Abhagharatiya 3

Abhakumi mbasongʼaaniri Akörö e Ryobha gho ghokumi

Inyu Abhagharatiya abharaghaanu! N‑niwe abharoghiri? Yesu ꞉naaghamburu haheero ambërë yaanyu kubha namamburu. 2 Nekwënda kwegha angʼana imu koru ghokoonyu. Kana, mosongʼaaniri Akörö Ahörëëru gho ghughööta emeghiro, ghasi gho ghokumi ghaare mooghwire ighoro e Yesu? 3 Kana, ngwake ˆmookabha abharaghaanu hangʼu? ꞉Muusëëmiri ghoose gho changuru che Körö Ahörëëru, kana, ibheere mokwënda kumareereri gho changuru cheenyu inyu bheene? 4 Kana, amangʼana ghoose ghano ꞉ghaabhabhwine, moghwituuri kubha n‑gha bhoowa ꞉ghaare? Mahëënë ghataare gha bhoowa! 5 Kana, Eryobha ndebhaheere Akörö yaache na ghuköra ebheroghooro ghateghate yaanyu gho ghoghosooka emeghiro, ghasi gho kubha ꞉mookumiri Angʼana Anchömu ighoro e Yesu?

6 Mwihëëbhë amangʼana gha . Amandëkö Amatööbhiyu ngakobhugha, “꞉Naarekumiri Eryobha, ryose kwo ngʼana iyo rekamubhara kubha omuhëënë ambërë yaache.” 7 Ibheere mbe, mumënyë kubha abhaato bhano bhakorekumi Eryobha, nibho abhaana bha Abhurahamu bha hëënë! 8 Amandëkö Amatööbhiyu ꞉ngëërëkiri korwera kare kubha, Eryobha ndekobhabhara abhaato bha matöngö kubha abhahëënë ambërë yaache gho ghokumi koobho. Eryobha ꞉ndiikangatiri komuraghaneri Abhurahamu Angʼana Anchömu kubha, “Kohetera ghokoocho, abhaato bha matöngö ghoose mbaghwitabheru.” 9 Mbe, abhaato bhano bhaghokumi Eryobha, mbahiitabheru, kinya bhuno Abhurahamu ꞉itabhiiru gho kubha ꞉naakumiri.

Abhakumi mbatooriibhu koru mo‑riihiimo re meghiro ghe Musa

10 Amare bhoose bhano bhaghwitëngʼëra ghotooribhu gho ghuköra ghano ghakwëndëru ne emeghiro ghe Musa, bhayo bhiihiimuru. Amandëkö Amatööbhiyu ngakobhugha kubha, “Wowoose uno ataaghughööta na ghuköra ghoose ghano ghaandëkuru mo‑ghitabhu ke meghiro, niihiimuru.” 11 Obhuhëënë n‑kubha taanyi‑ho omooto uno akubharu kubha omuhëënë ambërë e Ryobha gho ghughööta emeghiro ghe Musa, gho kubha Amandëkö Amatööbhiyu ngakobhugha, “Uno anyi omuhëënë, nakumanya kwo bhokumi.” 12 Emeghiro ghe Musa ghetaaghwitëngʼëra obhokumi, amare ngeghwitëngʼëra amaköri gha mooto ghano aghuköra. N‑kinya bhuno Amandëkö Amatööbhiyu ghakobhugha, “Omooto uno aghuköra ghano ghakwëndëru ne emeghiro, naakubha no obhuhöru gho ghughööta emeghiro ghiyo.”

13 Kirisito natotingwiri koru mo‑riihiimo re meghiro gho kwimoki eriihiimo riyo gho ghiri yiito. Amandëkö Amatööbhiyu ngakobhugha, “Wowoose uno amamburu mo‑musarabha, niihiimuru.” 14 Natotooriri, kubha orubhango runo ahaabhuru Abhurahamu, robhahikere abhaato bha matöngö kohetera Yesu Kirisito. Mbe, ibheere itu bhoose ntoghotora ghosongʼaana Akörö Ahörëëru ino Eryobha ꞉riiraghiri ghotuha gho nchëra e komokumi Yesu Kirisito.

