Eghitabhu ghe Simoka
Ghutëëmu gho se ne erishaaro
1
Simoka hayo,
Eryobha ꞉ndiitëëmiri erishaaro na ase.
2 Kwo riibhagha riyo ase mboowa ere,
teere ne eghisösö ghyokyose kiire.
Ekengʼuuri nkeere ghekundekiiri ighoro e manche,
na Akörö e Ryobha neere imëëriri ighoro yaache.
3 Rekamara Eryobha rekabhugha,
“Obhwero bhubhe‑ho.”
Obhwero bhokabha‑ho.
4 Eryobha rekarighi kubha obhwero bhuyo m‑bhuchömu,
reghataani obhwero ne ekengʼuuri.
5 Niho rekaroka obhwero,
“Omwishe,”
ne ekengʼuuri reghakeroka,
“Obhotiko.”
Bhookiira,
bhooghake,
orosiko o rumbërë.
6 Rekamara Eryobha rekabhugha,
“Habhe no omweya ghate e manche,
ghutaani amanche gha Mwishaaro na amanche gha haase e rishaaro.”
7 Gho ghayo,
reghatëëma omweya uyo,
reghataani amanche ghano ghaanyi ighoro Mwishaaro,
na ghano ghaanyi haase,
ekabha hangʼu.
8 Rekaharoka ahaghiro hayo,
“Eriighoro.”
Bhookiira,
bhooghake,
orosiko ro kabhere.
9 Rekamara Eryobha rekabhugha,
“Amanche ghano ghaanyi haase e rishaaro,
ghiikomane haghirohamu,
kubha ase ayoomu ibhönëkë.”
Ekabha hangʼu.
10 Rekaharoka ahaghiro ahoomu “Ase.”
Na ahaghiro hano amanche ghiikomiine,
rekaharoka “Anyancha.”
Eryobha rekarighi kubha m‑bhoheene.
11 Rekamara Eryobha rekabhugha,
“Emimërö ghino gheenyi na chaatëtërë che manga ghoose ghimërë mo‑se,
na ase ibhe ne emete ghe makorobhese ghano ghaanyi na chaatëtërë.”
Ekabha hangʼu.
12 Emimërö ghe chaatëtërë che manga ghoose,
ne emete ghe amakorobhese ghano ghaanyi na chaatëtërë che manga ghoose,
ghekamëra mo‑se.
Eryobha rekarighi kubha m‑bhoheene.
13 Bhookiira,
bhooghake,
orosiko ro ghatato.
14 Rekamara Eryobha rekabhugha,
“Habhe ne emirëngaari ighoro,
kubha emirëngaari ghiyo ghitaani omwishe no obhotiko,
ghibhe ghërëërëki amabhagha,
chaasiko ne emeeka.
15 Emirëngaari ghiyo ghibhe ighoro,
ghirëngaari ase.”
Ekabha hangʼu.
16 Hangʼu nibhu ꞉riitëëmiri emirëngaari emekoro ghe manga abhere,
eryobha rirëngaari omwishe,
no omwëri urëngaari obhotiko,
aghaköra na chanchöta.
17 Aghaghetoora emirëngaari ghiyo ighoro,
ghibhe gherarëngaari mo‑se,
18 ghetore kurëngaari omwishe no obhotiko,
ghibhe gheraahukani obhwero ne ekengʼuuri.
Eryobha rekarighi kubha m‑bhoheene.
19 Bhookiira,
bhooghake,
orosiko ro kane.
20 Rekamara Eryobha rekabhugha,
“Amanche ghiichore chatyenyi chino cheenyi no omwika o bhuhöru,
ne ebhinyönyi bhibhe bheriibhururuka ighoro Mwishaaro.”
21 Reghatëëma asu inkoro,
na chatyenyi choose chino cheenyi no omwika o bhuhöru,
chibhe cheriishagha na chiichore mo‑manche kurëngʼaana na amanga ghaache.
Reghatëëma ebhinyönyi kurëngʼaana na amanga ghaache.
Eryobha rekarighi kubha m‑bhoheene.
22 Eryobha rekabhiitabheri rekabhugha,
“Mwibhore,
mwiyengere,
musanche moyiichori anyancha,
ne ebhinyönyi bhiyëngërë mo‑se.”
23 Bhookiira,
bhooghake,
orosiko ro ghataano.
24 Rekamara Eryobha rekabhugha,
“Ase eruusi chatyenyi choose chino cheenyi no omwika o bhuhöru,
kurëngʼaana na amanga ghaabho,
chatyenyi che ghotugha,
na chatyenyi chino chekwingʼuura haase ne chatyenyi chi ibhara.”
Ekabha hangʼu.
25 Hangʼu nibhu Eryobha ꞉riitëëmiri chatyenyi choose kurëngʼaana na amanga ghaache,
chi ibhara,
na che ghotugha,
na chino chekwingʼuura haase.
Eryobha rekarighi kubha m‑bhoheene.
26 Rekamara Eryobha rekabhugha,
“Tomobhombe omooto gho eghisösö kiito,
na atubhaane na niitu.
Akangate chaasu,
ne ebhinyönyi,
na chaatugho,
na kyose kino ghekwingʼuura ighoro e se na ase yoose.”
27 Niho Eryobha rekabhomba omooto gho eghisösö keeche,
gho ghisösö ke Eryobha rekamobhomba omosubhe no omukari.
28 Rekabhiitabheri na kobhabhoorera,
“Mwibhore,
na mwaruhe,
na mwichori ase na koyikangata.
Mkangate chaasu,
ne ebhinyönyi,
na chatyenyi choose chino cheghughënda mo‑se.”
29 Rekamara Eryobha rekabhugha,
“Morighi,
nekobhaha emimërö ghyose mo‑se ghino gheenyi na chaatëtërë,
haghirohamu ne emete ghe makorobhese ghino ghekoruusi chaatëtërë.
Bhiyo nibhyo bheekubha ebhiinyakurë bheenyu.
30 Chatyenyi choose che se,
ne ebhinyönyi bhyose bhe Mwishaaro,
ne ebhetyenyi bhyose bhino bheghughënda mo‑se,
bhino bheenyi no omwika o bhuhöru,
nekobhiha emimërö ghyose e minyariiri ngeekubha ebhiinyakurë bheebho.”
Ekabha hangʼu.
31 Eryobha rekarighi egheghiro kyose kino ꞉riitëëmiri kubha n‑ghichömu chwee.
Bhookiira,
bhooghake,
orosiko ro ghasaasabhe.