Omunara o Bhabheeri
11
Kwo riibhagha riyo abhaato bhoose mo‑se mbaare bharasiikëra eghighambo kimu,
na amangʼana ghaare ghaare.
2 Ekabha eriibhagha abhaato ꞉bhaare bharasaama kwërëkëra roghoro,
bhakarighi ase ekibhara e Shinaari,
bhaaghaye kumanya‑ho.
3 Bhakamara bhakarwacha bhakabhugha,
“Tughëndë,
tukörë amatabhwari,
togheeki no omororo bhoheene.”
Mo‑chaasiko chiyo,
amatabhwari na araami nigho abhaato ꞉bhaabhëkiire,
ghotigha amabhohe na anyeenyi.
4 Bhakamara bhakabhugha kubha,
“Twabhëkë omoghya haghirohamu no omunara,
orososooni rooche rohike Mwishaaro,
kubha tubhönë kumanyëkana,
totaacha ghusancha mo‑se yoose.”
5 Hano abhaato ꞉bhaare bharaabhëka omoghya no omunara uyo,
Omutëmi Waryobha aghiika haase,
kubha arighi emeremo gheebho.
6 Hano Omutëmi Waryobha agherooche,
akabhugha kubha,
“Abhaato bhano m‑bhamu,
na mbaghosiikëra eghighambo kimu,
ne emeremo ghino,
n‑ghusëëmu kwo mangʼana ghano bhakwënda ghuköra.
Ibheere angʼana yoyoose ino bhakwënda ghuköra,
mbakoyehikeerani.
7 Mbe,
ntwike,
tughëndë tobhurughe eghighambo keebho,
kubha bhatooghwana abheene kwi inyu bheene.”
8 Niho Omutëmi Waryobha akabhasanchani mo‑se yoose,
bhaghatigha kwabhëka omoghya uyo.
9 Hangʼu nibhu omoghya uyo orokuru Bhabheeri,
a gho kubha hayo niho Omutëmi Waryobha abhurughiire eghighambo ghe se yoose.
Korwera hayo akabhasanchani abhaato mo‑se yoose.
Abhiibhoru bha Sheemu
10 Runo niro orwibhoro ro Sheemu.
Oghwichoreru kwo manche kuuche ghosira,
ghekaheta emeeka ebhere,
Sheemu akabha ne emeeka eriighana rimu,
akiibhora Aribhaghisaati.
11 Sheemu hano amwibhwire Aribhaghisaati,
aghiikara emeeka eghende amaghana ataano,
꞉niibhwire abhaana abhande bha ghesubhe na bha ghikari.
12 Aribhaghisaati hano are ne emeeka miröngö etato ne etaano,
akiibhora Sheera.
13 Hano Aribhaghisaati amwibhwire Sheera,
aghiikara emeeka eghende amaghana ane ne etato,
꞉niibhwire abhaana abhande bha ghesubhe na bha ghikari.
14 Sheera hano are ne emeeka miröngö etato,
akiibhora Ebheeri.
15 Hano Sheera amwibhwire Ebheeri,
aghiikara emeeka eghende amaghana ane ne etato,
꞉niibhwire abhaana abhande bha ghesubhe na bha ghikari.
16 Ebheeri hano are ne emeeka miröngö etato ne ene,
akiibhora Bhereghi.
17 Hano Ebheeri amwibhwire Bhereghi,
aghiikara emeeka eghende amaghana ane na miröngö etato,
꞉niibhwire abhaana abhande bha ghesubhe na bha ghikari.
18 Bhereghi hano are ne emeeka miröngö etato,
akiibhora Reewu.
19 Hano Bhereghi amwibhwire Reewu,
aghiikara emeeka eghende amaghana abhere na kende,
꞉niibhwire abhaana abhande bha ghesubhe na bha ghikari.
20 Reewu hano are ne emeeka miröngö etato ne ebhere,
akiibhora Serughi.
21 Hano Reewu amwibhwire Serughi,
aghiikara emeeka eghende amaghana abhere na mohungate,
꞉niibhwire abhaana abhande bha ghesubhe na bha ghikari.
22 Serughi hano are ne emeeka miröngö etato,
akiibhora Nahoori.
23 Hano Serughi amwibhwire Nahoori,
aghiikara emeeka eghende amaghana abhere,
꞉niibhwire abhaana abhande bha ghesubhe na bha ghikari.
24 Nahoori hano are ne emeeka miröngö ebhere na kende,
akiibhora Teera.
25 Hano Nahoori amwibhwire Teera,
aghiikara emeeka eghende eriighana rimu ni ikomi na kende,
꞉niibhwire abhaana abhande bha ghesubhe na bha ghikari.
26 Teera akamanya emeeka miröngö mohungate,
akabhiibhora Abhuramu,
Nahoori na Haraani.
Orwibhoro ro Teera
27 Runo niro orwibhoro ro Teera ishe waabho Abhuramu,
Nahoori na Haraani.
Haraani iwe,
akiibhora Rooti.
28 Haraani uyo aghakangata ishe ghoku.
꞉Nakweriire mo‑moghya o Uru mo‑se e Abhakaritaayo ino ibhoriiru‑mu.
29 Abhuramu na Nahoori bhaghakwira abhakari.
Omukari o Abhuramu naare arabherekeru Saraayi no omukari o Nahoori naare arabherekeru Miirika.
Miirika uyo,
naare no ömööbhö o ghiike,
are arabherekeru Isika,
na bhombe mbaare abhaakë bha Haraani.
30 Saraayi taare na moona,
gho kubha moghomba are.
31 Teera akiimoki omoona waache Abhuramu na mukaache,
haghirohamu no omoochokoro waache Rooti,
omoona o Haraani.
Bhoose bhaakaru mo‑moghya o Uru mo‑se e Bhakaritaayo,
bhaghaghööta anchëra e ghuye mo‑se e Kanaani.
Amare,
hano ꞉bhaahikiri mo‑se e Haraani,
bhaghiishererani kumanya hayo.
32 Teera akahiki emeeka amaghana abhere ne etaano,
aghakwera mo‑se e Haraani.