Jesu wo roma ba masomeshupapedi
10
Byalo Jesu a kgeta ba bangwana ba barutiwa bage ba masomeshupapedi, a ba roma ka babedi ka babedi metjing ye ke ho a nyaka go ye yetela. 2 Jesu a ba botsa a re: “Puno ke ye kgolo tjhemong, mara babereki a ba tlala. Kgopelang Morena wa puno, ke moka a romele ba bereki tjhemong yage ya puno. 3 Ariyeng! Ke le roma byalo ka dinku gare ga diphiri. 4 Le sa tseye sekhwama sa tjhaleta kela sa dikobo kela bomamphashane, le sa dumedise motho tseleng.5 “Ho le kena ntlong ya motho, thomang ka gore: ‘Khutjo ye be gona hone ntlong.’ 6 Ho motho wa ntlo yone a na le khutjo, khutjo ya Modimo ye nyoko dula ho gage, mara ho a se nayo, khutjo ye nyoko boyela ga lune. 7 Dulang ntlong yone, le dye le nwe se sengwana le se sengwana so ba le tlhallelang ka sona, ka gore wa go bereka wo tshwanele ke go gola. Le sa sepelanye le magaye ya batho.
8 “Ho le kena motjing ba le yamogela, dyaneng so ba se beyang matlhong ya lune. 9 Fodisang ba go lwala bo ba leng hone le ba botse le re: ‘Mmusho wa Modimo wo thina le lune.’ 10 Mara ho le kena motjing ba sa le yamogele, ariyeng kuwa ditseleng le re: 11 ‘Lerole la motji wo wa lune lo le re mamareleng mawotong ya rune re le rothothela kgatlhanong le lune. Mara tjibang so, Mmusho wa Modimo wo thina.’ 12 Ke ya le botsa ka letjatji lone tso di nyoko makegelang motji wone, di nyoko feta tso di makegeleng Sodoma ka go baba.
13 “Madimabe ho gago, Korasine! Madimabe ho gago, Betsayida! Ka gore hala nkabe mehlolo yo ye makiwuweng ho ga lune, ye makiwuwe Tiro le Sidone, nkabe ba sokologiye botala, ba dule ka dikobo tsa masaka luteng. 14 Mara go nyoko ba kawone ga Tiro le Sidone ka letjatji la katlholo go feta lune. 15 Le wene Kapernaume, naa wo nyoko rotosediwa legedimong? Awowa, wo nyoko ya fase moleteng wa dihele.
16 “Ye a le theyetselang wo theyetsela nna, ye a le ganang wo gana nna, mara ye a ganang nna wo gana le ye a nrommeng.”
17 Barutiwa ba Masomeshupapedi ba boyiye ba dyabodiye ka maatla ba re: “Morena, le mademone a re theyetsela ho re berekisa lebitso lago.”
18 Jesu a fetola a re: “Ke bonne Sathane a yewa byalo ka legadima a tjwa legedimong. 19 Ke le neyiye maatla ya go gatanya dinoga le makopelane le ya go fenya maatla ya lenaba, a go na so se nyoko le kwaletsang. 20 Mara, le sa dyabodise ke gore memoya ye mebe ya le theyetsela, dyabodisang ke gore mabitso ya lune a ngwadiwuwe pukung legedimong.”
21 Jesu ka nako yo none, a tlele ka godyabola ka Moya wo Mokgetwa a re: “Ke ya go reta, Papa, Morena wa legedimo le lefase, ka gore wo wutetsele ba go tlhalefa le ba go tjhutega dilo tso, wa di wutollela bananyana. Ee, Papa, tsone di go dyabodisiye ka maatla.
22 “Dilo ka moka ke neyiwuwe tsona ke Papa. A go na ye a tjibang gore Morwayi ke mang ho yese Papa hela, kela ye a tjibang Papa ho yese Morwayi hela, le bo Morwayi a ba kgetiyeng go ba wutullela yene.”
23 Jesu a boyela ga barutiwa bage ho ba le ntoshi a re: “Go shegofele matlho wo a bonang tso le di bonang. 24 Ke ya le botsa, baporofeta le dikgoshi ba nyakiye go bona tso le di bonang, mara a ba di bona. Ba nabele go kwa tso le di kwang, mara a ba di kwa.
Setshwaniso sa Mosamariya wa go loka
25 Ka nako ye nngwana gwa tlogamela setjibi sa molawo sa leketsa Jesu sa re: “Moruti, nka maka byang gore ke be le bophelo bya go sa fele?”
26 Jesu a fetola a re: “Go ngwadiwuwe ying molawong wa Moshe, le gona ho wo wo bala wo re ke ying?”
27 A yaraba ka gore: “Wo re, wo rate Morena Modimo wago ka pelo yago ka moka, le ka moya wago ka moka, le ka matjhika yago ka moka, le ka monagano wago ka moka, fote rata moyagisane wago byalo ka ho wo terata.”
28 Jesu a fetola a re: “Wo yarabiye gabutji, maka sone wo nyoko phela.”
29 Mara ke ho a nyaka go telokafatsa, ke moka a botsisa Jesu a re: “Moyagisane waka ke mang?”
30 Jesu a mo fetola a re: “Monna wo thewogiye a tjwa Jerusalema a ya Jeriko, a wela diyatleng tsa dikebeka. Ba mo tjola dikobo tsage, ba mo teya ba mo shiya a le thina le go hwa. 31 Gwa makega gore Moprisita a thewoge ka tsela yone, ho a bona monna yela, a yaroga a feta ka thoko. 32 Molefi le yene, ho a sepela ka tsela yone a segela tulong yone, a bona mmona yela a feta ka thoko. 33 Mara Mosamariya, a le leyetong a segela ho monna yela a leng gona, ho a mmona a mo kwela gobaba. 34 A ya gage a mo woka ka go mo tlemelela dintho ka mapantisi, a mo tjhela mahura le beyine. Ke moka a mo kalamisa pokolo yage, a mo yisa ntlong ya bayeng a mo tlhokomela. 35 Ka letjatji lo le latelang a tseya tjheleta ya go ka lekana dipeperetlana ka dipedi tsa silebere a neya motlhokomedi wa ntlo ya bayeng, ke moka a re gage: “Mo tlhokomeleng”, ho ke boya ke nyoko go patela dilo ka moka tso le di berekisiyeng.”
36 “Byalo ke mang ho ga bo ka bararo ye le ka reng ke moyagisane wa monna ye a weleng matsogong ya dikebeka?”
37 Setjibi sa molawo sa fetola sa re: “Ke ye a mo gawogeleng” Jesu a mmotsa a re: “Ariye wo make go tshwana naye.”
Jesu lapeng la bo Mareta le Maria
38 Ho Jesu le barutiwa bage ba tjwela pele ka leyeto, ba segela motjing ho mosadi ye ba reng ke Mareta a mo yamogeleng lapeng lage. 39 Ke ho a na le sesi wage, ye ba reng ke Maria, ye ke ho a dule mawotong ya Morena, a theyetsele tso a di bolabolang. 40 Mara Mareta ke ho a tetlhopa ka go lokisa tsagodya tsa ka malobana. A tla ga Jesu a mmotsisa a re: “Morena, a wo na taba gore sesi waka wo fo nlesetsa ke bereka ke le ntoshi a dule? Mmotse a tle a nthushe!”