Abhagharatiya 4

Mbe, angʼana ino nekwënda kobhabhoorera n‑kubha, wowoose uno aghughabha obhwame bhwi ishe akeere omoona, naakubha kinya omusësë, nangabha obhwame bhoose m‑bhobhooche. 2 Eriibhagha riyo ryose, omughabhi nahaabha anyi haase e murëri na abhaato bhano bhiimeereriire obhwame bhooche, mbagha eriibhagha rino ishe are arëngiri rehike. 3 Hangʼu hangʼu na niitu eriibhagha rino Kirisito are akeere kuucha, ntoore kinya abhaana, ntoore abhasësë bha chaakörö chino cheghukangata ase ino. 4 Amare eriibhagha rino rirënguru hano rehikiri, Eryobha rekamotoma Omoona waache mo‑se ino. Omoona waache akiibhoru no omukari kinya itu, akamanya haase e meghiro ghe Musa. 5 ꞉Naatomuru kubha atotingori bhano toore abhasësë bha meghiro ghe Musa. ꞉Naaköriri hangʼu, kubha itu bhoose tuköru abhaana bha Ryobha.

6 Eryobha ꞉ndeetomiri Akörö e Moona waache mo‑metema ghiito, gho kubha itu ntoonyi abhaana bha Ryobha. Akörö iyo niyo eghotuköra torebherekere Eryobha “Abha,” egheteemoro keeche “Taata.” 7 Mbe, ibheere inyu motaanyi abhasësë wiiki, amare n‑abhaana bha Ryobha moonyi. Gho ghayo, moghosongʼaana aghabho ino Eryobha rebhatooriire abhaana bhaache.

Bhawuro ˆakabhashaangʼi Abhagharatiya

8 Inyu hayo ekeenyuma motarimënyiri Eryobha. Eriibhagha riyo, moore abhasësë bha misambu ghino ghetaanyi Eryobha. 9 Amare ibheere, moryeche Eryobha, na ryose ndebheeche chwee. Ibheere ngwake mokwënda ghugharuka ghusëngëra chaakörö chino cheghukangata ase ino? Chaakörö chiyo chetaanyi no obhotoro hamu ekebhune ghyokyose. Ghasi mokwënda kubha abhasësë bha chaakörö chiyo wiiki? 10 Mokeere mughöötiri chanyangi che Kiyahuuti? Moghosooka chaasiko nyarebhe che wiiki, ne emyëri, na amabhagha ne emeeka, kubha n‑chanyangi che koresooka Eryobha! 11 Neenyi na ahaho ighoro yaanyu kubha, hamwabhe emeremo ghino ꞉niiköriri gho ghiri yaanyu, ngehetiri bhoowa. 12 Abhahiiri bhaane, ˆnekabhasasaama mubhe kinya eni, motabhöhu ne emeghiro, gho kubha eni woose neenyi kinya bhuno inyu moore.

Hano neere haghirohamu na niinyu, motanköriire obhobhe bhobhoose. 13 Mweche kubha hayo ekeenyuma, obhubhabharu bhuno neere nabho, nibho ꞉bhuughëriri nekabhöna omweya o kobharaghaneri Angʼana Anchömu. 14 Nangabha kunyaakibhu kwo mobhere waane ꞉nguughëriri musakibhu, amare inyu motantaraahiri hamu konyanga. Amare kino ꞉muuköriri n‑konyiishereri kinya bhuno mongamwisheriiri o Ryobha, hamu kinya Yesu omwene. 15 Eriibhagha riire moore muchömiiru, ibheere neke ˆghekabhönëka? Neghosiikëra obhuhëënë kubha, eriibhagha riire mongatoriri ghoghiiha amiisho ghaanyu muuhë. 16 Kana, ibheere neekabha omobhisa waanyu gho kubha nekobhabhoorera inyu obhuhëënë?

