Ghotoorani na ghuköra amachömu
6
Abhahiiri bhaane,
aribha moramënya kubha mughëndi waanyu nataasiri,
inyu bhano moghukangatu na Akörö Ahörëëru,
momoshaangʼi na komuhööcha kwo bhuhörëëru.
Amare mwikabhaahe,
motaacha ghusakibhu kubha na atëëmö kinya e yaache.
2 Mubhe moratoorani gho ghusakerani obhorito bho merigho gheenyu.
Niho mokohikeerani emeghiro ghe Kirisito.a
3 Mbe,
omooto wowoose uno akwirighi kubha no obhwëra ghokera bhaghëndi bhaache,
uyo taanyi no obhwëra bhobhoose,
nakwingʼiina.
4 Omooto woose isunche atëëmö yaache omwene.
Aribha omooto aghuköra amachömu,
hayo naghotora kwihachera amangʼana amachömu ghano aköriri.
Amare atirëngʼaani na amangʼana ghano omooto owonde aköriri,
5 gho kubha omooto woose nakwëndëru ghughëgha omorigho waache omwene.
6 Omooto uno akweghibhu angʼana e Ryobha,
nakwëndëru abhe aramuhööhi omweghi waache ebheghiro ebhichömu bhino akubhöna.
7 Motingʼiina,
Eryobha retaaghochebhoru.
Kino omooto akwemi,
nikyo aghughësa.
8 Mbe,
omooto uno aghutambana amiigha ghaache amabhe,
naghughësa ghosireekereru na amiigha ghayo.
Amare uno aghutambana Akörö Ahörëëru,
naghughësa koru gho Körö Ahörëëru obhuhöru bho miishe ghyose.
9 Gho ghayo,
totatamu ghuköra amaköri amachömu!
Aribha toraghumereri ghuköra amachömu,
ntoghughësa bhoheene eriibhagha re mughësö rerahika.
10 Mbe,
eriibhagha ryoryose torabha no omweya,
tobhakörërë abhaato bhoose amachömu,
amare ahanene abhakumi bhaghëndi bhiito.
Amëërëkërëri gha kumareereri
11 Mumööhi kinya nyandëkiri kwo mandëkö amakoro,
gho kubhökö koone eni mwene.
12 Abhaato bhano bhakobhahaamereri inyu musaaru,
mbakwënda hangʼu kubha,
bhasooku na Abhayahuuti.
Mbakwënda bhataacha kunyaakibhu gho ghiri e kuraghani angʼana ighoro e roko ro Kirisito mo‑musarabha.
13 Bhano bhasaaruru,
koru ibho bhataaghughööta emeghiro ghyose.
Egheghiro kino bhakwënda n‑kubha inyu musaaru,
kubha bhiihachere oghusaaru koonyu.
14 Amare eni nteekwënda kubha ne egheghiro ghe kwihachera,
nanyinga oroko ro Mutëmi wiito Yesu Kirisito mo‑musarabha.
Kurëngʼaana na oroko rooche,
amangʼana ghoose gha se ino ghataanyi no obhwëra bhobhoose ighoro yaane.
Eriimanya reene re kare,
꞉ndiimamburu nawe mo‑musarabha.
15 Ghusaaru hamu kwanga ghusaaru,
ghotaanyi ne ekebhune ghyokyose.
Egheghiro ke bhwëra n‑ghuköru obhuhë ne Eryobha.b
16 Omurëmbë ne ebheghongi bhino bheekoru kwo Waryobha bhibhe na abhaato bhoose bhano bhakwënda obhuhëënë bhuyo,
bhayo nibho abhaato bha Ryobha.c
17 Mbe,
korwera ibheere omooto wowoose ataanyaaki wiiki,
gho kubha eni neenyi na amamööha mo‑mobhere waane gho ghiri e komuhökëri Yesu.
18 Abhahiiri bhaane,
aghareeya e Mutëmi wiito Yesu Kirisito,
ibhe haghirohamu na niinyu.
Hawubhaabha.