Ghosira gho ghwichoreru kwo manche
8
Niho Eryobha rëkëëndërëra komohiita Nuhu,
na chaatugho na chatyenyi choose che mwiteregho,
chino are nacho mo‑safina.
Mbe,
akahuuti obhukama mo‑se,
amanche ghaghatibhoka.
2 Ebherika bhe haase bhekaribha na ambura koru Mwishaaro eghasira.
3 Amanche ghakëëndërëra ghotibhoka kiihoro mo‑se.
Antenero e rosiko ro riighana rimu na miröngö etaano ghaakabha ghatibhokiri chwee.
4 Ndoore orosiko rwi ikomi na mohungate ro mwëri o mohungate,
niho asafina ekahörëëra mo‑bheghoro bhe se e Araraati.
5 Amanche ghakëëndërëra ghosuuha,
mbagha omwëri wi ikomi.
Orosiko o rumbërë ro mwëri uyo,
ebhesosooni bhe bheghoro bheghasëëma konyunyuki.
6 Chaasiko miröngö ene hano chehetiri,
Nuhu aghiighora eriitirisha re safina rino are aköriri.
7 Akahoroki erikoorukooru anche.
Erikoorukooru riyo rekibhururuka ino na ino,
mbagha hano amanche ꞉ghoomiri mo‑se.
8 Akamara,
Nuhu akahoroki asarari,
arighi aribha amanche ghoomiri mo‑se.
9 Amare gho kubha amanche ngaare ghakeere mo‑se,
asarari tebhwine omweya o ghwikara,
eghagharuka o‑Nuhu.
Nuhu aghaghöröröki okubhökö,
akayighööta,
akayigharoki mo‑safina.
10 Nuhu aghaghanya chaasiko echende mohungate,
niho akahoroki wiiki asarari iyo.
11 Asarari iyo eghagharuka o‑Nuhu omughörööbha,
enyi ne eriito ibhese re museyituuni mo‑monu waache.
Niho Nuhu akamënya kubha amanche ˆghaghatibhoka mo‑se.
12 Nuhu aghaghanya chaasiko echende mohungate,
akahoroki wiiki asarari iyo.
Amare kwo riibhagha riyo,
asarari tiigharokiri wiiki.
13 Orosiko o rumbërë ro mwëri o mumbërë,
Nuhu hano are ne emeeka amaghana asaasabhe na umwa,
amanche ghaakabha ghoomiri mo‑se yoose.
Aghasëna ighoro e safina,
akarighi kubha ase yoose yoomiri.
14 Orosiko ro miröngö ebhere na mohungate ro mwëri o kabhere,
ase neere yoomiri kimu.
15 Niho Eryobha rekamobhoorera Nuhu rekabhugha,
16 “Noohoroke mo‑safina,
iye haghirohamu na mukaacho,
na abhaana bhaacho na abhakari bhaabho.
17 Ohoroki chatyenyi choose chino moore nacho haghirohamu,
ebhinyönyi,
na chaatugho na bhino bhekwingʼuurera chanda haase.
Bhyose bhiibhore,
bhisanche na kwiyëëngëra mo‑se.”
18 Niho Nuhu akahoroka mo‑safina,
haghirohamu na mukaache,
na abhaana bhaache na abhakari bhaabho.
19 Chatyenyi choose chekahoroka mo‑safina chirööbhiine,
chaatugho,
ne ebhinyönyi,
na bhino bhekwingʼuurera chanda haase,
na bhino bheghughënda ighoro e se ne ebheghiro bhyose kwo manga ghaache.
Nuhu ˆakaruusi amaruusi kwo Ryobha
20 Akamara,
Nuhu akaabhëkëra Omutëmi Waryobha ahaghiro ha koruuseri amaruusi.
Akiimoki ghate e chatyenyi chino chirëngʼaaniire koruusibhu amaruusi,
chaatugho ne ebhinyönyi,
akabheruusi amaruusi gha ghosireekereri kwo Mutëmi.
21 Omutëmi Waryobha hano oghwire ekeneeso ghichömu,
ghekamotegheri,
aghiisiikërëra mo‑motema akabhugha,
“Ntekwihiima wiiki ase gho ghiri e bhaato,
nangabha amiihëëbhö ghaabho ghaanyi mabhe korwera bhoona bhoobho.
Nteghosoreekereri wiiki bhino bheenyi no obhuhöru,
kinya niköriri.
22 Hano ase ekubha ekeere enyi‑ho,
ndekubha‑ho eriibhagha re kobhusura na re ghughësa,
ndekubha‑ho eriibhagha re nyighita na re bhotuuku,
ndekubha‑ho eriibhagha re maaho na re mbura,
ndekubha‑ho eriibhagha re bhotiko na re mwishe.
Amabhagha ghayo ghoose ghataghosinya kubha‑ho.”