Simoka 10

Abhaato ˆbhaghasancha mo‑se yoose

Hano oghwichoreru kwo manche ꞉ghoosiriri, Sheemu, Haamu na Yabheeti, abhaana bha Nuhu, bhakiibhora abhaana. Runo niro orwibhoro roobho.

2 Orwibhoro ro Yabheeti niro runo, Ghomeeri, na Maghoghu, na Mataayi, na Yabhaani, na Tubhaari, na Mesheeki na Tiraasi. 3 Orwibhoro ro Ghomeeri mbaare Ashikenaasi, na Ribhaati na Togharima. 4 Orwibhoro ro Yabhaani mbaare Erisha, na Tarashiishi, na Abhakitimu na Abhatotaniimu. 5 Korwera mo‑rwibhoro ro Yabhaani, abhaato bhaghasancha mo‑chaase chino cheenyi haghuhe na anyancha, bhoose kwo bhighambo bheebho na gho chanyiibhoro cheebho, na kwo matöngö ghaabho.

6 Runo niro orwibhoro ro Haamu, Kuushi, na Miisiri, na Bhuuti na Kanaani. 7 Orwibhoro ro Kuushi mbaare Seebha, na Habhira, na Sabhuta, na Raama na Sabhuteka. Orwibhoro ro Raama, mbaare Sheebha na Tetaani. 8 Wiiki, Kuushi akiibhora omoona owonde, eriina reeche Nimurooti. Iwe akabha o mumbërë mo‑bhosubhesubhe na kwo obhotoro bhokoro mo‑se. 9 Omutëmi Waryobha akamuköra kubha mosubhesubhe o kobhyema chatyenyi. Nkeenyi‑ho ekirëngi ghe kobhugha kubha, “Omooto uno n‑Nimurooti, Omutëmi Waryobha namotooriri kubha omosubhesubhe mo‑bhobhyemi bho chatyenyi.” 10 Emeghya ghino asëëmiire obhutëmi bhooche ngeere Bhabheeri, na Ereki, na Akati na Kaarine mo‑se e Shinaari. 11 Koru iyo, Nimurooti aghasaamera mo‑se e Ashuuru, akaabhëka‑ho emeghya ghe Ninaawi, na Rehobhooti‑iri, na Kara 12 na Reseeni. Reseeni niho haanyi ghateghate e Ninaawi no omoghya o Kara, uyo niwe omoghya omokoro. 13 Miisiri akabhiibhora Abharuuti, na Abhanaami, na Abharehabhi, na Abhanabhutuhi, 14 na Abhakabhutoori, na Abhaturuusi, na Abhakasiruhi. Bhayo nibho simoka e Bhabhiriisiti. 15 Kanaani akamwibhora Sitooni omutange waache, aghooseru na Heeti, 16 na Abhayebhuusi, na Abhaamoori, na Abhaghirighaashi, 17 na Abhahibhi, na Abhaariki, na Abhasiini, 18 na Abharibhaati, Abhasemaari na Abhahamaati. Niho wiiki abhaato bha se e Bhakanaani bhaghasancha. 19 Ahaghiro ha se yaabho hasëëmiire Sitooni kwërëkëra Gheraari mbagha Ghaasa. Wiiki kwërëkëra Sotoma, na Ghomora, na Atima, na Sebhoyimu mbagha Raasha. 20 Bhano nibho orwibhoro ro Haamu, bhoose kwo bhighambo bheebho na gho chanyiibhoro cheebho, mo‑chaase cheebho na kwo matöngö ghaabho.

21 Sheemu, omokoro o Yabheeti, niwe are ishakoro o rwibhoro roose ro Ebheeri. 22 Abhaana bha Sheemu mbaare, Eraamu, na Ashuuru, na Aribhaghisaati, na Ruuti na Araamu. 23 Abhaana bha Araamu mbaare Usi, na Huuri, na Gheteeri na Maashi. 24 Aribhaghisaati naare ishe Sheera, nawe Sheera akiibhora Ebheeri. 25 Ebheeri akiibhora abhaana bhabhere, omoona waache o mutange akamoroka Bhereghi, gho kubha kwo riibhagha riyo abhaato bha mo‑se ꞉mbaataaniri. Ömööbhö nawe akaroku Yokitaani. 26 Yokitaani akiibhora Arimotaati, na Shereebhu, na Hasarimaweeti, na Yeera, 27 na Hatoraamu, na Usaari, na Tikiira, 28 na Obhaari, na Abhimaeri, na Sheebha, 29 na Obhiiri, na Habhira na Yobhaabhu. Bhayo bhoose mbaare abhaana bha Yokitaani. 30 Ase ino abhaato bhayo ꞉bhaare bhamanyiri, ꞉niisëëmiire mo‑bheghoro bhe Meesha kwërëkëra Sebhaari mo‑bheghoro bhe roghoro. 31 Bhayo nibho orwibhoro ro Sheemu, omooto woose mo‑se yaache, kurëngʼaana na chanyiibhoro cheebho, ebhighambo bheebho, na amatöngö ghaabho.

32 Ruyo niro orwibhoro ro bhaana bha Nuhu, kurëngʼaana no orwibhoro roobho na amatöngö ghaabho. Korwera hano oghwichoreru kwo manche ꞉ghoosiriri, abhaato ꞉mbaasanchiri mo‑se yoose.