Abhurahamu naare omuhëënë ambërë e Ryobha kwo bhokumi
4
Mbe,
tobhughe bhu ighoro e Abhurahamu,
taata wiito Abhiisiraeri?
Nibhu Eryobha ꞉reemubhariire kubha omooto uno anyi omuhëënë ambërë yaache?
2 Erabha torabhugha kubha Abhurahamu ꞉naabhariiru kubha omooto omuhëënë ambërë e Ryobha kurëngʼaana na amaköri ghaache amachömu,
niho angabheere ne egheghiro ghe kwihachera.
Amare obhuhëënë n‑kubha,
taanyi na ghyokyose ghe kwihachera ambërë e Ryobha.
3 Amandëkö Amatööbhiyu ngakobhugha kubha,
“Abhurahamu ꞉naarekumiri Eryobha,
ryose kwo ngʼana iyo rekamubhara kubha omooto omuhëënë ambërë yaache.”a
4 Mbe,
hano omooto aghuköra emeremo,
amareho ghaache ghataanyi atuho,
amare n‑egheghiro kino arëngʼaaniire korehu.
5 Amare omooto uno ataaghwitëngʼëra amaköri ghaache,
ararekumi Eryobha rino rekomubharera omooto omobhe kubha omooto omuhëënë,
uyo nakubharu ne Eryobha kubha omooto uno anyi omuhëënë kurëngʼaana no obhokumi bhooche.
6 N‑kinya omutëmi Tawuti ꞉abhughiri ighoro e rubhango ro mooto uno Eryobha rekomubharera kubha omuhëënë ino atamööhëriiri amaköri ghaache.
꞉Naabhughiri kubha,
7 “Mbiitabhiiru abhaato
bhano Eryobha rebhaabhiire amabhe ghaabho,
na kobharuuseri amasari ghaabho.
8 Niitabhiiru omooto uno Omutëmi Waryobha
ataakomubharera naabha amasari ghaache.”b
9 Ibheere,
orubhango ruyo n‑gho ghiri e bhaato bhano bhasaaruru abheene,
hamu koru na kwo bhaato bhano bhatasaaruru?
Nekobhahiiti ghano Amandëkö Amatööbhiyu ghakobhugha kubha,
Eryobha ꞉ndeemubhariire Abhurahamu kubha omooto uno anyi omuhëënë kurëngʼaana no obhokumi bhooche.c
10 Amare ꞉ngaarweriire nyingake?
Eryobha ꞉ndeemubhariire Abhurahamu kubha omooto uno anyi omuhëënë eriibhagha rino are asaaruru,
ghasi hano are akeere ghusaaru?
꞉Ndeemorweriire akeere ghusaaru!
11 Ghusaaru kooche,
n‑ekingʼöchö ke Ryobha ghokooche kubha,
꞉ndeemubhariire obhuhëënë kurëngʼaana no obhokumi bhuno are nabho akeere ghusaaru.
Gho nchëra iyo,
Abhurahamu aghaköru kubha ishe o bhakumi bhoose bhano bhataamara ghusaaru,
kubha bhoose bhabhareru kubha mbaanyi no obhuhëënë ambërë e Ryobha.
12 Hangʼu hangʼu,
Abhurahamu aghaköru kubha ishe o bhaato bhano bhasaaruru,
amare aribha bhararekumi Eryobha,
mbaakubha bharamanya gho ghutambana eghetuubhaani ke Abhurahamu ishe waabho uno ꞉arekumiri Eryobha koru akeere ghusaaru.
13 Eryobha ꞉ndiiraghiri Abhurahamu na abhaato bha rwibhoro rooche kubha,
ndengabhaheere ase yoose ibhe aghabho yaabho.
d Eryobha retaaraghiri hangʼu gho kubha Abhurahamu naare ahikeriini ghano emeghiro ghekwënda,
amare n‑gho kubha naare ararekumi Eryobha.
Niho Eryobha rekamubharera Abhurahamu kubha naanyi no obhuhëënë ambërë yaache.
14 Aribha abhaato bhano bhaanyi ne emeghiro mbangasongʼaaniri ghano Eryobha ꞉reebharaghiire,
gho kubha mbahikeriini ghano emeghiro ghekwënda,
niho obhokumi kwo Waryobha bhotangabheere no obhwëra.
Wiiki,
eriiraghano re Ryobha ndengabheere re bhobhiihi,
15 gho kubha ghusari emeghiro,
ngokurëëta anchagho.
Amare aribha emeghiro ghetaanyi‑ho,
hayo ghotaanyi‑ho ghusari emeghiro.
16 Kiyo nikyo gheghughëri eriiraghano re Ryobha riitëngʼërë obhokumi obhwene,
gho kubha ndeghwitëngʼëra aghareeya yaache.
Gho nchëra iyo,
ghoose ghano bharaghiiru abhaato bhoose bha rwibhoro ro Abhurahamu,
ghabhe gha hëënë,
taanyi kwo Bhayahuuti abheene bhano bhakohikeerani emeghiro,
amare koru kwo bhano bhakorekumi Eryobha kinya bhuno Abhurahamu aköriri.
Abhurahamu n‑taata wiito itu bhoose bhano tokorekumi Eryobha.
17 N‑kinya bhuno Eryobha ꞉reebhooriire Abhurahamu mo‑Mandëkö Amatööbhiyu kubha,
“Neghuköriri kubha ishe o matöngö maaru.”
e Abhurahamu ꞉nooghwire amangʼana ghayo anyi ambërë e Ryobha,
akarekumi Eryobha rino rehaabhaha abhaku obhuhöru,
na rino rehaahatëka ebheghiro bhibhe‑ho bhino bhetaamara bhibha‑ho.
18 Hano Abhurahamu abhooriiru amangʼana ghayo,
ghaakabha maköngʼu chwee ghoghakumi.
Amare akëëndërëra ghokumi na ghwitëngʼëra kubha Eryobha ndekomuköra abhe ishe o matöngö maaru,
gho kubha Eryobha ndeere remobhooriire kubha,
“Abhaato bha rwibhoro roocho mbaakubha bhaaru kinya chanchöta.”f
19 Eriibhagha riyo,
Abhurahamu naare ne emeeka eriighana rimu hangʼu.
꞉Naamënyiri kubha,
omobhere waache noore kinya okuure,
na Saara omukari waache naare moghomba.
Amare,
obhokumi bho Abhurahamu bhotasuuhiri.
20 Wiiki,
taare na ahaho yoyoose ighoro e riiraghano rino Eryobha ꞉reemuraghiire.
Amare akëëndërëra ghuköngʼëri mo‑bhokumi na koreghongi,
21 gho kubha ꞉naamënyiri kwo bhuhëënë kubha Eryobha ndeghotora ghuköra ghaare ꞉reemuraghiire.
22 N‑kurëngʼaana no obhokumi bhuyo,
nikyo Eryobha ꞉reemubhariri kubha omooto omuhëënë ambërë yaache.g
23 Ibheere,
amangʼana ghano ghataandëkuru gho ghiri e Abhurahamu omwene,
24 amare ngaandëkuru koru gho ghiri yiito bhoose.
Amangʼana ghayo ngaghotobhoorera kubha torarekumi Eryobha rino remoryokiri Yesu Omutëmi wiito koru mo‑bhaku,
niho koru itu tokubhareru kubha bhano toonyi no obhuhëënë ambërë e Ryobha.
25 Eryobha ꞉ndeemoruusiri Yesu,
kubha aku gho ghiri e masari ghiito,
na komoryoki koru mo‑bhaku,
kubha itu tubhareru kubha bhano toonyi no obhuhëënë ambërë yaache.