Abhakumi bhataakubhöhu ne emeghiro ghe Musa
7
Abhahiiri bhaane,
neghosiikëra na niinyu bhano mweche bhoheene emeghiro ghe Musa.
Mweche kubha omooto nakwëndëru ghughööta emeghiro eriibhagha ryose hano akubha akeere muhöru.
2 Motighe nëbhëërëkërëri angʼana iyo gho ghetuubhaani.
Emeghiro ngekwërëkërëri kubha,
omukari uno akwiruru taaghwisherereru ghutaana no omosubhe waache akeere anyi omuhöru.
Amare aribha omosubhe waache araku,
emeghiro ghiyo ghetaakomubhöha wiiki.
3 Gho ghayo,
arakwiru no omosubhe owonde eriibhagha riyo omosubhe waache akeere anyi muhöru,
naakubha arataara.
Amare erabha omosubhe waache akuure,
emeghiro ghiyo ghetaakomubhöha wiiki,
naghotora ghokwiru no omosubhe owonde,
hayo taakubha omutaari.
4 Abhahiiri bhaane,
amangʼana ghayo nibhu ghaanyi na ghokoonyu.
Koru inyu motaakubhöhu wiiki ne emeghiro ghe Musa,
gho kubha mokuure haghirohamu na Kirisito mo‑musarabha.
Ibheere inyu n‑abhaato bhaache moonyi,
uno ꞉aryokiibhu koru mo‑bhaku,
kubha eriimanya riito ribhe na amakorobhese amachömu gho ghiri e Ryobha.
5 Eriibhagha rino simoka yiito e masari ere eratukangata,
emeghiro ꞉ngiiköriri amiigha ghiito amabhe ghabhe na changuru chwee ghokwito,
toghiighomba ghuköra amasari eriibhagha ryose.
Kurëngʼaana na riyo,
oroko rokabha‑ho.
6 Ntoore tubhöhuru ne emeghiro,
amare ibheere ntokuure haghirohamu na Kirisito,
gho ghayo emeghiro ghiyo ghetaaghotubhöha wiiki.
Ibheere totaakorihökëri Eryobha gho kohetera anchëra e kare e ghughööta emeghiro ghino ghyandëkuru,
amare gho nchëra ahë e ghukangatu na Akörö Ahörëëru.
Amasari ngakumënyu kurëngʼaana ne emeghiro
7 Ibheere tobhughe bhu?
Tobhughe kubha,
emeghiro n‑amasari?
Naabha!
Amare aribha emeghiro ghetangabheere‑ho,
ntengamënyiri kubha amasari n‑egheghiro ke.
Aribha tongabheere‑ho omoghiro uno okobhugha,
“Otiighomba egheghiro ke mughëndi waacho,”
a ntengamënyiri kubha ghwighomba egheghiro ke mooto owonde,
n‑ghuköra amasari.
8 Amare amasari ghaghasaamura amiigha amabhe gha manga maaru moose yaane gho nchëra e moghiro uyo.
Aribha omoghiro uyo tongabheere‑ho,
amasari ngaakubha ghataanyi ni inguru.
9 Kwo riibhagha rino neere nekeere kumënya emeghiro,
꞉niimanyiri kinya bhuno nyëndiri.
Amare hano nimënyiri emeghiro,
amasari ghakabhöna changuru chwee moose yaane na ghakarëëta oroko.
10 Nekarighi kubha emeghiro ghiyo,
ghino gheere gho ghiri e kuuha obhuhöru,
꞉ngiirëëtiri oroko.
11 Kohetera emeghiro ghiyo,
amasari ghakabhöna omweya muchömu o kongʼiina na kundëëtëra oroko.
12 Koru hangʼu,
ibhe haheero kubha,
emeghiro m‑mitööbhiyu,
na mahatëkö ghaache ghoose m‑matööbhiyu,
n‑ghe bhuhëënë,
wiiki m‑michömu.
13 Amare aribha n‑hangʼu keenyi,
n‑emeghiro ghiyo emichömu nighyo ghindëëtiire oroko?
Tiyaanyi!
Amasari nigho ghandëëtiire oroko gho nchëra e meghiro ghino gheenyi emichömu.
Mboore obhorwachi bho Ryobha kubha emeghiro ghibhe ghërëërëki haheero kubha,
amasari n‑egheghiro ekebhe chwee.
14 Ntweche kubha Akörö e Ryobha niyo etoheere emeghiro,
amare eni gho simoka yaane e masari,
n‑omusësë o masari neenyi.
15 Eni ntyeche kino neghuköra,
gho kubha kiire nekwënda ghuköra,
nteeghoghiköra.
Amare kiire nirëghiri nikyo neghuköra.
16 Aribha neghuköra amangʼana ghano ntaakwënda ghuköra,
iyo nekwërëki kubha niisheriiri kubha emeghiro m‑michömu.
17 Hayo taanyi eni uno nehaabha neraköra amasari,
amare n‑amasari ghano ghaanyi moose yaane.
18 Nyeeche kubha,
moose yaane,
niko kobhugha,
mo‑simoka yaane e masari,
ghetaanyi‑mu egheghiro ghichömu ghyokyose.
Nekwënda ghuköra amachömu,
amare ntighöötë obhotoro bho ghoghaköra.
19 Amangʼana amachömu ghano nekwënda ghuköra,
nteeghoghaköra.
Wiiki,
amabhe ghano ntaakwënda ghuköra,
nigho neghuköra.
20 Ibheere,
aribha neghuköra ghano ntaakwënda nikörë,
hayo taanyi eni uno neghuköra amasari,
amare n‑amasari ghano ghaanyi moose yaane.
21 Mbe,
ˆnekamënya kubha,
hano nekwënda ghuköra egheghiro ghichömu,
nehaabha nerarutu ghuköra egheghiro ekebhe.
22 Emeghiro ghe Ryobha,
neghesiighiri kwo motema waane woose.
23 Amare ˆnekamënya kubha ebhyemo bhe mobhere waane,
mbehaakangatu na changuru che masari ghano ghaghokindana na amiihëëbhö ghaane amachömu.
Changuru chiyo nicho cheghunköra nibhe omusësë o masari ghano ghaanyi moose yaane.
24 Horeera nekorighi eni!
N‑niwe uno akonduusi koru mo‑simoka yaane e masari ino ekurëëta oroko?
25 Nekoriitabheri Eryobha,
gho kubha iryo niryo rentooriri,
kohetera Yesu Kirisito,
Omutëmi wiito.
Gho ghayo,
eni omwene,
nekuhökëri emeghiro ghe Ryobha kwo miihëëbhö ghaane,
amare gho simoka yaane e masari,
nekuhökëri emeghiro ghe masari.