Abharuumi 2

Eryobha ndekobhatenera ekiina abhaato bhoose, retaakwahukani

Mbe, iye Omuyahuuti omughëndi waane, toonyi na ahaho noghotenera ekiina abhaato abhande bhano bhaghuköra amangʼana ghayo. Amare koru iye toghotora ghwitachura ambërë e Ryobha! Mööhi, hano oghotenera ekiina abhande, niho umënyë kubha noghwitenera ekiina iye mwene, gho kubha amangʼana amabhe ghano bhaghuköra nigho oghuköra na niiye. 2 Itu ntweche kubha Eryobha ndekobhatenera ekiina kwo bhuhëënë abhaato bhano bhaghuköra amangʼana kinya ghayo. 3 Amare iye omusaani waane, noghotenera ekiina abhaato abhande ino na niiye noghuköra amangʼana ghayo ghayo. Kana! Noghwituuri kubha noghotora kwibhareka ghoteneru ekiina ne Eryobha? 4 Eryobha n‑ihöriicho chwee, ndeghokorigheri ebheghongi bhyaru, na ndeghoghoghumereri chwee. Amare iye ibheere, nokwënda ghutaraaha ghayo ghoose? Tweche kubha ndeghokwërëki obhuhöriicho bhooche, kubha otore ghotuukuunera amasari ghaacho? 5 Iye noonyi no omutu muköngʼu, wiiki nokwanga ghotuukuunera amasari ghaacho. Gho ghayo, noghwikomera anchagho e rosiko runo Eryobha reghotena ekiina keeche kwo bhuhëënë.

6 Orosiko ruyo, Eryobha ndekomoreha omooto woose kurëngʼaana na amaköri ghaache. 7 Ndekobhaha obhuhöru bho miishe ghyose abhaato bhano bhaghwiköngʼi ghuköra amachömu, gho kubha mbaghutabhara aghongo, na asooko no obhuhöru bhuno bhotaanyi na antenero. 8 Amare ndekobhakararera na kobharööna abhaato bhano bhakwanga obhuhëënë na ghuköra amabhe, gho kurëngʼaana no obhusööhu bhoobho. 9 Abhaato bhoose bhano bhaghuköra amangʼana amabhe, mbakubhöna anyaako ihaari na mbaakubha na amacheeche, korwera mo‑Bhayahuuti mbagha mo‑bhaato bha matöngö. 10 Amare abhaato bhoose bhano bhaghuköra amangʼana amachömu, mbakubhöna aghongo, asooko no omurëmbë, korwera mo‑Bhayahuuti mbagha mo‑bhaato bha matöngö. 11 Eryobha retaanyi no obhwahukani kwo mooto wowoose.

12 Abhaato bha matöngö bhano ꞉bhaaköriri amasari mbaghosireekereru, koru nangabha bhataare bheeche emeghiro ghe Musa. Abhayahuuti bhano ꞉bhaaköriri amasari ino bheeche emeghiro ghiyo, ibho mbaghoteneru ekiina kurëngʼaana ne emeghiro ghiyo. 13 Mbaghoteneru ekiina, gho kubha Eryobha retaakomubharera obhuhëënë omooto uno akooghu emeghiro ghiyo okwene, amare n‑kwo uno aghuköra ghano emeghiro ghekwërëkërëri ghuköra. 14 Abhaato bha matöngö, ibho bhateeche emeghiro ghiyo. Koru hangʼu, bharaköra amachömu kurëngʼaana na amiihëëbhö ghaabho, na amangʼana ghayo n‑kinya bhuno ghekwërëkërëri emeghiro ghe Musa, hayo nekwërëki kubha mbeeche ghuköra ghano ghakwëndëru. 15 Mbakwërëki kwo maköri ghaabho kubha amangʼana ghano ghakwëndëru mo‑meghiro, ngaandëkuru mo‑metema gheebho. Koru amiihëëbhö gha metema gheebho, eriibhagha erende ngakobhatenera ekiina, ne eriibhagha erende ngakwërëki kubha mbaghuköra ghano ghakwëndëru. 16 Hangʼu nibhu ekubha orosiko ro ghoteneru ekiina. Eryobha ndekobhatenera ekiina abhaato kohetera Yesu, koru kwo mangʼana ghaabho gha kebhisere, kinya ekobhugha Angʼana Anchömu ino nebharaghaniiri.

