Eryobha n‑ihëënë kwo Bhayahuuti
3
Ibheere aribha hangʼu keenyi,
nkoonyi no obhwëra ke kubha Omuyahuuti?
Na ghusaaru nkoonyi no obhwëra ke?
2 M‑mahëënë,
kubha Omuyahuuti nkoonyi no obhwëra bhwaru.
Angʼana a yimbërë n‑kubha,
Eryobha ndebhaheere Abhayahuuti amangʼana ghaache.
3 Amare Abhayahuuti abhande bhataare abhahëënë gho ghughööta amangʼana ghaache.
Mbe,
tobhughe kubha bhuure ꞉bhaare Abhayahuuti bhayo,
꞉mbaaköriri Eryobha ryose retighe kubha ihëënë gho ghuköra amangʼana ghano ꞉reebhughiri?
4 Tiyaanyi!
Abhaato bhoose m‑bharöngö,
amare Eryobha ndyërëkiri kubha ndeghuköra kino rekobhugha.
N‑kinya bhuno Amandëkö Amatööbhiyu ghakobhugha ighoro yaache kubha,
“Orasëma abhaato kwo masari ghaabho,
amangʼana ghaacho n‑gha mahëënë.
Orabhatenera ekiina,
ghotena ekiina koocho n‑kwo bhuhëënë.”a
5 Amare,
abhaato abhande mbaghotora kobhugha kubha,
“Amasari ghiito itu Abhayahuuti,
nigho ghakwërëki kubha Eryobha n‑de bhuhëënë mo‑ghotena ekiina kooche.
Amare,
aribha Eryobha reghoturööna,
tobhughe kubha Eryobha retaanyi re bhuhëënë inkongʼorimu?”
Neghosiikëra kinya omooto.
6 Tiyaanyi!
Nengabheere hangʼu,
nibhu Eryobha rengabheere no obhuhëënë bho ghotenera ekiina abhaato bha mo‑se ino?
7 Wiiki mbaghotora kobhugha kubha,
“Itu toraköra amasari,
abhaato abhande mbaghotora korighi haheero obhuhëënë bho Ryobha,
nabho mbakwëndërëra koreghongi.
Ibheere,
ngwake tokeere torateneru ekiina kinya abhaköri bha masari?”
8 Iyo n‑kinya kobhugha kubha,
“Tubhe toraköra amasari,
kubha Eryobha rirëëtë amachömu.”
Abhaato abhande mbaghotobhiihera kubha hangʼu tokweghi.
Amare eni neghosiikëra kubha,
abhaato bhayo bhoose mbakuröönu kurëngʼaana na amabhe ghaabho.
Taanyi‑ho omooto uno anyi no obhuhëënë ambërë e Ryobha
9 Mbe,
tobhughe bhu?
Tobhughe kubha itu Abhayahuuti ntoonyi no obhwëra ghokera abhaato bha matöngö aghande?
Tiyaanyi!
Kinya bhuno nimariri kwërëki,
Abhayahuuti na abhaato bha matöngö,
bhoose mbaghotooru haase e bhukangati bho masari.
10 N‑kinya Amandëkö Amatööbhiyu ghakobhugha kubha,
“Taanyi‑ho omooto uno anyi omuhëënë
ambërë e Ryobha,
koru umu.
11 Taanyi‑ho omooto uno akumënya
amangʼana gha Ryobha,
wiiki taanyi‑ho uno aghutabhara korimënya.
12 Abhaato bhoose mbatighiri koresooka Eryobha,
bhoose bhataakurëngʼaanera wiiki ambërë yaache.
Taanyi‑ho omooto uno aghuköra amachömu,
taanyi‑ho koru umu.b
13 Ebhemero bheebho n‑kinya
chambeehera chino chetakundekiiru,
chandeme cheebho ncheghosiikëra obhuröngö.
c
Koru mo‑menu gheebho,
ngakorwera‑mu amangʼana gha bhosongo
kinya bho chanchöka.d
14 Emenu gheebho ngiichwire amangʼana gha kwihiima,
na amangʼana ghano ghakunyahaara.e
15 Amaghoro ghaabho ngakwangohi ghuye ghwita.
16 Hohoose hano bhaaghuye,
mbaghusari na ghosireekereri.
