Anyaarubha e Bhawuro kwo
Bhagharatiya
Amakëërani
1
Anyaarubha ino neyandëkiri eni Bhawuro.
Eni ntetomuru na abhaato hamu kuhatëku no omooto nyarebhe,
amare ꞉neetomuru na Yesu Kirisito na Taata Waryobha uno amoryokiri Yesu koru mo‑bhaku.
2 Eni na abhakumi bhaghëndi bhiito bhoose bhano bhaanyi haghirohamu na neeni hano,
ntokobhakëëri inyu bhano moonyi mo‑makanisa gha Ryobha mo‑mukööwa o Gharatiya.
3 Ntököbhëëndëra aghareeya no omurëmbë koru kwo Waryobha Taata wiito,
na kwo Mutëmi wiito Yesu Kirisito ghibhe haghirohamu na niinyu.
4 Kirisito ꞉naaruusiri eriimanya reeche,
gho ghiri e masari ghiito,
kubha atotoori koru mo‑mabhe ghoose gha se ino yi ibheere.
꞉Naaköriri hangʼu kurëngʼaana na amënda gha Waryobha Taata wiito.
5 Omutëmi aghongibhu emiishe ne emiishe.
Hawubhaabha.
Teenyi‑ho Angʼana Anchömu ayende ino enyi e hëënë
6 Eni nekoroghoora chwee ighoro yaanyu!
N‑eriibhagha ighuhe hangʼu rino rehetiri korwera hano Eryobha rebhabherekiire gho ghareeya e Kirisito,
na ˆmokamara ˆmoghiishoorori na koretigha.
Wiiki ˆmoghiishoororeri ameeghi aghande ghano abhamu bhaghoghabherekera kubha,
n‑Angʼana Anchömu.
7 Obhuhëënë n‑kubha teenyi‑ho Angʼana Anchömu ayende.
Amare mbaanyi‑ho abhaato bhano bhakobhabhurugha na mbakwënda ghugharura Angʼana Anchömu ighoro e Kirisito.
8 Aribha omooto wowoose,
koru aribha n‑itu abheene,
hamu marayika koru Mwishaaro,
araacha abharaghaneri angʼana ino etaakurëngʼaana na ino eni ꞉neebharaghaniiri,
omooto uyo ihiimu ne Eryobha!
9 ˆNeghagharukera kobhabhoorera wiiki,
kinya bhuno ꞉neebhabhooriire eriibhagha riire kubha,
aribha omooto akobharaghaneri angʼana ayende ino etaakurëngʼaana na ino ꞉neebharaghaniiri,
omooto uyo ihiimu ne Eryobha!
10 Ibheere,
mokwihëëbha kubha neghutabhara ghwisherereru na abhaato?
Tiyaanyi,
eni neghutabhara ghwisherereru ne Eryobha eryene chiri.
Ghasi mokwihëëbha kubha neghutabhara ghuchömëri abhaato?
Aribha nengatabhiire kobhachömëri abhaato,
ntengabheere omutamishi o Kirisito.
Bhawuro ˆaghatomu ne Eryobha kuraghani Angʼana Anchömu
11 Abhahiiri bhaane,
nekwënda mumënyë kubha,
Angʼana Anchömu ino eni nekobharaghaneri teruure mo‑bhaato.
12 Angʼana ino ntihaabhuru no omooto wowoose,
koru ntyeghuru no omooto wowoose.
Amare Yesu Kirisito omwene niwe ahunyuriire.
13 Inyu mumariri kooghu kebhuno eriimanya reene reere hayo ekeenyuma,
eriibhagha rino neere neraröönëra atiini yaane e Kiyahuuti.
Mweche kebhuno ꞉neebhanyaakiri chwee abhaato bha riikanisa re Ryobha,
na kwënda kobhasireekereri.
14 ꞉Neebhakeriri abhande bhaaru bhano toore asiigha imu,
gho kuröönëra atiini yiito e Kiyahuuti.
Neghiköngʼi chwee ghughööta ameeghi gha bhataata bhiito.
15 Amare Eryobha,
꞉ndeenyahwire eriibhagha nekeere kwibhoru,
rekamberekera gho ghareeya yaache,
reghiishereri
16 kohunyurera kinya Omoona waache anyi.
꞉Ndiiköriri hangʼu kubha niraghani Angʼana Anchömu ighoro e Moona waache mo‑bhaato bha matöngö.
Eni ntitabhiire omooto wowoose o kundaghereri kino neghuköra.
17 Ntebhughiri kubha,
“Tigha neghi Yerusareemu nerighani na bhaare ꞉bhaankangatiri kubha abhatomu.”
Amare kino ꞉niiköriri neeghaye kimu kimu mo‑se e Araabhiya.
Niiche koru hayo,
neghagharuka wiiki mo‑moghya o Tamaasiko.
18 Hano emeeka etato ghehetiri,
neeghaye iyo Yerusareemu,
kubha nitëmëërane na Bheetero.
a Neghiikara awaache chaasiko ikomi ni ishaano.
19 Amare nterooche omotomu wowoose,
nanyinga Yakobho,
ömööbhö Omutëmi Yesu.
20 Eryobha ndyeche kubha amangʼana ghano nekobhaandëkëra n‑gha hëënë,
taanyi gha bhuröngö!
21 Mbe,
nekamara neeghaye mo‑mikööwa ghe Siiriya na Kirikiya.
22 Eriibhagha riyo,
eni nteere nimënyëkiine na Abhakirisito bha makanisa ghano ghaanyi mo‑mukööwa o Yuteya.
23 Egheghiro kino ꞉bhaare bheeche ighoro yaane n‑amangʼana ghano bhooghwire kubha,
“Omooto uno are aratunyaaki hayo ekeenyuma,
chaasiko chino nakuraghani obhokumi bhuure ꞉ëndiri kobhosireekereri!”
24 Mbe,
bhakareghongi Eryobha gho ghiri e ghano rinköriire.