Abhakangati bha Yerusareemu ˆbhaghiishereri ameeghi gha Bhawuro
2
Hano emeeka ikomi ne ene ghehetiri,
neghatiira wiiki ghuye Yerusareemu.
Neeghaye haghirohamu na Bharinaabha,
nekamwimoki na Tiito tokahinana nawe.
2 ꞉Neetiiriri ghuye Yerusareemu kwo riibhagha riyo,
gho kubha Eryobha ndeere rehunyuriire kubha,
neghi nitëmëërane kibhacho na abhakangati bha riikanisa,
nebhabhoorere abhakangati bhayo ighoro e Ngʼana Anchömu ino neere neraraghaneri abhaato bha matöngö.
꞉Nyëëndiri kobhabhoorera ghayo,
kubha emeremo ghino neere neraköra na ghino nguköra ghetaacha kubha ghe bhoowa.
3 Bhaghiishererani na neeni.
Koru mughëndi waane Tiito nangabha are Omoyunaani,
tahameriiru ghusaaru.
4 Angʼana iyo e ghusaaru ꞉neebhooruru na abhaato bhano ꞉bhiiköri kubha m‑bhaghëndi bhiito,
amare ꞉mbiisöhiri kwo bhongʼiiningʼiini ghwisuncha obhohuuru bhwito bhuno toonyi nabho gho ghughöötana na Kirisito Yesu.
Ekebhune keebho nkeere ghotuköra tubhe abhasësë bha meghiro ghe Musa.
5 Amare totiishereriini nabho koru hasuuhu.
Ntuköriri hangʼu kubha tochonge obhuhëënë bho Ngʼana Anchömu bhusaaghe na niinyu chaasiko choose.
6 Amare abhakangati bhaare bha riikanisa bhano bhaghosooku chwee na abhaato,
bhataare na angʼana yoyoose ahë e komboorera.
M‑mahëënë mbasookuru chwee,
amare ghokoone eni ghayo ghataanyi ne ekebhune ghyokyose gho kubha Eryobha retaanyi no obhwingʼaheri.
7 Amare mbamënyiri kubha Eryobha ndeere rentomiri kuraghani Angʼana Anchömu mo‑bhaato bha matöngö,
kinya bhuure Bheetero are atomuru kuraghani mo‑Bhayahuuti.
8 Kinya Eryobha ꞉reemusakiiri Bheetero kubha omotomu waache mo‑Bhayahuuti,
hangʼu nibhu ꞉rinsakiiri eni woose kubha omotomu waache mo‑bhaato bha matöngö.
9 Mbe,
Yakobho na Bheetero na Yohana,
bhano ꞉bhaare abhakoro bha bhakangati bha riikanisa,
bhakamënya kubha Eryobha niryo reheere emeremo ghiyo gho ghareeya yaache.
Bhaghatughööta amabhökö eni na Bharinaabha,
kwërëki kubha ntoonyi no obhumu nabho.
Toghiishererani kubha,
itu toghi kuraghani Angʼana Anchömu mo‑bhaato bha matöngö,
nabho bhasaaghe bharayiraghani mo‑Bhayahuuti.
10 Abhakangati bhayo mbatusabhiri angʼana imu hangʼu kubha,
tubhe torahiita abhahabhe bhano bhaanyi ghate e bhakumi bha iyo Yerusareemu.
Na neeni neghwiköngʼi chwee ghuköra angʼana iyo.
Bhawuro ˆakamoshaangʼi Bheetero
11 Mbe,
hano Bheetero ahikiri Antiyokiya,
orosiko rumu nekamoreghesi haheero,
gho kubha naare ataasiri.
12 Eriibhagha Bheetero ahikiri hayo,
naare araraaghëra haghirohamu na abhaato bha matöngö bhano bhaare bhakumiri.
Amare hano abhaato nyarebhe bhahikiri koru o‑Yakobho,
akiyaahura mo‑bhakumi bhayo,
aghatigha kuraaghëra nabho.
꞉Naaköriri hangʼu,
gho kubha ꞉naatiiniri abhaato bhano ꞉bhaare bharakumereri kubha,
abhaato bhoose bhano bhakumi mbakwëndëru bhasaaru.
13 Koru abhakumi abhamu bha Kiyahuuti bhaakabha chaghughuuti kinya Bheetero.
Bharinaabha woose aghaghöötana nabho mo‑mabhe ghayo.
14 Mbe,
hano nerooche kubha bhataaghuköra kinya obhuhëënë bho Angʼana Anchömu bhoonyi,
nekamobhoorera Bheetero haheero kubha,
“Iye n‑Omuyahuuti,
amare nohaaköra kinya abhaato bha matöngö bhaghuköra.
Ngwake ibheere okuhaamereri abhaato bha matöngö ghutambana chaasughara che Bhayahuuti?”
Abhaato bhoose mbaghotooribhu gho ghokumi Yesu Kirisito
15 M‑mahëënë kubha itu ntwibhwiru toonyi Abhayahuuti,
totaanyi abhaato bha matöngö bhano tokobhabherekera “abhaköri bha masari.”
16 Amare itu ntweche kubha,
omooto taaghotora kubharu kubha omuhëënë ambërë e Ryobha gho ghughööta emeghiro ghe Musa.
Amare n‑gho komokumi Kirisito Yesu omwene chiri,
niko ghoghughëri omooto abhe omuhëënë ambërë e Ryobha.
Koru itu bhoose,
ntomokumiri Kirisito Yesu kubha tubharu abhaato bha hëënë ambërë e Ryobha gho komokumi Kirisito,
taanyi gho ghughööta emeghiro ghe Musa.
M‑mahëënë kubha taanyi‑ho omooto uno aghotora kubharu kubha muhëënë ambërë e Ryobha gho ghughööta emeghiro ghe Musa.a
17 Mbe,
ntoghutabhara kubharu kubha abhaato bha hëënë ambërë e Ryobha gho ghughöötana na Kirisito,
amare abhaato abhande mbakobhugha kubha itu bhoose ntobheere abhaköri bha masari.
Kana m‑mahëënë kubha Kirisito naghotuköra kubha abhaköri bha masari?
Tiyaanyi!
18 Amare aribha neragharukera ghokumi amangʼana gha kare gho ghughööta emeghiro,
amangʼana ghano neere nyangiri,
hayo ibheere neekubha nitaasiri.
19 Eriibhagha rino neere nighöötiri emeghiro ghe Musa,
emeghiro ngenteniire ekiina.
Amare ibheere nteeghughööta emeghiro ghiyo wiiki,
kubha netore kumanya kinya bhuno Eryobha rekwënda.
20 Eriimanya reene riire re kare ndekuure haghirohamu na Kirisito mo‑musarabha.
Ibheere muhöru neenyi,
amare taanyi eni,
gho kubha Kirisito niwe anyi omuhöru moose yaane.
Obhuhöru bhuno neenyi nabho eriibhagha rino,
nebhughöötë gho ghiri e ghokumi Omoona o Ryobha.
Iwe nansiighiri na akaruusi obhuhöru bhooche ghokoone kubha antoori.
21 Eni ntyangiri aghareeya e Ryobha.
Aribha omooto aghotora kubharu kubha omuhëënë ambërë e Ryobha gho ghughööta emeghiro ghe Musa,
mbe,
Kirisito ꞉naakuure bhoowa!