Orwibhoro ro Ataamu
5
Runo niro orwibhoro ro Ataamu.
Eryobha hano reebhabhombiri abhaato,
꞉ndeebhabhombiri gho ghisösö keeche.
2 Rekabhomba omosubhe no omukari,
rekamara rekabhiitabheri,
rekabharoka “Abhaato.”
3 Ataamu hano ahikiri emeeka eriighana rimu na miröngö etato,
akiibhora omoona uno atubhiine nawe gho ghisösö keeche.
Niho akamoroka Seeti.
4 Hano amariri komwibhora Seeti,
akamanya emeeka eghende amaghana anaane.
Kwo meeka ghiyo,
꞉niibhwire abhaana abhande bha ghesubhe na bha ghikari.
5 Hano ahikiri emeeka amaghana kende na miröngö etato,
aghaku.
6 Seeti hano ahikiri emeeka eriighana rimu ne etaano,
akiibhora Enooshi.
7 Hano amariri komwibhora Enooshi,
akamanya emeeka eghende amaghana anaane na mohungate.
Kwo meeka ghiyo,
꞉niibhwire abhaana abhande bha ghesubhe na bha ghikari.
8 Seeti hano ahikiri emeeka amaghana kende ni ikomi ne ebhere,
aghaku.
9 Enooshi hano ahikiri emeeka miröngö kende,
akiibhora Kenaani.
10 Hano amariri komwibhora Kenaani,
akamanya emeeka eghende amaghana anaane ni ikomi ne etaano.
Kwo meeka ghiyo,
꞉niibhwire abhaana abhande bha ghesubhe na bha ghikari.
11 Enooshi hano ahikiri emeeka amaghana kende ne etaano,
aghaku.
12 Kenaani hano ahikiri emeeka miröngö mohungate,
akiibhora Maharareeri.
13 Hano amariri komwibhora Maharareeri,
akamanya emeeka eghende amaghana anaane na miröngö ene.
Kwo meeka ghiyo,
꞉niibhwire abhaana abhande bha ghesubhe na bha ghikari.
14 Kenaani hano ahikiri emeeka amaghana kende ni ikomi,
aghaku.
15 Maharareeri hano ahikiri emeeka miröngö esaasabhe ne etaano,
akiibhora Yareeti.
16 Hano amariri komwibhora Yareeti,
akamanya emeeka eghende amaghana anaane na miröngö etato.
Kwo meeka ghiyo,
꞉niibhwire abhaana abhande bha ghesubhe na bha ghikari.
17 Maharareeri hano ahikiri emeeka amaghana anaane na miröngö kende ne etaano,
aghaku.
18 Yareeti hano ahikiri emeeka eriighana rimu na miröngö esaasabhe ne ebhere,
akiibhora Hanooki.
19 Hano amariri komwibhora Hanooki,
akamanya emeeka eghende amaghana anaane.
Kwo meeka ghiyo,
꞉niibhwire abhaana abhande bha ghesubhe na bha ghikari.
20 Yareeti hano ahikiri emeeka amaghana kende na miröngö esaasabhe ne ebhere,
aghaku.
21 Hanooki hano ahikiri emeeka miröngö esaasabhe ne etaano,
akiibhora Metuseera.
22 Hanooki naare omusëngëri o Ryobha.
Hano amariri komwibhora Metuseera,
akamanya emeeka amaghana atato.
Kwo meeka ghiyo,
꞉niibhwire abhaana abhande bha ghesubhe na bha ghikari.
23 ꞉Naamanyiri emeeka amaghana atato na miröngö esaasabhe ne etaano.
24 Hanooki naare omusëngëri o Ryobha,
akamara akabhora gho kubha Eryobha ꞉ndemwimokiri.
25 Metuseera hano ahikiri emeeka eriighana rimu na miröngö enaane na mohungate,
akiibhora Rameeki.
26 Hano amariri komwibhora Rameeki,
akamanya emeeka eghende amaghana mohungate na miröngö enaane ne ebhere.
Kwo meeka ghiyo,
꞉niibhwire abhaana abhande bha ghesubhe na bha ghikari.
27 Hano Metuseera ꞉ahikiri emeeka amaghana kende na miröngö esaasabhe na kende,
aghaku.
28 Rameeki hano ahikiri emeeka eriighana rimu na miröngö enaane ne ebhere,
akiibhora omoona o ghesubhe,
29 akamoroka Nuhu.
Akabhugha,
“Omoona uno,
niwe aghotughambisani kwo meremo ghiito emiköngʼu ghino toghuköra kwo mabhökö ghiito mo‑se ino yiihiimuru no Omutëmi Waryobha.”
30 Hano amariri kwibhora Nuhu,
akamanya emeeka eghende amaghana ataano na miröngö kende ne etaano.
Kwo meeka ghiyo,
꞉niibhwire abhaana abhande bha ghesubhe na bha ghikari.
31 Hano Rameeki ꞉ahikiri emeeka amaghana mohungate na miröngö mohungate na mohungate,
aghaku.
32 Nuhu hano ahikiri emeeka amaghana ataano,
akabhiibhora Sheemu,
Haamu na Yabheeti.