Eriiraghano re Ryobha kwo Abhurahamu ne emeghiro ghe Ryobha kwo Musa

15 Abhahiiri bhaane, tigha neruusi eghetuubhaani. Tobhughe kubha mbaanyi‑ho abhaato bhabhere bhiishereriini ighoro e ngʼana nyarebhe. Erabha amiishererani ghaköruru na ghotooru omohuuri, taanyi‑ho omooto aghotora kwanga hamu kwëngëra ghyokyose mo‑miishererani ghaabho. 16 Mbe, Eryobha ꞉ndiiraghiri kwo Abhurahamu sookoro wiito, haghirohamu no orwibhoro rooche. Amandëkö Amatööbhiyu ghataakobhugha kubha, “Na gho chanyiibhoro cheeche,” egheteemoro keeche n‑kubha, taanyi bhaaru, amare ngakobhugha, “No orwibhoro rooche,” egheteemoro keeche n‑kubha, n‑umu, niwe Kirisito. 17 Kino nekwënda kobhugha n‑kubha, Eryobha ꞉ndiiköriri eriiraghano reeche emeeka amaghana ane na miröngö etato, emeghiro ghe Musa ngeere ghekeere kubha‑ho. Gho ghayo, emeghiro ghiyo ghetaaghotora ghusari eriiraghano riyo koru ghugharura reeche. 18 Aribha abhaato bhangasongʼaaniri aghabho yaabho koru kwo Waryobha gho ghughööta emeghiro, mbe, aghabho iyo tengatoriri wiiki ghwitëngʼëra eriiraghano re Ryobha. Amare Eryobha, gho ghareeya yaache, ꞉ndeemoheere Abhurahamu aghabho e riiraghano gho kubha ꞉ndeemuraghiire.

19 Ibheere, emeghiro ngeenyi ne emeremo ke? Emeghiro ngyengiiru gho ghiri e kwërëki amasari gha bhaato, mbagha eriibhagha rino akuucha omwibhoru o Abhurahamu, uno Eryobha ꞉reemuraghiire kubha nakuucha. Emeghiro ghiyo, Eryobha ꞉ndeemoheere Musa kohetera kwo , na Musa akabha omorwachi ghate e Ryobha na abhaato bhaache. 20 Omorwachi nahëëndëru hano chambaara ibhere cheghuköra eriiraghano. Amare Eryobha n‑ndimu, iryo eryene ꞉ndiiköriri eriiraghano na Abhurahamu, hayo taanyi‑ho omorwachi.

21 Kana, emeghiro ghetaakoghwana na ghano Eryobha ꞉riiraghiri? Tiyaanyi! Aribha bhongabheere‑ho obhotoro bho meghiro kobhaha abhaato obhuhöru, mbe, ntongatoriri kubharu kubha abhaato abhahëënë ambërë e Ryobha gho ghughööta emeghiro. 22 Amare taanyi hangʼu keenyi. Amandëkö Amatööbhiyu ngakobhugha, abhaato bhoose mbaanyi haase e bhukangati bho masari. Gho ghayo, Eryobha ꞉ndiiraghiri kobhaha kino reere riraghiire bhoose bhano bhakomokumi Yesu Kirisito.

23 Eriibhagha rino abhaato ꞉bhaare bhakeere komokumi Yesu Kirisito, emeghiro ꞉ngeetuköriri kubha abhasësë bhaache. Ntoore toraghanya eriibhagha rino obhokumi ighoro e Yesu Kirisito bhongahunywiru. 24 Emeghiro ngeere gheratukangata kinya omurëri wiito, mbagha eriibhagha rino Kirisito ichiri. Gho ghayo, gho komokumi Kirisito okwene, ntokubharu kubha abhaato abhahëënë ambërë e Ryobha. 25 Amare ibheere, obhokumi ighoro e Yesu Kirisito mbumariri kohika, gho ghayo, totaanyi wiiki haase e meghiro, ghino gheere gheraturëra. 26 Ibheere inyu bhoose n‑abhaana bha Ryobha moonyi gho nchëra e ghokumi koonyu, gho kubha mughöötiine na Kirisito Yesu. 27 Inyu bhoose bhano mubhatiisuru, mughöötiine na Kirisito, mubheere kinya momobheekiri Kirisito. 28 Gho ghayo, bhotaanyi‑ho obhwahukani ghate e Muyahuuti no omooto o matöngö, hamu omusësë no omooto huuru, hamu omosubhe no omukari. Bhoose murëngʼiine, gho kubha mughöötiine na Kirisito Yesu. 29 Erabha inyu na abhaato bha Kirisito moonyi, mbe, m‑bha rwibhoro ro Abhurahamu moonyi, na mokubhöna aghabho ino Eryobha ꞉riiraghiri.