Abhayahuuti bhatiitëngʼëra emeghiro ghe Ryobha hamu ghusaaru

17 Ibheere iye n‑omooto uno okwibherekera kubha n‑Omuyahuuti o hëënë, na noghwitëngʼëra kubha noonyi no obhuhëënë ambërë e Ryobha gho ghughööta emeghiro ghe Musa, na nokwihacha kubha iye n‑omooto o Ryobha onyi. 18 Nokwirighi kubha weeche amangʼana ghano Eryobha resiighiri ukörë, na notoriri kumënya ghano ghaanyi gha hëënë, gho kubha weghuru emeghiro gheeche. 19 Nokwirighi kubha noonyi no obhuhëënë bho ghukangata abhaato abhande, kinya omooto uno aghukangata abhahuku, hamu kinya oromore runo rokomorekera abhaato bhano bhaanyi mo‑kengʼuuri. 20 Nokwirighi kubha iye n‑omweghi o bhaana na abhaato bhano bhateeche obhuhëënë bho Ryobha, gho kubha emeghiro ngeghokobhoorera amangʼana gha mangʼiini ghoose no obhumënyi bho hëënë. 21 Mbe, iye uno okweghi abhaato abhande, amare ngwake otaaghuköra ghano okweghi? Iye uno okweghi abhande kubha bhatiibha, amare ngwake iye okwibha? 22 Iye nokweghi abhaato kubha bhatataara, amare ngwake iye omwene oghutaara? Iye nurëghiri chasanaamu che misambu, amare ngwake iye okwibha ebheghiro koru mo‑chanyumba che ghusëngëra chasanaamu chiyo? 23 Iye nokwihacha kubha weeche emeghiro ghe Ryobha, amare noghutaraaha Eryobha gho ghusari emeghiro gheeche. 24 Gho ghayo, n‑kinya bhuno Amandëkö Amatööbhiyu ghakobhugha kubha, “Eriina re Ryobha ndeghotoku na abhaato bha matöngö, gho ghiri e maköri amabhe ghano moghuköra.”

25 Oghusaaru koocho ngookubha no obhwëra, erabha oghuköra kinya bhuno emeghiro ghekwërëkërëri. Amare arabha noghusari emeghiro, iye nookubha kinya omooto uno atasaaruru. 26 Gho ghayo, omooto uno atasaaruru, erabha araköra kinya bhuno emeghiro ghekwërëkërëri, Eryobha ndekomwishereri kinya omooto uno asaaruru. 27 Abhaato bha matöngö bhatasaaruru, amare erabha mbaghuköra kinya bhuno emeghiro ghekwërëkërëri, amaköri ghaabho ngaghoghughambera kubha iye Omuyahuuti n‑omuköri amasari onyi. Neekubha hangʼu, gho kubha iye Omuyahuuti nusaaruru, wiiki weeche emeghiro ghe Ryobha, amare noghusari emeghiro ghiyo. 28 Mbe, mumënyë kubha, taanyi omooto woose uno ibhwiru no Omuyahuuti naakubha Omuyahuuti o hëënë. Omooto taaghotora kubha Omuyahuuti o hëënë gho nchëra e ghusaaru mo‑mobhere okwene. 29 Tiyaanyi! Omuyahuuti o hëënë n‑uno ahaasooka Eryobha kwo mukörö waache woose. Oghusaaru kwo hëënë ngoghuköru na Akörö Ahörëëru mo‑motema, taanyi gho kubha ne emeghiro ghe Musa okwene. Omooto anga hangʼu, taaghosongʼaana aghongo koru mo‑bhaato, amare naghoghongibhu ne Eryobha eryene.