2
Hangʼu nibhu erishaaro na ase ꞉bhiitëëmuru,
na bhyose bhino bheenyi‑mu bhekahikeerana.
2 Orosiko ro mohungate,
Eryobha ndeere rimariri emeremo gheeche ghe ghutëëma,
rekaweera,
retaaköriri omoremo wowoose.
3 Eryobha reghiitabheri orosiko ro mohungate na koromusa,
gho kubha kwo rosiko ruyo ndeere rimariri ghutëëma bhyose,
rekaweera.
4 Hangʼu nibhu erishaaro na ase ꞉bhiitëëmuru.
Ekinyaweera ke Eteeni
Omutëmi Waryobhaa hano atëëmiri ase ne erishaaro,
5 hataare no omumërö wowoose koru oronyenyi mo‑se,
gho kubha mo‑chaasiko chiyo Omutëmi Waryobha naare akeere ghutëëki ambura,
na mooto taare‑ho o korema ase.
6 Amare amanche ꞉ngaatiiriri koru haase,
ghaghachachi ase yoose.
7 Niho Omutëmi Waryobha akabhomba omooto koru mo‑rotu ro se,
akamohuuteri omwika o bhuhöru mwinyeero,
omooto uyo akabha muhöru.
8 Akamara,
Omutëmi Waryobha akeemi ekinyaweera eribhaara re roghoro iyo Eteeni.
Mo‑kinyaweera kiyo,
aghatoora‑mu omooto uno are abhombiri.
9 Omutëmi Waryobha akamëri emete ghe manga ghoose ghino gheere gherategheri mo‑miisho,
na ghino gheere na amakorobhese gha koreebhu.
Ghateghate e kinyaweera kiyo,
꞉haare no omote o kobhaha abhaato obhuhöru,
no omote o kumënya amachömu na amabhe.
10 Eteeni hayo,
꞉ndoore‑ho orooche runo roore roraghëri amanche na ghwiterera ekinyaweera.
Korwera hayo,
roghataana cheekabha charooche inye.
11 Orooche o rumbërë ndokobherekeru Bhishooni,
niro rokwinaara ase yoose e Habhira,
ino enyi na sahaabhu,
12 na sahaabhu yaache n‑chömu.
Wiiki,
neere na amaghuta gha koneesa ghano ghabherekiiru Bhetoora,
na amabhohe amachömu ghano ghabherekiiru Shohaamu.
13 Orooche ro kabhere ndokobherekeru Ghihooni,
niro rokwinaara ase yoose e Kuushi.
14 Orooche ro ghatato ndokobherekeru Tighiriisi,
niro roghughëri kwërëkëra eribhaara re roghoro re se e Ashuuru.
No orooche ro kane ndokobherekeru Ebhuraati.
15 Mbe,
Omutëmi Waryobha naare amotooriri omooto uyo mo‑kinyaweera ke Eteeni,
kubha akereme na ghokimööhi.
16 Omutëmi Waryobha akamobhoorera akabhugha,
“Mo‑kinyaweera kino,
nwishereriiru kurë amakorobhese gha mete ghino ghyose.
17 Amare amakorobhese gha mote o kumënya amachömu na amabhe,
otare,
gho kubha orosiko runo okurë amakorobhese gha mote uyo,
obhuhëënë nooghoku.”
18 Akamara Omutëmi Waryobha akabhugha,
“Taanyi bhoheene omooto uno ikare omwene,
nekomukörëra omooto o komotoori uno akomotegheri.”
19 Mbe,
Omutëmi Waryobha akabhomba koru mo‑maröbhë chatyenyi choose che mwiteregho,
ne ebhinyönyi bhyose.
Akamara akamurëëtëra Ataamu kubha arighi amariina ghano akobheroka.
Amariina ghano ꞉abherokiri,
nigho ꞉ghabheere amariina ghaabho.
20 Mbe,
chatyenyi choose chino che ghotugha na che mwiteregho,
ne ebhinyönyi bhyose,
Ataamu akabheroka amariina.
Amare tarooche omooto o komotoori uno atubhiine nawe.
21 Niho Omutëmi Waryobha akamurëëtëra Ataamu chandöörö indito.
Hano amisiri,
Omutëmi Waryobha akaruusi orubharu rumu,
na ahaghiro hano aruusiri orubharu ruyo,
akahakundekeri na anyama.
22 Orubharu ruyo ꞉aruusiri kwo Ataamu,
akaruköra kubha omukari.
Akamara,
akamurëëta ghokooche.
23 Niho Ataamu akabhugha,
“Ibheere uno ne eriighuha koru mo‑maghuha ghaane,
na anyama koru mo‑chanyama cheene!
Naakubha arabherekeru ‘Omukari’,
gho kubha naruusuru mo‑mosubhe.”
24 Gho ghayo,
omosubhe nakobhatigha ishe na nyina,
na ghughöötana no omukari waache.
Bhayo bhabhere,
mbaakubha omobhere umu.
25 Ataamu na mukaache mbaare kingʼaabhi,
amare bhatarooche chaasoni.