Anyaarubha e Bhawuro kwo
Bhaebheeso
Amakëërani
1
Anyaarubha ino neyandëkiri eni Bhawuro,
uno nebherekiiru kubha omotomu o Yesu Kirisito,
kwo mënda gha Ryobha.
ˆNekabhaandëkëra inyu abhatööbhiyu bha Ryobha bhano mumanyiri Ebheeso,
bhano momokumiri Kirisito Yesu.
2 Nëköbhëëndëra aghareeya no omurëmbë koru kwo Waryobha Taata wiito na kwo Mutëmi wiito Yesu Kirisito,
ghibhe haghirohamu na niinyu.
Orubhango ro mo‑Körö gho kohetera Yesu Kirisito
3 Mbe,
reghongibhu Eryobha,
Taata o Mutëmi wiito Yesu Kirisito!
Iryo niryo retoheere orubhango ro mo‑chaakörö ro manga maaru mo‑se ino etaakorighibhu gho nchëra e ghughöötana kwito na Kirisito.
4 Hano Eryobha reere rekeere ghutëëma ase ino,
꞉ndeetwahwire tubhe abhaato bhaache gho ghughöötanibhu na Kirisito kubha,
tubhe abhatööbhiyu na totaanyi ni isörö ambërë yaache.
Kwo bhosiighi bhooche,
5 ꞉nëëndiri korwera kare ghototoora itu,
tubhe abhaana bhaache gho nchëra e Yesu Kirisito.
꞉Ndiiköriri hangʼu,
gho ghuchömëru na kwënda kooche eryene.
6 Gho ghayo,
toreghongi Eryobha gho ghareeya yaache ino retoheere kwo bhwaru gho kohetera Omoona waache omosiighani.
7 Eryobha ndetotingwiri gho nchëra e masaahë gha Yesu Kirisito,
niko kobhugha ndetwabhiire amasari ghiito ghoose,
kurëngʼaana no obhwaru bho ghareeya yaache.
8 Eryobha ndetoheere aghareeya kwo bhwaru,
na amangʼiini ghoose no obhumënyi bhoose.
9 Iryo ndehikeriini ghaare reere kwënda gho nchëra e Yesu Kirisito.
꞉Ndiiköriri hangʼu gho kubha,
nibhu ꞉reesiighiri retumënyi amangʼana ghaache ghano reere rebhisiri.
10 Amangʼana ghano ndeghoghahikeerani kwo riibhagha reeche,
ndekobhetoora ebheghiro bhyose bhe Mwishaaro na bhe mo‑se mo‑bhukangati bho Kirisito.
11 Eryobha ndehaaköra ghoose kurëngʼaana na amënda ghaache.
Iryo ndetwahwire itu Abhayahuuti korwera kare,
kubha tubhe abhaato bhaache gho nchëra e ghughöötana kwito na Kirisito.
12 ꞉Ndiiköriri hangʼu,
gho ghiri yiito itu Abhayahuuti bhano ꞉tuushamiri komwitëngʼëra Kirisito,
Eryobha reghongibhu kwo bhokumi bhooche obhokoro.
13 Inyu bhoose abhaato bha matöngö,
꞉muughöötiine na Kirisito hano mooghwire angʼana e hëënë na koyekumi,
niyo Angʼana Anchömu e bhotoori bhoonyu.
Eryobha ryose gho kwërëki kubha inyu na abhaato bhaache moonyi,
rekabhatoorera ekingʼöchö gho kobhaha Akörö Ahörëëru ino ꞉reeturaghiire.
14 Akörö iyo niyo ekimanyenkereri kiito ghe kubhöna ghoose ghaare Eryobha ꞉reeturaghiire itu abhaato bhaache.
a Akörö iyo nekuhëënëhi kubha,
Eryobha ndeghototingori inkongʼorimu,
bhoose bhano toonyi abhaato bhaache.
Toreghongi gho ghiri e bhokumi bhooche obhokoro.
Amasabhi gha Bhawuro
15 Nekoriitabheri Eryobha gho ghiri e mangʼana ghoose ghano ꞉reetuköriire.
Korwera hano nyoghwire kebhuno momokumiri Omutëmi Yesu,
na kinya obhosiighi bhoonyu bhoonyi kwo bhaato bhaache,
16 nteeghotigha koriitabheri Eryobha gho ghiri yaanyu,
na kobhahiita mo‑masabhi ghaane.
17 Nekwëndërëra korisabha Eryobha re Mutëmi wiito Yesu Kirisito,
Taata o bhokumi obhokoro,
abhahë inyu Akörö yaache kubha mubhe na amangʼiini no obhohunyurëru,
motore korimënya bhoheene.
18 Kurëngʼaana na kubha Eryobha ndebhatooriri korimënya,
neghusabha rebhatoori kumënya eriitëngʼërö rino ꞉moosongʼaaniri eriibhagha rino rebhabherekiire.
Wiiki motore kumënya obhwame bho ghabho yaache kwo bhatööbhiyu,
19 no obhotoro bhooche obhokoro bhuno bhotaakurëngʼaanibhu ne egheghiro gho ghiri yiito itu bhano toghokumi.
Obhotoro bhuyo bhoghuköra emeremo moose yiito,
m‑bhonga changuru cheeche inkoro chwee
20 chino ꞉riihökiiri hano remoryokiri Kirisito koru mo‑bhaku,
na rekamotoora mo‑kubhökö kooche gho kwiro Mwishaaro.b
21 Iyo Kirisito naghukangata ighoro e bhakangati bhoose bha bhotoro na changuru.
Naghukangata ighoro e manga ghoose gha bhukangati bhuno bhoghutaru hano mo‑se na mo‑se ino ekuucha.
22 Eryobha ndetooriri ebheghiro bhyose bhibhe haase e bhukangati bho Yesu na ndemotooriri mo‑riikanisa arikangate,
iwe uno anyi omokoro ighoro e bheghiro bhyose,
kinya omutu mo‑mobhere.
23 Eriikanisa n‑omobhere o Kirisito,
iryo n‑obhohikeerani bho Kirisito uno akohikeerani ebheghiro bhyose.c