Yoona aghaye Ninaawi
3
Niho angʼana e Mutëmi Waryobha ekamwicherera Yoona mara e kabhere erabhugha, 2 “Nooghi bhwango mo‑moghya omokoro o Ninaawi, obharaghaneri abhaato bha iyo ighoro e mangʼana ghano neghokobhoorera.”3 Ibheere Yoona aghatanura aghaye Ninaawi kinya bhuure Omutëmi Waryobha are amwërëkëriiri. Omoghya uyo o Ninaawi mokoro ore chwee, omooto naare aratora kowinaara gho chaasiko ishato.
4 Mbe, Yoona hano ꞉ahikiri mo‑moghya uyo, akinaara‑mu mwishe moghima. Niho aghasëëma kobharaghaneri abhaato arabhugha, “Nchisaaghiri chaasiko miröngö ene hangʼu, Eryobha resireekereri abhaato no omoghya uno woose.”
5 Abhaato bhayo, bhaghiishereri Angʼana e Ryobha, bhakibhoorera kwiyima ebhiinyakurë. Bhakabhugha omooto woose omokoro kwo mosuuhu, abheeke changibho che maghönëra, kubha ibhe ekyërëkërëri kubha mbatuukuuniri. 6 Mbe, omutëmi o moghya uyo hano oghwire amangʼana ghano Yoona are araraghani, akaru mo‑ghetumbe keeche ke bhutëmi, akaruusi changibho cheeche che ghitëmi, akabheeka amaghönëra, aghiikara mwibhu. 7 Niho akabhabhoorera abhaato bhoose bha Ninaawi arabhugha, “Eni haghirohamu na abhakangati bhaghëndi bhaane, ˆtokabhugha kubha, abhaato hande atyenyi yoyoose e ghotughu, etasama ghyokyose koru kunyo amanche. 8 Abhaato bhoose bhabheeke changibho che maghönëra, na chatyenyi cheebho chekundekeru amaghönëra. Omooto woose arisasaame Eryobha, asabhe ghotooribhu, wiiki atighe obhobhe bhooche bhoose. 9 Eryobha hamwabhe ndeghugharura amënda ghaache, retighe ghotukararëra, ribhe na changori, retaacha ghotosireekereri.”
10 Hano Eryobha rerooche kinya bhaköriri, kubha mbatighiri amasari ghaabho, reghagharura amënda ghaache, reghatigha kobharööna kinya reere rebhughiri rekobhaköra.