Anyaarubha e Bhawuro kwo
Bhabhiribhi
Amakëërani
1
Anyaarubha ino neyandëkiri eni Bhawuro haghirohamu na Timotewo omutamishi mughëndi waane o Kirisito Yesu.
Ntokobhaandëkëra inyu amasikoofua na amashemaasi,
b haghirohamu na abhatööbhiyu bha iyo Bhiribhi bhano mughöötaniibhu na Kirisito Yesu.
2 Ntököbhëëndëra aghareeya no omurëmbë koru kwo Waryobha Taata wiito na kwo Mutëmi wiito Yesu Kirisito ghibhe haghirohamu na niinyu.
Bhawuro ˆakabhasabhera Abhabhiribhi
3 Eriibhagha ryose hano nekobhahiita inyu,
nekoriitabheri Eryobha,
Omutëmi waane.
4 Wiiki eriibhagha ryose hano nekobhasabhera,
neghusabha gho ghuchömëru,
5 gho kubha inyu mughöötiine na neeni gho kuraghani Angʼana Anchömu korwera orosiko runo ꞉mooghwire na koyekumi mbagha reero ino.
6 Neenyi no obhuhëënë kubha Eryobha rino ꞉riisëëmiri emeremo mimangi mo‑metema gheenyu,
ndekwëndërëra ghoghiköra mbagha reghehikeerani mo‑rosiko ruure Kirisito Yesu aghugharuka.
7 N‑kumangi niituuri hangʼu ighoro yaanyu,
gho kubha moonyi mo‑motema waane.
Musangiri aghareeya e Ryobha haghirohamu na neeni,
erabha nibhöhuru hamu erabha nekwibhateri na koyihëënëhi Angʼana Anchömu.
8 Eryobha ndyeche kubha neghosiikëra obhuhëënë hano neghokumereri kubha neghwighomba korighani na niinyu wiiki.
Nebhasiighiri inyu kwo bhosiighi bhuure bhuure kinya Kirisito Yesu abhasiighiri inyu.
9 Mbe,
nekobhasabhera kwo Ryobha kubha,
obhosiighi bhoonyu bhwëndërërë kwiyëngëra chwee,
wiiki mubhe na amangʼiini no obhongo,
10 kubha mubhönë ghoghiishereri ghaare ghaanyi gha hëënë.
Hayo niho mookubha bheero,
na motaanyi ni isörö mbagha orosiko ruure Kirisito aghugharuka.
11 Eriimanya reenyu ndeghwichora amangʼana gha hëënë ghano ghakubhönëka gho nchëra e Yesu Kirisito.
Ghayo ghoose gharekumi na koreghongi Eryobha.
Kumanya n‑komuhökëri Kirisito
12 Mbe,
bhahiiri bhaane,
nekwënda mumënyë bhoheene kubha ghoose ghano ghambwine,
ngantooriri chwee kuraghani Angʼana Anchömu.
13 Abhachongi bhoose bha nyumba e ghitëmi,
haghirohamu na abhande bhoose bhano bhaanyi hano,
mbeeche kubha nibhöhuru gho kubha nekomuhökëri Kirisito.
14 Haghirohamu na ghayo,
nyeeche kubha okubhöhu koone ino,
nkobhaköriri abhakumi bhaghëndi bhiito bhaaru bhaköngʼi chaakörö kwo Mutëmi Yesu,
koru mbakobharaghaneri abhaato angʼana e Kirisito kwo bhosubhesubhe,
koru bhataanyi na ahaho.
15 M‑mahëënë kubha,
mbaanyi‑ho abhande bhano bhakuraghani Angʼana e Kirisito kwo riihari na kwo mareghe.
Koru hangʼu,
mbaanyi‑ho abhande bhano bhakuraghani kwo mukörö muchömu.
16 Bhano mbaghuköra hangʼu kwo bhosiighi,
bharamënya kubha,
nibhöhuru kubha,
neyiibhatereri Angʼana Anchömu.
17 Amare bhaare bha mareghe,
mbakuraghani Angʼana e Kirisito gho körö e riihari,
koru taanyi gho körö yeero.
Mbakwënda kwëngëra anyaako yaane mo‑kibhöhö.
18 Amare neke eghusakeri?
Angʼana e Kirisito nekuraghanibhu,
ibhe kwo mukörö mobhe hamu kwo mukörö muchömu.
Na neeni gho ghiri e ngʼana iyo neghuchömëru.
Wiiki nekwëndërëra ghuchömëru,
19 gho kubha nyeeche kubha mo‑ghoose ghano ghambwine,
neghotooribhu,
gho kubha moghunsabhera kwo Waryobha,
wiiki Akörö Ahörëëru koru kwo Yesu Kirisito neghontoori.
20 Neghwighomba kwo miigha chwee na neghwitëngʼëra kubha,
nteeghosookibhu gho nchëra yoyoose yiire.
Ibheere kinya eriibhagha erende,
nekwëndërëra ghwiköngʼi kwo bhosubhesubhe kubha,
Kirisito aghongibhu mo‑ghoose ghano neghuköra,
ibhe n‑ghusaagha neenyi muhöru,
hamu ghoku.
21 Ghokoone eni obhuhöru n‑gho Kirisito.
Wiiki neraku,
ghoku koone n‑obhwëra.
22 Amare nërëëndërëra kumanya mo‑se,
nekwëndërëra korighi amakorobhese gha meremo gheene ghino neghuköra.
Ibheere nyaahure riihë?
Koru ntyeche!
23 Nekorutu ghate e mangʼana abhere.
Neghwighomba koru mo‑se ino,
niikare haghirohamu na Kirisito.
Rino niryo nekorighi ichömu chwee ghokoone.
24 Amare,
n‑kumangi chwee eni nyëndërërë kumanya mo‑se gho ghiri yaanyu.
25 Eni neenyi no obhuhëënë bho angʼana ino,
nyeeche kubha nekwëndërëra kumanya mo‑se ino.
Wiiki neekubha haghirohamu na niinyu,
kubha nebhatoorereri muköngʼëri na muchömëru mo‑bhokumi bhoonyu.
26 Hano neekubha haghirohamu na niinyu,
moghuchömëru chwee gho Kirisito Yesu gho kubha,
naakubha antooriri nigharuke bhowaanyu.
27 Angʼana e hëënë n‑kubha,
atëëmö yaanyu irëngʼaane na Angʼana Anchömu e Kirisito.
Hano nekuucha kobharighi hamu nenganga kuucha,
nibhe nerooghu kubha mokwëndërëra kwimeerera muköngʼiiri na kubha no obhumu,
wiiki haghirohamu moonyi gho kunyaakera obhuhëënë bho Angʼana Anchömu bhuno toghokumi.
28 Wiiki nibhe nerooghu kubha,
motaaghotiina koru hasuuhu abhaato bhano bhakobhakörëra anyaako.
Kiyo nikyo ekyërëkërëri kubha ibho mbakwërëkëra ghosireekerera,
amare inyu mokwërëkëra ghotooribhu.
Ghiyo ghyose ne emeremo ghe Ryobha.
29 Motahaabhuru komokumi Kirisito okwene,
amare muhaabhuru koru kunyaakibhu gho ghiri yaache.
30 Eriihë reenyu n‑diire riire neere nerarööna naryo,
kinya morooche.
Wiiki koru ibheere mokooghu kubha nekwëndërëra kurööna.