Obhohuuru bho Mokirisito
5
Kirisito natotooriri koru mo‑bhusësë kubha tubhe huuru inkongʼorimu.
Gho ghayo,
mwimeerere muköngʼiiri,
motiishereri ghugharuka wiiki mo‑bhusësë bho meghiro.
2 Mutëghëërërë kino eni Bhawuro nekobhabhoorera!
Aribha moriishereri ghusaaru gho ghiri e ghughööta emeghiro,
hayo Kirisito taakubha ne ekebhune ghyokyose ghokoonyu.
3 ˆNekabhabhoorera haheero wiiki kubha,
omosubhe wowoose uno aghwishereri ghusaaru,
nakwëndëru aghöötë emeghiro ghyose ghe Musa.
4 Aribha moghwitëngʼëra mokubharu kubha abhahëënë ambërë e Ryobha gho ghughööta emeghiro,
mumënyë kubha mwiyahwire gho Kirisito,
na moonyi kurë na aghareeya e Ryobha.
5 Amare itu,
kino toghwitëngʼëra kwo bhotoro bho Körö Ahörëëru n‑kubha,
Eryobha ndeghotubhara kubha abhaato abhahëënë,
gho kubha ntokomokumi Yesu.
6 Mbe,
aribha tughöötiine na Kirisito Yesu,
ghusaaru hamu kwanga ghusaaru ghotaanyi ne ekebhune ghyokyose.
Egheghiro ke bhwëra n‑obhokumi bhwito bhuno bhohaaköra emeremo kwo bhosiighi.
7 Ekimbërë,
moore moraköra bhoheene!
Ibheere n‑niwe abharëkiri motaghööta ameeghi gha bhuhëënë?
8 Oghotebhitebhi kuyo ghotaakoru kwo Waryobha uno abhabherekiire.
9 Amare mumënyë kubha,
ameeghi gha bhuröngö ghayo,
nganga kinya ekimëra ghesuuhu kehaatöti obhotu bhwaru!a
10 Nyeeche kubha inyu mughöötiine no Omutëmi Yesu,
gho ghayo,
neghwitëngʼëra kubha,
motaaghwishereri kongʼiinu.
Amare omooto wowoose uno akobhangʼiina,
koru nangabha we,
nakuröönu.
11 Abhahiiri bhaane,
abhaato abhande mbakobhugha kubha,
eni nekuraghani kubha,
abhasubhe bhoose mbakwëndëru bhasaaru.
Aribha mahëënë kubha nekuraghani hangʼu,
ngwake ibheere Abhayahuuti bhakunyaaki?
Aribha nengabheere neraraghani hangʼu,
kuraghani koone ighoro e roko ro Yesu Kirisito mo‑musarabha,
ghotangaghëriri Abhayahuuti bhandeghe.
12 Neghwighomba kubha abhaato bhano bhakobhabhurugha kwo mangʼana gha ghusaaru,
nengabheere bhoheene bhiiture abheene!
Kumanya kwo bhotoro bho Körö Ahörëëru
13 Abhahiiri bhaane,
Eryobha ndebhabherekiire kubha mubhe no obhohuuru.
Amare motahökëri obhohuuru bhoonyu kinya omweya o ghutambana amiigha ghaanyu amabhe,
amare musakerani kwo bhosiighi.
14 Emeghiro ghyose ghe Musa ngighöötiine mo‑moghiro umu hangʼu,
nawe niwe uno,
“Omosiighe omwatani waacho,
kinya bhuno wisiighiri iye omwene.”b
15 Amare aribha mokoromana na kwiyire kinya chatyenyi,
mwikabhaahe kubha motaacha ghwisireekereri.
16 Mbe,
kino nekobhabhoorera n‑kubha,
eriimanya reenyu rikangatu na Akörö Ahörëëru.
Moraköra hangʼu,
motaaghutambana wiiki amiigha ghaanyu amabhe.
17 Nekobhabhoorera hangʼu,
gho kubha bhyose bhino amiigha ghaanyu amabhe ghaghwighomba,
bhetaanyi kinya bhuno Akörö Ahörëëru ekwënda,
na bhuno ekwënda,
taanyi kinya bhuno amiigha ghaanyu ghaghwighomba.
Akörö Ahörëëru na amiigha amabhe bhetaaghukangatani haghirohamu,
gho ghiri iyo motaaghotora ghuköra ghyokyose kino mokwënda.
18 Amare morakangatu na Akörö Ahörëëru,
motaanyi haase e meghiro kinya abhasësë.
19 Mbe,
amangʼana ghano ghaghuköru na amiigha amabhe ghano ghaanyi haheero,
nigho ghano,
obhutaari,
no obhoghonchu,
na ghuköra amangʼana gha chaasoni,
20 na ghusëngëra asanaamu,
no obhoturutumbi,
no obhobhisa,
no obhurööni,
no obhusööhu,
ne eriihari,
na ghukarara,
ne eriibhutu,
na kwanga koghwana,
na kwibhora amangʼana,
21 no obhwighombi bho bheghiro bhe bhande,
no obhurëëbhi,
no obhohobhaaru na amangʼana aghande ghoose ghano ghatuubhiine na ghayo.
ˆNekabhabhoorera wiiki kinya bhuno neere nebhabhooriire kubha,
abhaato bhano bhahaaköra amangʼana ghayo,
bhataaghughabha ghyokyose mo‑bhutëmi bho Ryobha.
22 Amare aribha toghukangatu na Akörö Ahörëëru,
ntookubha ne eriikorobhese re Körö Ahörëëru.
Eriikorobhese riyo n‑obhosiighi,
na ghuchömëru,
no omurëmbë,
no obhoghumereri,
no obhuhöriicho,
na ghughënëhi,
no obhuhëënë,
23 no obhuhörëëru ne ekirëngërë.
Toonyi‑ho omoghiro uno okwanga omooto ataköra amangʼana ghayo.
24 Abhaato bhano bhaghöötiine na Kirisito Yesu,
bhatahakangatu na simoka yaabho e masari haghirohamu na amiigha ghaabho amabhe.
N‑kinya bhamambiri simoka yaabho e masari mo‑musarabha o Yesu.
25 Akörö Ahörëëru netoheere eriimanya eriihë,
mbe,
tutambane obhukangati bhooche.
26 Totiihacha bhoowa,
totanaahana koru korigherani eriihari.