Yoona ˆakamukararëra Omutëmi Waryobha
4
Angʼana iyo temoteghiiri Yoona, eghaghëri akarare chwee. 2 Gho ghayo, akamusabha Omutëmi Waryobha, arabhugha, “Hano neere nekeere yiire mo‑se yaane, neere nyeeche iye toghosireekereri omoghya o Ninaawi! Kiyo nikyo ꞉ghiighëriri nekangʼösëra mo‑se e Tarashiishi. Nyeeche kubha iye n‑Eryobha re bhosiighi na changori. Wiiki, iye n‑o ghareeya onyi na tohabhenda ghukarara. Nohaatora ghugharura amënda ghaacho, oghatigha kobharööna abhaato. 3 Mbe, ibheere iye Omutëmi Waryobha, neghusabha onyite, gho kubha, ghokoone ngʼoni eni neku ghokera kubha muhöru.”4 Omutëmi Waryobha nawe akamugharokeri akabhugha, “Neke iye ˆoghakararëra kobhe hangʼu?”a
5 Niho Yoona akaru mo‑moghya uyo o Ninaawi, aghaye aghiikara eribhaara re roghoro re moghya uyo. Akiyabhëkëra ekebhuru, aghiikara mo‑kiriiri, araghanya korighi kino ghekowubhöna omoghya uyo.
6 Niho Omutëmi Waryobha akahatëka kubha, omote umërë na ghokora. ꞉Naawumëriri kubha omuhë Yoona ekiriiri ghe komotoori mo‑nyaako e bhotuuku ino are nayo. Yoona akawosiigha omote uyo chwee. 7 Amare orosiko ro kabhere morungʼöörö, Eryobha rekahatëka moghuuku awure omote uyo, niho okanyaara. 8 Hano eryobha ꞉riirasiri, Eryobha akarëëta obhukama bhotuuku bhuhaari koru roghoro, emirëngaari ghe ryobha ghekamweki Yoona chwee a‑mutu kerende aghateni. Aghiighomba ghoku, akabhugha, “Ghokoone ngʼoni eni neku ghokera kubha muhöru.”
9 Eryobha rekamobhoori Yoona rekabhugha, “Neke iye ˆokawukararëra omote uyo kobhe hangʼu?”b
Yoona akamugharokeri akabhugha, “Hee! Nikariire chwee ekirëngërë ghe ghoku!”c
10 Hayo, Omutëmi Waryobha akamobhoorera akabhugha, “Omote uno, numëriri na ghokora kwo obhotiko bhumu, obhotiko bhuno bhuröbhiire okooma. Iye towuköriire gheghiro ghyokyose, koru kowumëri. Ngwake okoworigheri changori? 11 Ibheere omoghya o Ninaawi noonyi na abhaato ekirara kimu ne ebheku miröngö ebhere, bhano bhateeche kwahukani amangʼana amachömu na amabhe. Wiiki na chaatugho n‑chaaru! Kana na neeni ntekwëndëru kowoghwera bheghongi omoghya uyo?”