17 Abhaato bhaare abhande, mbaghwiköngʼi kobhanyaakera, amare taanyi kwo mënda machömu. Mbakwënda kobhaahukani na neeni, kubha inyu mwiköngʼi kobhanyaakera ibho. 18 N‑angʼana inchömu ghwiköngʼi, amare ibhe gho ghuköra amaköri amachömu. Mukörë hangʼu eriibhagha ryose, koru kwo riibhagha rino netaanyi haghirohamu na niinyu. 19 Abhaana bhaane, rino n‑eriibhagha erende wiiki ghokoone kooghu obhororo gho ghiri yaanyu, kinya bhuno obhosongo bhohaamure omukari uno anyi inda, eriibhagha re kwibhora. Nekwiyoghu hangʼu hangʼu, mbagha atëëmö e Kirisito erighibhu mo‑tëëmö yaanyu. 20 Neghwighomba kubha nengabheere haghirohamu na niinyu eriibhagha rino, hamwabhe nengasiikiire na niinyu kwo bhuhörëëru. Neenyi na ahaho chwee gho ghiri yaanyu!

Eghetuubhaani ke Haaghiri na Saara

21 Ibheere momboorere inyu bhano mokwënda ghukangatu ne emeghiro, mweche kinya bhuno emeghiro ghekobhugha? 22 Yandëkuru mo‑Mandëkö Amatööbhiyu kubha, naare na abhaana bhabhere. ꞉Niibhwire umu na Haaghiri uno are omubhaghati waache, no owonde na Saara uno are omukari waache. 23 Omoona o mubhaghati ꞉niibhwiru kwo mënda gha mobhere. Amare omoona o mukari waache, iwe niibhwiru kurëngʼaana ne eriiraghano re Ryobha. 24 Abhakari bhayo bhabhere mbaghotora kwimokibhu kinya eghetuubhaani ke maraghano abhere. Haaghiri n‑eghetuubhaani ke e rimbërë rino riköruru mo‑gheghoro ghe Sinaayi. Abhaana bhaache ꞉mbiibhwiru kinya abhasësë haase e meghiro ghe Musa. 25 Haaghiri nakurëngʼaanibhu ne eriiraghano rino Eryobha ꞉riiköriri mo‑gheghoro ghe Sinaayi mo‑se e Araabhiya. Abhaato bha yi ibheere n‑kinya abhaana bha Haaghiri, n‑abhasësë haase e meghiro ghe Musa, kinya Haaghiri omwene na abhaana bhaache. 26 Amare Saara nakwimeerera e Mwishaaro, uno onyi omoghya huuru, nawe niwe yiima wiito. 27 Mo‑Mandëkö Amatööbhiyu, yandëkuru ighoro yaache kubha,

“Uchömëru iye omoghomba

uno otaaghotora kwibhora,

tiiri eriiraka iye uno otaamara kooghu

obhosongo bho kwibhora,

gho kubha abhaana bha mukari

uno atighuru no omosubhe m‑bhaaru,

ghokera bha uno akwiruru.”

28 Mbe, ibheere abhahiiri bhaane, inyu n‑abhaana bha Ryobha moonyi kurëngʼaana ne eriiraghano reeche, kinya Isaka are. 29 Amare mo‑chaasiko chiire, omoona uno ibhwiru kwo mënda gha mobhere, ꞉naamunyaakiri omoona uno ibhwiru kwo obhotoro bho Körö Ahörëëru. Chaasiko chino, abhaato bhano bhaanyi haase e meghiro mbakobhanyaaki hangʼu hangʼu inyu bhano moonyi huuru. 30 Amare Amandëkö Amatööbhiyu ghabhughabhu? Ngakobhugha kubha, “Omuhëëbhë omukari omubhaghati haghirohamu no omoona waache, gho kubha omoona o mubhaghati, taaghotora ghughabha haghirohamu no omoona o omukari uno iyabhaariri.” 31 Gho ghayo, abhahiiri bhaane, itu taanyi abhaana bha mubhaghati toonyi, amare itu n‑abhaana bha mukari o mahëënë.