Yesu ꞉naakindiri changuru che masari
6
Ibheere tobhughe bhu?
Kana,
twëngërë ghuköra amasari,
kubha Eryobha ryëndërërë ghotuha aghareeya yaache kwo bhwaru?
2 Naabha,
koru hasuuhu!
Itu ntubheere kinya abhaku kwo mangʼana gha ghuköra amasari.
Gho ghayo,
totaaghotora kwëndërëra kumanya wiiki mo‑masari.
3 Mumënyë kubha,
hano tubhatiisuru,
toghaghöötana na Kirisito Yesu mo‑roko rooche.
4 Hano tubhatiisuru,
ntoore kinya tokuure na koryeku haghirohamu nawe,
kubha kinya Kirisito aryokiri koru mo‑bhaku gho changuru inkoro che Waryobha Taata,
hangʼu hangʼu,
koru itu ntoghotora kumanya eriimanya eriihë.
5 Kinya bhuno ꞉tuughöötiine na Kirisito mo‑roko rooche,
hangʼu hangʼu koru itu ntoghughöötana nawe gho koryokibhu koru mo‑bhaku kinya iwe.
6 Ntweche kubha eriimanya riito re kare ꞉ndiimamburu haghirohamu na Kirisito mo‑musarabha,
kubha changuru che masari chetatukangata wiiki,
na ghotuköra tubhe abhasësë bha masari.
7 Omooto araku anyi hangʼu,
nabheere omooto huuru,
koru taakubhöhu na amasari.
8 Ibheere gho kubha ꞉ntookuure haghirohamu na Kirisito,
ntoghokumi kubha ntoghwikara haghirohamu nawe.
9 Ntweche kubha Kirisito naryokiri koru mo‑bhaku,
na taaghoku wiiki.
Oroko rotaanyi ni inguru wiiki ighoro yaache.
10 Hano akuure,
꞉naakuure mara rimu hangʼua gho ghiri e ghokinda amasari ghoose.
Ibheere nakumanya gho koretegheri Eryobha.
11 Inyu bhoose,
mubhe moriirighi kubha mokuure haghirohamu nawe,
na amasari ghataaghotora kobhakangata wiiki.
Hangʼu hangʼu,
mubhe moriirighi kubha ibheere m‑bhahöru moonyi,
na mumanyiri gho ghiri e koretegheri Eryobha,
gho ghughöötana na Kirisito Yesu.
12 Gho ghayo,
motiishereri amasari ghakangate emebhere gheenyu ghino ghehaaku.
Motiishereri korutu na amiigha amabhe gha mebhere gheenyu.
13 Motiishereri ebhyemo bhyobhyose bhe mebhere gheenyu bhihökëru gho ghiri e masari kinya ebheghiro ebhebhe,
amare mwiruusi kwo Waryobha.
Mwirighi kubha moonyi abhaato bhano bharyokiibhu koru mo‑bhaku,
na ghusöhibhu mo‑bhuhöru obhuhë.
Mwiruusi kwo Waryobha,
ne ebhyemo bhyose bhe emebhere gheenyu bhibhe bherarikörëra emeremo kinya ebheghiro ebhihëënë.
14 Amasari ghataakobhakangata wiiki,
gho kubha motaaghukangatu no obhotoro bho meghiro,
amare moghukangatu na aghareeya e Ryobha.
Abhasësë bha bhuhëënë
15 Ibheere tobhughe bhu?
Tobhughe kubha twëndërërë ghuköra amasari,
gho kubha totaaghukangatu na changuru che meghiro,
na gho kubha Eryobha ndetoheere aghareeya yaache?
Naabha!
16 Moteeche kubha,
moriiruusi kwo mooto na ghuköra ghano akwënda,
niho mookubha moramosooka kinya abhasësë bhaache?
b Mbe,
kinya mookubha moriiruusi ghuköra amasari,
mookubha abhasësë bha masari,
na kino ghekobhabhöna n‑oroko.
Amare aribha moriiruusi koresooka Eryobha,
mookubha abhasësë bha Ryobha,
na kino ghekobhabhöna n‑eriimanya rino reenyi re bhuhëënë.
17 Kare,
inyu moore abhasësë bha masari.
Amare nekoriitabheri Eryobha,
gho kubha ibheere mwisheriiri kwo metema gheenyu ghyose ghosooka ameeghi gha bhuhëënë ghano ꞉moosongʼaaniri.
18 Nekoriitabheri Eryobha,
gho kubha ndebharuusiri koru mo‑kibhöhö ke masari kubha motabha abhasësë bha masari.
Ndebhaköriri kubha abhasësë bhaache,
kubha mubhe moraköra amangʼana ghano ghaanyi gha bhuhëënë.
19 Nesiikiire na niinyu gho kuhökëri eghetuubhaani kino ke bhasësë,
gho kubha inyu motaanyi bhango kumënya.
Kare,
moore moraruusi ebhyemo bheenyu gho ghuköra amangʼana amaghonchu,
na moore abhasësë bha amasari,
na amasari ghaanyu ꞉ngiiyëëngiire chwee.
Amare ibheere,
moriiruusi ebhyemo bheenyu kwo Waryobha,
mubhe abhasësë bha mangʼana gha bhuhëënë,
kubha morihökëri Eryobha gho körö imu.
20 Kare,
hano moore abhasësë bha masari,
moore huuru kwanga ghuköra amangʼana gha bhuhëënë.
21 Amare n‑obhwëra ke mobhwine kurëngʼaana na amaköri ghaanyu amabhe,
ghano ibheere ghaghughëri morighi chaasoni?
Bhotaanyi‑ho obhwëra bhobhoose!
Antenero e mangʼana ghayo ngakurëëta oroko ro miishe ghyose.
22 Ibheere Eryobha ndebharuusiri koru mo‑kibhöhö ke masari,
kubha motabha abhasësë bha masari wiiki.
Amare ndebhaköriri kubha abhasësë bhaache,
na kurëngʼaana na ghayo mobhwine obhwëra.
Obhwëra bhuyo n‑korihökëri Eryobha gho körö imu na antenero yaache n‑ghosongʼaana obhuhöru bho miishe ghyose.
23 Omooto wowoose uno anyi omusësë o masari,
amareho ghaache n‑oroko ro miishe ghyose.
Amare itu,
Eryobha ndeghotuha obhuhöru bho miishe ghyose.
Obhuhöru bhuyo taanyi amareho,
amare n‑atuho ino toghosongʼaana kohetera Kirisito Yesu,
Omutëmi wiito.