Orubhango ro ghokumi Eryobha
5
Mbe,
Eryobha ndetubhariri kubha m‑bha hëënë toonyi ambërë yaache,
kurëngʼaana no obhokumi bhwito.
Gho ghayo,
ntoonyi no omurëmbë ne Eryobha gho kohetera Omutëmi wiito Yesu Kirisito.
2 Gho nchëra e komokumi Omutëmi Yesu,
Eryobha ꞉ndeetoheere aghareeya yaache.
Koru ibheere ntokwëndërëra ghosongʼaana aghareeya iyo.
Ntoghuchömëru chwee,
gho kubha ntoghwitëngʼëra kubha ntoghusanga haghirohamu ne Eryobha mo‑bhokumi bhooche obhokoro.
3 Koru nangabha anyaako yoyoose yiire eghotubhöna,
itu ntokwëndërëra ghuchömëru,
gho kubha ntweche kubha anyaako nehaarëëta obhoghumereri.
4 Obhoghumereri nibho bhoghoturëëtëra obhosubhesubhe,
no obhosubhesubhe mboghughëri tubhe na amiitëngʼërö.
5 Amiitëngʼërö ghayo ghataaghotora ghotosooki,
gho kubha Eryobha ndehomiri obhosiighi bhooche mo‑metema ghiito,
kohetera Akörö yaacheAhörëëru.
6 Mbe,
hano itu toore tokeere totaanyi ni inguru,
Kirisito ꞉niichiri.
Hano eriibhagha rehikiri,
aghaku gho ghiri yiito abhabhe.
7 Mahëënë,
n‑ghuköngʼu kwo mooto ghwishereri ghoku gho ghiri e bhaato bhano bhaanyi abhahëënë.
Hamwabhe gho ghiri e mooto omuhöriicho,
omooto naghotora akiiruuseri.
8 Amare Eryobha ndetwërëkiri kubha ndetosiighiri chwee,
gho komoruusi Kirisito aku gho ghiri yiito,
hano itu toore tokeere abhaköri bha masari.
9 Ibheere,
aribha tubhariiru kubha m‑bha hëënë,
toonyi ambërë e Ryobha gho nchëra e masaahë gha Yesu Kirisito,
hëënë ntoghotooribhu nawe koru mo‑nchagho e Ryobha.
10 Hano itu toore tokeere abhabhisa bhaache,
Eryobha reghatutëmëërani itu naryo gho kohetera oroko ro Moona waache.
Gho ghayo,
gho kubha ntumariri ghutëmëëranibhu ne Eryobha gho kohetera oroko rooche,
m‑mahëënë ntoghotooribhu koru mo‑nchagho e Ryobha kohetera obhuhöru bhooche.
11 Mbe,
ghokera ghayo ghoose,
Eryobha ndetuköriri tuchömëru chwee,
gho kubha n‑gho kohetera Omutëmi wiito Yesu Kirisito,
tokoghwana ne Eryobha.
Ataamu ꞉naaturëëtiire oroko, amare Yesu natoheere obhuhöru
12 Mbe,
amasari ꞉ngaasöhiri mo‑se kwo mooto umu,
na kwo masari ghayo oroko rokabhönëka.
Kurëngʼaana na ghayo,
abhaato bhoose mbaghoku,
gho kubha bhoose n‑abhaköri bha masari toonyi.
13 Koru korwera hano Ataamu aköriri amasari mbagha hano Musa ahaabhuru emeghiro,
amasari ngaare‑ho hano mo‑se.
Amare Eryobha retabhabhariire abhaato kubha mbaghusari emeghiro,
gho kubha emeghiro ghetaare‑ho.
14 Ibheere,
abhaato bhoose korwera eriibhagha re Ataamu mbagha Musa,
mbaare bharaku.
Oroko ndobhakangatiri,
koru nangabha bhataaköriri amasari gha ghusari emeghiro kinya Ataamu.
Mbe,
Ataamu naare eghetuubhaani ke Yesu Kirisito uno angamariri ache.
15 Amare eriisari re Ataamu retakurëngʼaana na atuho e ghareeya e Ryobha.
Ataamu n‑omooto umu uno aköriri abhaato bhoose bhaku kurëngʼaana ne eriisari reeche.
Amare naanyi‑ho umu,
Yesu Kirisito,
uno akobhaha abhaato bhaaru atuho e ghareeya e Ryobha.
Aghareeya e Ryobha tighöötë ekirëngërë,
neghokera eriisari re Ataamu!
16 Wiiki mboonyi‑ho obhwahukani bhokoro ghate e tuho e ghareeya e Ryobha na ghano gharweriire kurëngʼaana ne eriisari re Ataamu.
Hano eriisari rimu riire ꞉riiköruru na Ataamu,
Eryobha ndeteniire ekiina abhaato na kobhaha anchagho.
Amare hano amasari maaru ghaköruru na abhaato,
Eryobha ndebhabhariire abhaato kubha mbaanyi no obhuhëënë ambërë yaache,
gho ghiri e ghareeya yaache.
17 Eriisari re mooto umu,
꞉ndiighëriri oroko rukangate abhaato bhoose gho kohetera omooto uyo umu.
Amare hëënë ibheere,
abhaato bhoose bhano mbaghosongʼaana atuho e ghareeya e Ryobha ino etaanyi ne ekirëngërë,
mbakubhareru kubha mbaanyi no obhuhëënë ambërë e Ryobha.
Bhayo mbaghukangata mo‑bhuhöru bho miishe ghyose,
kohetera omooto umu,
Yesu Kirisito.
18 Gho ghayo,
kinya bhuno abhaato bhoose ꞉bhaateniiru ekiina kurëngʼaana ne eriisari rimu re mooto,
hangʼu hangʼu abhaato bhoose mbakubhareru kubha mbaanyi no obhuhëënë ambërë e Ryobha,
gho kohetera obhuhëënë bhuno aköriri omooto umu.
Gho ghuköra hangʼu,
abhaato bhoose bhakahaabhu obhuhöru bho miishe ghyose.
19 Omooto umu akaanga koresooka Eryobha,
aghaghëri abhaato bhoose bhabhe abhaköri amasari.
Hangʼu hangʼu,
omooto umu uno asookiri Eryobha,
naghughëri abhaato bhabhe abhahëënë ambërë e Ryobha.
20 Hano emeghiro ghe Musa ghiichiri,
gheghaghëri amasari ghakiyëngëra.
Koru hangʼu,
hano amasari ghëëngiire,
aghareeya e Ryobha yoose ëkëëndërëra kwiyëngëra chwee.
21 Mbe,
eriisari ndeere na changuru che ghukangata abhaato na kobharëëtëra oroko.
Hangʼu hangʼu,
aghareeya e Ryobha nehaakangata abhaato,
gho kobhabharera kubha mbaanyi no obhuhëënë,
na kobhaha obhuhöru bho miishe ghyose,
kohetera kwo Mutëmi wiito Yesu Kirisito.