Kaayini na Abheeri
4
Ataamu akamisi na Haawa mukaache,
nawe akabhöna anda,
akiibhora omoona,
akamoroka Kaayini.
Akabhugha kubha,
“ˆNekamara kwibhora omoona o ghesubhe kwo obhotoro bho Omutëmi Waryobha.”
2 Haawa akabhöna anda wiiki,
akiibhora ömööbhö Kaayini,
akamoroka Abheeri.
Abheeri uyo akabha omotughi o changʼöndu,
na Kaayini iwe akabha omoremi.
3 Mbe,
eriibhagha riiche koheta,
Kaayini akamoruuseri Omutëmi Waryobha amaruusi gha mughësö waache.
4 Abheeri woose akarëëta chaatugho cheeche e chimbërë gho kwibhoru,
na chaanyama chaanoru.
Omutëmi Waryobha aghachömëru na Abheeri,
na amaruusi ghaache.
5 Amare tachömiiru na Kaayini,
na amaruusi ghaache.
Kaayini aghakarara chwee,
no obhosho bhooche bhoghikunyakunya.
6 Omutëmi Waryobha akamobhoori Kaayini akabhugha,
“Neke ˆoghakararëra hangʼu,
no obhosho bhoocho mbwikunyiri?
7 Oraköra bhoheene,
noghwisherereru.
Oraanga ghuköra bhoheene,
amasari ngaghoghwishukërëra haghuhe,
ngaghoghwighomba.
Iye nokwëndëru oghakinde.”
8 Akamara Kaayini akamobhoorera Abheeri omonyi waache akabhugha,
[“Ntughëndë a‑moghondo.”]
Hano bhaare a‑moghondo,
Kaayini akamutëma omonyi waache,
akamwita.
9 Niho Omutëmi Waryobha akamobhoori Kaayini akabhugha,
“Omosuuhu waacho Abheeri hayi anyi?”
Kaayini akamugharokeri akabhugha,
“Ntyeche!
Eni teenyi omochongi o omwito.”
10 Omutëmi Waryobha akabhugha,
“Neke kino uköriri?
Amasaahë gha monyi waacho,
ngakonderera koru mwiröbhë.
11 Ibheere iye ˆokiihiimu!
Tookorema wiiki eriiröbhë rino renywire amasaahë gha monyi waacho,
uno wiitiri!
12 Hano okorema eriiröbhë riyo,
retaghokoruuseri omunöghö waache.
Nookubha omooto o kuyëngayënga koru tokubhöna obhwikari mo‑se.”
13 Kaayini akamobhoorera Omutëmi Waryobha akabhugha,
“Anchagho ino ˆokaaha n‑indito chwee,
nteeghotora ghoghumereri!
14 Mööhi,
reero numariri kuhëëbha mo‑se e munöghö,
na netarighibhu wiiki ambërë yaacho.
Neekubha omooto o kuyëngayënga mo‑se,
na wowoose uno akondighi,
nakoonyita.”
15 Niho Omutëmi Waryobha aghagharokeri akabhugha,
“Taanyi hangʼu,
wowoose uno aghoghwita,
nakorehibhu mara mohungate.”
Niho Omutëmi Waryobha akamotoorera Kaayini ekingʼöchö,
kubha wowoose uno akomorighi,
atamwita.
16 Akamara,
Kaayini akaru ambërë e Mutëmi Waryobha,
aghaye ghwikara mo‑se e Nooti,
a eribhaara re roghoro re Eteeni.
Orwibhoro ro Kaayini
17 Kaayini akamisi na mukaache,
akabhöna anda,
akiibhora omoona,
eriina reeche Hanooki.
Akamara,
Kaayini akaabhëka omoghya,
akawuha eriina re moona waache Hanooki.
18 Hanooki akiibhora Irati,
nawe Irati akiibhora Mehuyaeri.
Mehuyaeri akiibhora Metushaeri,
nawe Metushaeri akiibhora Rameeki.
19 Rameeki aghakwira abhakari bhabhere,
umu ꞉naabherekiiru Ata no owonde Siira.
20 Ata akiibhora Yobhaari,
na niwe ishe o bhaato bhano ꞉bhaare bhariikara mo‑mabhuru na ghotugha chaatugho.
21 Ömööbhö waache Yubhaari,
niwe are ishe abhatëmi bha bherereesi na changʼanga.
22 Siira nawe,
akiibhora Tubhaari‑Kaayini,
uyo niwe omoturi o bheghiro bhe konungera ashabha ne ebhyoma.
Naama naare ömööbhö o ghiike na Tubhaari‑Kaayini.
23 Rameeki akabhabhoorera abhakari bhaache kubha,
“Inyu Ata na Siira,
mutëghëërërë eriiraka reene!
Abhakari bhaane,
mutëghëërërë ghyokyose kino nekobhabhoorera.
Eni nemwitiri omooto uno anköriire erighaati.
Nemwitiri omobhureni uno anyahaariri.
24 Aribha Kaayini nakorehibhu asiire mara mohungate,
eni Rameeki nekorehibhu asiire mara miröngö mohungate na mohungate!”
Kwibhoru gho Seeti na Enooshi
25 Ataamu akamisi na Haawa,
wiiki akiihööcha,
aghitoora omoona o ghesiite,
akamoroka Seeti.
b Akabhugha,
“Eryobha ndimariri konyitabheri,
gho kuuha omoona owonde,
mo‑mweya o Abheeri,
uno Kaayini ꞉itiri.”
26 Seeti woose akiibhora omoona o ghesubhe,
akamoroka Enooshi.
Korwera hayo,
niho abhaato bhaghasëëma ghusëngëra Eryobha kwo riina re Yehoobha.c