano aghwikibhu ne Eryobha,
gho kubha nakuucha kobhora kinya ebhibhari bhi ibhara.a
11 Hano eryobha rehaarasa no omu ubhara,
nohoomi emimërö ne ebhibhari mbehaagho no obhuchömu bhooche bhosira.
Hangʼu hangʼu no omwame woose,
arabha mo‑mahöki ghaache,
nimu aghokwera.
12 Ngʼoni omooto uno aghoghumereri ghusakibhu,
gho kubha hano aghokinda ghusakibhu,
Eryobha ndekomuha atuhob yaache e bhuhöru bho miishe ghyose,
kinya ꞉riiraghiri kobhaha bhoose bhano bharesiighiri.
13 Hano omooto aghusakibhu,
atabhugha,
“Neghusakibhu ne Eryobha,”
gho kubha Eryobha retaaghotora ghusakibhu na mabhe,
koru iryo retaakomusaki omooto wowoose.
14 Amare omooto woose nahaasakibhu gho korutu,
na kongʼiinu na amiigha ghaache amabhe.
15 Amiigha gharaköngʼa ngakurëëta amasari,
na amasari gharaköngʼa ngakurëëta oroko.
16 Abhahiiri bhaane abhasiighani,
motangʼiinu.
17 Mumënyë egheghiro kyose eghichömu kino tokuhaabhu,
ngekoru Mwishaaro kwo Ryobha omutëëmi o mirëngaari.
Iryo retaaghotora ghwigharura kinya ekiriiri kehiigharura.
18 Gho kwënda kooche eryene,
ndetuköriri tubhe abhaana bhaache,
gho nchëra e ngʼana yaache e hëënë,
kubha tubhe a bhambërë mo‑bhyose bhino ꞉riitëëmiri.
Mutëghëërërë angʼana e Ryobha na koyesooka
19 Abhahiiri bhaane abhasiighani,
muntëghëërërë bhoheene!
Omooto woose abhe mwango o ghutëghëërëra,
amare atabha mwango o ghosiikëra hamu ghukarara,
20 gho kubha,
hano omooto aghukarara,
taaghuköra ghano ghakwëndëru ambërë e Ryobha.
21 Gho ghayo,
mutaane no obhobhe bhoose,
haghirohamu na amabhe maaru ghano ghaghashiri.
Moyighöötë gho kwinyööhi angʼana ino Eryobha retooriri mo‑metema gheenyu,
gho kubha niyo eghotora kobhatoori.
22 Wiiki motabha moringʼiina gho ghutëghëërëra okwene angʼana e Ryobha,
amare mukörë kinya ekobhugha.
23 Mbe,
gho kubha omooto woose uno aghutëghëërëra angʼana yaache,
amare ataköra kinya ekobhugha,
uyo natubhiine kinya omooto uno akwimööhi obhosho bhooche mo‑kiröri.
24 Hano akumara kwimööhi,
atanure,
hayo hayo ebhu kebhuno are.
25 Amare omooto uno akumööhi bhoheene emeghiro ghino ghehikeriine na ghino ghekurëëtëra abhaato ghotighooroku koru mo‑mabhe,
ino arahiita ghano oghwire na ghoghatereera,
uyo niwe aghwitabheru gho ghuköra ghayo.
26 Aribha omooto ariirighi kubha naanyi na atiini,
amare ataakoruhööchërëra ororeme rooche,
uyo nakwingʼiina mo‑motema waache,
ghutambana kooche atiini ghotaanyi no obhwëra ambërë e Ryobha.
27 Amaköri ghano ghakomotegheri Waryobha Taata wiito na ghano ghataanyi ni isörö,
nigho ghano,
kobhatoori abhaana abhahabhe na abhasino kurëngʼaana na chanyaako cheebho,
na gho ghwisacha amasari gha mo‑se ino.