17 Bhateeche kumanya kwo murëmbë
haghirohamu na abhande.f
18 Bhataaghotereera inkongʼorimu
korisëngëra Eryobha.”g
19 Mbe,
itu ntweche kubha,
hano Amandëkö Amatööbhiyu ghakwërëkërëri egheghiro ghyokyose,
ngakwërëkërëri abhaato bhano ꞉bhaahaabhuru Amandëkö ghayo.
Hano Amandëkö ghakobhugha hangʼu,
n‑kubha abhaato bhoose,
Abhayahuuti na abhaato bha matöngö bhatabha na angʼana e ghwitachura hano Eryobha reghotenera ekiina ase,
wiiki erighibhu haheero kubha,
mbarëngʼaaniire ghoteneru ekiina.
20 Amangʼana hangʼu ghaanyi,
gho kubha omooto woose taaghotora kubharu kubha omuhëënë ambërë e Ryobha gho ghughööta emeghiro ghe Musa.
Emeremo ghe meghiro ghiyo,
n‑kobhamënyi abhaato bhoose ighoro e masari ghaabho.
Omooto nakubhareru obhuhëënë gho komokumi Yesu
21 Amare ibheere,
Eryobha ndetwërëkiri anchëra e kubharera abhaato kubha mbaanyi no obhuhëënë ambërë yaache,
na taanyi gho nchëra e meghiro.
Koru Amandëkö gha meghiro ghe Musa na gha bharööti ngaghosiikërëra haheero angʼana iyo.
22 Abhaato bhoose bhano bhakomokumi Yesu Kirisito,
Eryobha ndekobhabhara kubha abhahëënë ambërë yaache,
gho kohetera obhuhëënë bho Yesu.
Taahukiini omooto wowoose,
23 gho kubha abhaato bhoose mbaköriri amasari ne eriimanya reebho retaakwërëki obhokumi obhokoro bho Ryobha.
24 Amare gho ghareeya e Ryobha,
꞉mbiishereriiru kubha abhaato bhano bhaanyi abhahëënë ambërë yaache,
taanyi gho koreha ghyokyose.
꞉Mbaatingoriibhu koru mo‑masari ghaabho kohetera Kirisito Yesu.h
25 Eryobha ndemuköriri Yesu abhe amaruusi gha ghutëmëërani abhaato ne Eryobha,
kubha bhaabhëru amasari ghaabho,
gho ghokumi kubha Yesu ꞉naakuure gho ghiri yaabho.
Eryobha ꞉ndiiköriri hangʼu,
kubha ryërëki kubha iryo n‑ihëënë,
ndekurööna bhano bhaanyi na amasari.
Mööhi,
iryo retabharööniri kwo masari ghaabho ghano ꞉bhaaköriri eriibhagha re hayo ekeenyuma.
26 Wiiki ꞉ndiiköriri hangʼu,
kubha ryërëki obhuhëënë bhooche mo‑riibhagha rino,
iryo n‑ihëënë hano reemurööniri Omutëmi Yesu kwo masari gha bhano bhakomokumi,
na hano rekobhabharera kubha m‑bha bhuhëënë ambërë yaache.
27 Gho ghayo,
angʼana iyo neturëkiri kwihacha?
Hee,
gho kubha koru itu totaakubhareru kubha abhaato bhano bhaanyi abhahëënë ambërë e Ryobha gho ghughööta emeghiro,
amare gho komokumi Yesu okwene.
28 Ntweche kubha Eryobha niryo rekubharera omooto kubha naanyi no obhuhëënë gho komokumi Omutëmi Yesu okwene,
taanyi gho ghughööta emeghiro ghe Musa.
29 Kana,
Eryobha n‑Eryobha re Bhayahuuti abheene,
ghasi koru na bha matöngö?
Hee,
Eryobha n‑de bhaato bhoose!
30 Ndeenyi‑ho Eryobha rimu hangʼu,
gho ghayo neenyi‑ho anchëra imu hangʼu e kubharera abhaato kubha mbaanyi no obhuhëënë ambërë yaache.
Abhayahuuti na abhaato bha matöngö,
bhoose mbaghwisherereru ne Eryobha kubha mbaanyi no obhuhëënë gho komokumi Yesu okwene.
31 Ibheere kana,
hano tokuhënërëra komokumi Yesu,
niko kobhugha kubha emeghiro ghe Musa ghetaanyi no obhwëra?
Tiyaanyi!
Amare toramokumi Yesu,
niho tookubha tohikeriini ghoose ghano emeghiro ghe Musa ghyërëkëriiri.