Eghitabhu ke Yoona
Yoona ˆaghasaki kungʼösa Eryobha
1
Kare haare naare‑ho omurööti umu, are arabherekeru Yoona mwërëëti o Amitaayi. Ibheere orosiko rumu, angʼana e Mutëmi Waryobha ekamwicherera erabhugha, 2 “Nooghi bhwango Ninaawi, omoghya wuure omokoro mo‑se e Asiiriya, obharaghaneri na kobhashaangʼi abhaato bha mo‑moghya uyo, gho kubha nerooche‑mu amabhe maaru chwee.”3 Mbe, Yoona aghasëëma orughëndö, amare taghiire iyo, aghaye mo‑se e Tarashiishi, kubha amwibhise Omutëmi Waryobha. Mo‑rughëndö ruyo aghaye akahika mo‑moghya o Yoobha, akabhöna‑ho ameeri ereenda kobhooka kwërëkëra Tarashiishi. Akareha agharama, aghatiira mo‑meeri aghaye Tarashiishi haghirohamu na abhahöki bha mo‑meeri iyo, kubha amungʼösë Omutëmi Waryobha.
4 Mbe, hano bhaare bharaghe, Omutëmi Waryobha akahuuti obhukama bhuhaari mo‑nyancha, anyancha yoose eghasareka. Emekunda gheekabha gheratëma ameeri iyo, mbagha ëkëënda ghwateka. 5 Abhahöki bha mo‑meeri iyo bhaghatiina chwee, bhaghaghöötu na ahaho inkoro. Niho omooto woose aghasëëma ghusabha emisambu gheeche. Niho bhakarëkëra emerigho mo‑nyancha, kubha ameeri ehohe.
Eriibhagha riyo, Yoona naare asöhiri ghateghate e meeri iyo, amisiri kingiri. 6 Ibheere omwimeerereri o meeri iyo, akamutambana, akamobhoorera kwo riiraka ikoro arabhugha, “Iye okeere omisiri na nyingino? Bhooka! Orisabhë Eryobha reecho, hamwabhe ndeghotora ghotoghwera bheghongi totasireekerera.”
7 Bhakamara abhahöki bhayo, bhakarwacha kubha, “Ntutëmë akuura, tumënyë amabhe ghano ˆghaghatubhöna n‑kwo riisari rya we.” Mbe, bhaghatëma akuura, ekamoghwera Yoona. 8 Niho, bhaghasëëma komobhoori bharabhugha, “Notobhoorere, ngwake angʼana ino eghatubhöna? Iye m‑moremo ke ohaaköra? Hayi orweriire? Na n‑o ritöngö ke onyi?”
9 Yoona akabhagharokeri akabhugha, “Eni n‑Omwibhuraaniya neenyi, nekomusëngëra Omutëmi Waryobha o Mwishaaro, Omutëmi o rishaaro na ase.”
10 Akamara Yoona akabhabhoorera kubha iwe naare aramungʼösa Omutëmi Waryobha. Hano abhahöki bhayo bhooghwire hangʼu, bhaghaghöötu na ahaho inkoro! Ibheere bhakamobhoori bhakabhugha, “Angʼana ino uköriri iye, n‑imbe chwee!”
11 Eriibhagha riyo ryose ꞉bhaare bharasiikëra, anyancha neere ërëëndërëra ghusarëka. Mbe, bhakamobhoori wiiki, “Ibheere, toghukörëbhu anyancha ihörëërë?”
12 Yoona akabhagharokeri akabhugha, “Monyiimoki, mundëkërë mo‑nyancha, niho anyancha ekuhörëëra. Nyeeche kubha, emekunda ghino emekoro ghe manche ngebhabhwine gho ghiri yaane.”
13 Abhahöki bhayo bhaghiiköngʼi ghutëma emitërëbhi ghe meeri yaabho, kubha bhayehiki mo‑ngëghu e nyancha, amare bhataatoriri, gho kubha anyancha neere ërëëndërëra ghusarëka chwee. 14 Niho bhakamusasaama Omutëmi Waryobha bharabhugha, “Oo Omutëmi Waryobha, ntoghoghusasaama, otatosireekereri gho komwita omooto uno. Koru otatotenera ekiina gho ghwita amasaahë gha mooto uno ataanyi ne eriisari, gho kubha, Oo Omutëmi, nuköriri ghoose ghano kinya iye mwene wëndiri.” 15 Bhakamara, bhakamwimoki Yoona, bhakamurëkëra mo‑nyancha. Hayo hayo, anyancha ekahörëëra! 16 Hano bharooche hangʼu, bhakamotiina chwee Omutëmi Waryobha. Bhakamoruuseri amaruusia na komotoorera eriiraheri re komuhökëri.
17 Niho Omutëmi Waryobha akahatëka asu inkoro emomere Yoona, ekamomera. Yoona, akamara chaasiko ishato obhotiko no omwishe, anyi mo‑nda e su iyo.