Ghwichoreru kwo manche
7
Nuhu hano amariri ghoghaköra ghoose,
Omutëmi Waryobha akamobhoorera akabhugha,
“Söha mo‑safina,
haghirohamu na abhahiiri bhaacho bha haghuhe.
Mo‑bhaato bhoose bha rwibhoro runo,
iye niiye nerooche kubha muhëënë ambërë yaane.
2 Wimoki chaatugho mohungate mohungate che manga ghoose chino chirëngʼaaniire koruusibhu amaruusi,
chansubhe na chankari.
Amare chaatugho chino chetarëngʼaaniire koruusibhu amaruusi,
usöhi ibhere ibhere ansubhe na ankari.
3 Wiiki wimoki ebhinyönyi mohungate mohungate bhe manga ghoose,
ebhesubhe ne ebhikari,
kubha obhetughe bhiiche bhisaaghe mo‑se.
4 Chaasiko mohungate cheraheta korwera ibheere,
neghutëëki ambura mo‑se.
Neghutëëka chaasiko miröngö ene obhotiko no omwishe.
Ebhetyenyi bhyose bhino bheenyi no obhuhöru,
bhino ꞉niitëëmiri mo‑se,
nekobhesireekereri.”
5 Nuhu aghaköra ghoose kinya Omutëmi Waryobha are amuhatëkiri.
6 Hano oghwichoreru kwo manche korweriire mo‑se,
Nuhu naare ne emeeka amaghana asaasabhe.
7 Nuhu,
na mukaache,
na abhaana bhaabho na abhakari bhaabho,
bhaghasöha mo‑safina,
kubha bhiisache oghwichoreru kwo manche.
8 Chatyenyi chino chirëngʼaaniire koruusibhu amaruusi na chino chetarëngʼaaniire koruusibhu amaruusi,
ne ebhinyönyi na chatyenyi choose chino chekwingʼuura haase,
9 chekaacha cheghasöha ibhere ibhere chankari na chansubhe,
mo‑safina e Nuhu,
kinya Eryobha reere remuhatëkiri Nuhu.
10 Hano chaasiko mohungate ꞉cheehetiri,
oghwichoreru kwo manche ghoghasëëma ghokundekeri ase.
11 Hano Nuhu are ne emeeka amaghana asaasabhe,
mo‑rosiko rwi ikomi na mohungate ro omwëri o kabhere,
oghwichoreru kwo manche ghokaacha.
Kwo rosiko ruyo,
ebherika bhyose bhe haase e se bheghatoreka amanche,
erishaaro ikoro reghatëëka.
12 Ambura ekahenerera kimu kimu ghutëëka.
Eghatëëka chaasiko miröngö ene,
obhotiko no omwishe.
13 Orosiko ruyo ambura ꞉isëëmiri ghutëëka,
niro Nuhu na mukaache ꞉bhaare bhasöhiri mo‑safina,
haghirohamu na abhaana bhaabho bhatato,
Sheemu,
na Haamu,
na Yabheeti,
na abhakari bhaabho.
14 ꞉Mbaasöhiri haghirohamu na amanga ghoose gha chaatugho,
na chatyenyi chi ibhara,
na chino chekwingʼuura haase na amanga ghoose gha bhinyönyi.
15 Chatyenyi choose chino cheenyi no obhuhöru ꞉nchiichiri ibhere ibhere,
cheghasöha mo‑safina e Nuhu.
16 Chatyenyi chiyo ꞉nchiisöhiri mo‑safina ibhere ibhere,
ansubhe na ankari,
kinya Eryobha reere remuhatëkiri Nuhu.
Akamara Omutëmi Waryobha omwene aghiighara orwighe gho nche.
17 Mo‑chaasiko miröngö ene che mbura,
amanche ghakëëndërëra kwëngëra.
Amanche ghayo ghaghaghasha,
ghaghaghëgha asafina,
eghasëëma ghotombatomba ighoro e manche.
18 Amanche ghayo ghakëëndërëra ghwichora chwee,
asafina ekabha eratombatomba ighoro e manche.
19 Amanche ghayo ghaakabha maaru chwee,
ghaghakundekeri ebheghoro bhyose ebhire bhe mo‑se.
20 Amanche ghakëëngëra chwee na ghokundekeri ebheghoro,
ghakahiki obhurë bho mabhökö mohungate ghokera ebheghoro bhiyo.
21 Egheghiro kyose kino keere keraghënda mo‑se ꞉ngeesirekeriire,
ebhinyönyi,
na chaatugho,
na chatyenyi chi ibhara,
na chino chekwingʼuura haase na abhaato bhoose.
22 Egheghiro kyose kino keere kerahëëchëra mo‑se,
gheghaku.
23 Eryobha reghasireekereri ghyokyose kino keere ekihöru mo‑se,
abhaato,
na chaatugho,
na bhino bhekwingʼuura haase ne ebhinyönyi.
Amare Nuhu na bhino ꞉asöhiri nabhyo mo‑safina ibhyo bheghasaagha.
24 Oghwichoreru kwo amanche ghayo,
ghookabha ghokundekiiri ase yoose gho chaasiko eriighana rimu na miröngö etaano.